Малы скалъёс уг сюлмасько?

Ангелина Снигирева
By Ангелина Снигирева 25 марта, 2020 14:58

Коронавирусэн йырин ог-огзэс валамысь дугдӥзы кузпалъёс Олён но Олёш.

Суредаз Леонид Прозоров

Олён Интернетысь фотоосты адӟиз: огаз бадӟым супермаркетын ӝажыос бушало ни, пе. Уж дурын ик нылкышно малпаськыны кутскиз: оло, тожо басьтоно на.

Ӝытазе Олён дораз ревизия ортчытӥз: манной, йыды, чабей, тари, сезьы кеньыръёсыз вань. Рисэз но 3 пумо. Но ваньмыз кеньыръёс усьтэмын ни. Быдэс пачкаос ӧвӧл. Макаронэз 2 кило, спагеттиез 3 пачка, пызез 2 кило. Чай но какао вань. Вот кофе быре ни. Ярам, сакырез 20 килограмм. Акция вакытэ картсэ басьтыны косӥз вал. Кӧсвӧй но алигес выльзэ усьтӥз. Сылалтӥськемъёсыз вань. Емышъёс арнянуналэ басьтӥз вал. Гордкушманэз но кешырез, сугон-чеснокез холодильникын кыллё. Вот картофкаез 1 ведра мында гинэ – городысь квартираын мултэс уд возьы. Морозильникын сӥлез но тырмыт, эшшо пельнянь но сиыса быдтымтэ. Нош тушёнкае ӧвӧл, куалектӥз кышномурт.

Нош Европаын яке Китайын сямен карантин ялӥзы ке? Маин сюдод семьядэ? Уката ик нылпиосты – соос нуналмысь кыӵе не нюмыш-нямыш сиён куро, бичаськыса уло.

Ӝытсэ сиськемзы бере Олён картсэ магазинэ ӧтьыны кутскиз:

— Ойдо кеньырлы. Быдэн кило ке но басьтом. Эшшо вӧй, сакыр, макарон.

— Быриз-а, мар-а? — соку ик ӧз вырӟы Олёш.

— Коронавирус вуиз ке? Карантинэ ворсазы ке? Отчыозь магазинъёс бушаса вуизы ке?

— Кытын тон сое возёд? Гуртын сямен, чуланэд но, гулбечед но ӧвӧл. Холодильникмы но одӥг, со нерезиновой, — ӝот-ӝот вазиз картэз.

Олён кыштыр дӥсяськиз но огназ лавкае потӥз. Корка вӧзысьтыз супермаркетын адямиез ик трос ӧвӧл. Со понна ӝажыос вылын но, холодильникъёсын но сиён тырмыт. Дунъёс но вошъяськымтэ. Тани сакыр – 25 манет но 90 коньы. Огвакытэ дунтэмгес вал – 22 манетэн. Оло, басьтоно? Манной кеньыр 26 манетэн, озьы ик вал кадь. Нош нылызлэн яратоно спагеттиез воксё акциен вузаське – дуныз 31 процентлы кулэстэмын.

Емыш но йӧл сиёнъёс басьтыса, Олён дораз пыриз.

— Мар адӟид? — тунсыкъяськиз картэз.

— Сакыр дуноям, 25 манетэн луэм.

— Куке но сакыр 42 манет сылэ вал, — гань-гань вераз Олёш.

Олён телефонзэ кутӥз: маин меда нош ик кышкатъя ни Интернет. Уж дурысь эшез ивор лэзем. Удмуртиысь Правительстволэн Тӧроезлэн воштӥсез, гурт удысъя но сиён-юонъя министр Ольга Абрамова пыр-поч ивортэм, кӧня продукция дасяло Удмуртиын улӥсьёс:

— Йӧл сярысь верано ке. Котькуд нунал Удмуртиын 2 сюрс тонна йӧл кыско. Нош скаллы дунне, кыӵе югдур коргидлэн борддоръёсыз сьӧрын. Котькуд нунал Удмуртиын улӥсьёс йӧллэсь 755 тонна продукция сиё-юо. Математика ваньзэ возьматэ…

Нош синйылтӥды ке, магазинъёсын сиён-юонлы дунъёс тэтчаны кутскизы шуыса, ивортоно Гурт удысъя но сиён-юонъя министерствое udmapk@yandex.ru яке Ольга Абрамовалэн соцвотэсъёсысь бамъёсаз.

Ангелина Снигирева
By Ангелина Снигирева 25 марта, 2020 14:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<