Кышкано ӧвӧл, но чакласьконо

Ангелина Снигирева
By Ангелина Снигирева 18 марта, 2020 16:58

Кунгожъёс пытсасько, фестивальёс, вожвылъяськонъёс уг ортчо – быдэс дуннеын коронавируслы пумит ужрадъёс кутӥсько. 

Киосты миськыны кулэ
Туспуктӥз М. Егоров

Кык кунъёс вискын 

Наталья Чухланцева кылем арын ноябрь пумын Южной Кореяысь 2 пичи пиналъёсыныз вуиз Иже анаез доры. Татын вордскем нылмуртлэн пиезлы но нылызлы возьматэмез потӥз, кыӵе со — Россиысь Выль ар. Угось Южной Кореяын толалтэ интыен-интыен гинэ лымы кылле. 
— Соку коронавирус сярысь кыл поттылӥсь ӧй вал на, — шуэ Наталья. — Соин ик берлань кошкыны 7-тӥ мартлы билетъёс басьтӥм… 
Но Наталья пиналъёсыныз туннэ но Ижын. 7-тӥ март азьын билетъёссэс берыктоно кариськизы: Москва аэропортысь Южной Кореяе но Китае лобись самолётъёсы одӥг интыетӥ потоно, соин ик китайёсын пумиськыны кышкатскизы. 
— Билетъёсмы табере 9-тӥ апрельлы басьтэмын, — азинтэ веранзэ Наталья. — Соосты воштон понна ватсаса 5 сюрс манет тыроно луим. Нош али, кызьы тодӥсько, кунгож сьӧры потыны дасяськисьёслэсь билетъёссэс берлань куто но, вошто но нокыӵе комиссиостэк. 
Натальялэн кузпалыз кылемын дораз, Южной Кореяе. Семьяезлэсь берытскемзэ чидатэк вите ни. 
Ёнсок, озьы нимыз Натальялэн кузпалызлэн, Интернет пыр шуэ: Кореяын коронавируслы пумит уно ужрадъёс кутӥсько. Тросэз табере доразы ужало Интернет пыр. Ёнсок уже ветлэ на, но фирмаязы маскатэк пыраны уг лэзё ни. 

Адями — саранча 

«Кыӵе саранча ортчем яратоно Будапештэтӥм?!» — тазьы гожтэ Венгриын улӥсь удмурт нылаш Мария Золотарёва аслаз вотэс бамъёсаз. — Лавкаосысь вань ӝажыос бушесь — картошка, мукет емыш куд-ог интыосын гинэ кылемын. Сӥль нокытысь басьтыны! Аптекаосын черодъёс урамозь кыстӥсько — адямиос нормалэсь 2 поллы тросгес витаминъёс юо. 
Кызьы вераз Мария, венгръёс воксё куалектэмын ӧвӧл ке но, холодильникъёссэс тырмытӥллям сиён-юонэн — кин тодэ, карантин ялозы. Венгриысь университетъёс карантинэ пытсасько, трос калыкен ужрадъёс уг ортчыло, тросэныз странаосын кунгожъёс пытсамын. Адямиос ымныръёссэс ватӥзы маскаосын… 

Кунгожъёс пытсамын 

Россилэн Правительствоезлэн Тӧроез Михаил Мишустин шуэ: Россиын коронавирус медаз вӧлмы шуыса, ваньмыз лэсьтӥське. Но озьы ке но котьмалы дась луоно. Экономика куашканы уз сётӥськы — югдурез юн чакласа возе Президент но, Правительство но. Сиён-юонэн запасъёс тырмыт. Магазинъёсысь ӝажыос нунал ӵоже бушало ке но, соос ӵуказеяз ик выльысь тырмытӥсько. 
Нош вирус медаз вӧлмы шуыса, пӧртэм ужрадъёс кутӥсько. Озьы пытсасько шундыпуксён пала кунгожъёсмы но — толло нуналысен, кылсярысь, самолётъёс лобамысь дугдӥзы Италие, Испание, Германие, Францие. 
Россиысь Тазалыкез утёнъя министерство ивортэмъя, та вакытлы Россилэн 122 сюрслэсь ятыр гражданъёсыз карантин пыр потӥзы ни — пӧлысьтызы данакез кунгож сьӧрын вал. 149 муртлы коронавирус паласькем ик, но 5-ез йӧнамзы бере доразы лэземын ни. 

Киосты миськоно 

Кыӵе югдур Удмуртиын? Та пумысен бадӟым кенешон ортчиз Удмуртилэн Тӧроез дорын. 
Шаерамы 18-тӥ мартлы коронавирусэн черламъёс шараямтэ. Карантинын 157 мурт улӥз ни, пӧлысьтызы 19-эз — мукет кунъёслэн гражданъёссы ( 18-эз — Китайысь). Али эмъясьёс чакласа возё 105 муртэ, 7-ез — нылпиос. 
— Палэнысь вань лыктӥсьёс 14 нунал ӵоже карантинын уло, соос калык пӧлы потанлэсь алэмын, — шуиз тазалыкез утёнъя министр Георгий Щербак. — Эмъясьёслы соос возьматъясько нимысьтыз тупатэм дыре. 
Республикаысьтымы больницаосын кышкыт паласькись висёнъёсын черламъёсты йӧнатыны 805 койкаос чакламын, дасямын 57 боксъёс. Висисьёс тросгес луизы ке, ватсаса 1 сюрс 79 койкаос усьтыны луоз на 38 стационаръёсын. Больницаосын тыослы вентиляция лэсьтыны (ИВЛ) 303 аппаратъёс вань, матысь дыре Россилэн бюджетэз чотын эшшо 13-зэ басьтыны чакламын. Со сяна, эмъясьёслы, ӝог юрттэт сётӥсьёслы, инфекциез лэзисьтэм нимысьтыз дӥськут басьтэмын. 
— Огшоры пыэдэн ӵошатыса, коронавирус, зэмзэ но, лекгес, — вераз медицина наукаосъя кандидат, Ижысь медициная кун академиысь паласькись висёнъёсъя но эпидемиологияя ёзэн кивалтӥсь Олег Малинин. — Выль инфекцилэсь ог 4 процентсэ черламъёсты утьыны уг луы. Пыэд озьы ик секытэн ортче. Но солы пумит вакцина, эмъюмъёс вань. Коронавирус – выль кылдэм маке. Тодосчиос та вакытэ эскеро эмъян амалъёсты, вакцина кылдытон бордын ужало.

 Соин ик али кыле одӥгез: чакласьконо. Озьыен, киосты майталэн умой-умой но ӵемгес миськылоно, трос калык люкаськылон интыосы потанлэсь возиськоно, кызӥсь-кизьнылӥсь муртъёслэсь палэнтӥськоно. 
Юанъёс кылдыку, жингыртыны луоз 8-800-100-24-47 телефон номеръя. Кыӵе югдур коронавирусэн Россиын, дуннеын, маин кышкыт луэ, кызьы солэсь утиськоно — ваньзэ тае табере тодыны луэ стопкоронавирус.рф Интернет порталысь.

 

Элина КУМАЧЁВА

Ангелина Снигирева
By Ангелина Снигирева 18 марта, 2020 16:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<