Нылкышноосты ӟечкылалозы Сергейёс

Ангелина Снигирева
By Ангелина Снигирева 6 марта, 2020 16:33

Можга ёросысь «Сергейёс» коллектив, нылкышноослэн праздниксылы сӥзьыса, бадӟым концертэ ӧтчаське. Сергейёс 10 ар шулдырто ни калыкез, Удмуртиын сяна, соослы чабизы Татарстанысь но Ростов улосысь, Сочиысь но Санкт-Петербургысь учкисьёс, шуныт пумитазы Арабские Эмиратылэн шоркараз Дубайын.

Вераны кулэ: кырӟасьёслэн ваньмызлэн нимзы Сергей. Соос оскисьтэмъёслы паспортсэс но куддыр возьмато. Нылкышноослы тунсыко потэ документлэн 14-тӥ бамыз. Оло кузпалъяськымтэ? Но эке-кек… Паспортын котькудӥзлэн Сергейлэн кышнояськемез сярысь штамп лякемын.

Али коллективын 4 кырӟасьёс. 10 ар ӵоже Сергейёс коллективын 6 кузя вал ни. Нырысетӥ составе пырись артистъёс пӧлысь кылизы на Сергей Созонов, Сергей Крутихин но Сергей Кайсин. Ас вакытаз коллективысь кошкиз Сергей Демьянов. Со интыын табере Сергей Вотяков. Нош кылем арын коллективысь кошкиз эшшо огез эшсы — Сергей Алексеев.

— Озьы пӧрмиз. Кошкись муртэ кутыса уд возьы ук. Кусыпъёсмы шунытэсь, ог-огмылы кӧтӝожъёсмы ӧз кыле, — шуэ Сергей Крутихин.

Озьыен, табере соос 5 но 4 но ӧвӧл. Соос — «Сергейёс».

Созонов республикаын азьло но тодмо вал ни крезьгур гожъяменыз. Можгалась педколледжын дышетэм сяна, со кырӟанъёс кылдытъяз, ачиз ик быдэсъяз. Ӵапак 2012-тӥ арын «Элькуновидениын» Сергейёс быдэстӥзы солэсь «Ӟеч-а, бур-а» кырӟанзэ. Со дырысен Сергейёсты тодӥсьтэмъёс ӧз ни кыле. Коллектив быдэсъя Созоновлэсь 5 кырӟанзэ. Сергей Николаевич «Элькуновидение» бере эшъёсызлы кыл сётэм вылэм, арлы быдэ 2 кырӟан-шлягер гожтоз шуыса. Но творчестволы дырыз уг кыльы, пе.

Крутихин — Учалась культурая юртысь хормейстер. Гуртоосыз сое асьсэ пизэс кадь ярато, тодазы но ӧвӧл ни, Сергей Иванович Сьӧлта ёросын будэмын шуыса. Ма, табере Можга районэ выжыяськемын ни. Культурая юртын «Чибори» ансамблен кивалтэ, вутске мӧйыосын но, пиналъёсын но ужаны. Арлы быдэ Можгалан арганчиослэсь фестиваль-ӵошатсконзэс радъя.

Кайсин Вуж Какся культурая юртын ужа. Со «Сергейёслэн» чеберлыкъя кивалтӥсьсы луэ. Со сюлмаське коллективлэсь репертуарзэ узырмытон понна. Ачиз но кырӟанъёс гожъя. Таиз Сергей Ижысь усточи нылпиослэн школа-интернатазы дышетскемын. Эшъёсыз пӧлын со туж востэм кадь. Но ӵапак таиз Сергей, ӝоже уськытытэк, эшъёссэ дышетэ, визьма.

Вотяков — Сергейёс пӧлысь тужгес егитэз артист. Коллективе со бергес вуиз, озьы ке но ассэ эшъёсыз пӧлын туж капчи шӧдэ. Пычасын улэ, но ужаны ветлэ Можгала — татын культурая юртын звукорежиссёр луэ. Тазэ Сергеез коллективын «пичи» шуо. Зэм, Вотяков ӝуждалаеныз вань эшъёссэ ортче. Егит Сергей ваньзэсты дӥсяськыны дышетэ. Сергейёслэн сцена вылэ потон костюмъёссы туала, туж яркыт луо.

— Репетициос ласянь мыным капчигес — пиос ваньзы Можгала лыкто. Тани та вакытэ концертлы номеръёсмес волятӥськом, — шуэ Сергей Созонов.

Сцена вылын ӵош кырӟам сяна, Сергейёс валче шутэтско но — гужем быдэс семьяосынызы тымет дуре потало. Нош кудо-туклячи кариськыны ог-огзылы уг быгато: Крутихинлэн но, Созоновлэн но, Кайсинлэн но быдэн 2 нылъёссы будо. Нош Вотяковлэн семьяезлы ныл ӧз «паласькы» — солэн 1 пиез будэ.

Мартлэн кутсконаз «Сергейёс» Пермьысь учкисьёсты шулдыртозы. Татысь эш — «Ба-ба-ту» фолк-группаез — шедьтӥзы, Ростов улосэ вуылыкузы. Нош 7-тӥ мартэ «Сергейёс» кырӟалозы Удмуртиысь нылкышноос понна.

Елена Сараматова

Ангелина Снигирева
By Ангелина Снигирева 6 марта, 2020 16:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<