Кызьы утёно дукъяез?

Ангелина Снигирева
By Ангелина Снигирева 16 марта, 2020 12:44

Эгралась Виталий Владыкин доры экскурсие нылпи садысь но школаысь пиналъёс ӵемысь вуыло. Азбараз угось олокӧня пумо тылобурдоез. Али фазан но дукъя вордонлы бадӟымгес саклык висъя.

Айы дукъя
Виталий Владыкинлэн архивысьтыз

Курегъёсын артэ — фазан

Виталий Зотович пудоен, тылобурдоосын вырыны кемалась яратэ. Фермер луыса ужакуз, вал вордӥз. Тэль котырын муш чуркаосыз лачак вал. Но огпол гондыр ваньзэ бекыръяз. Со дырысен тылобурдоос вылэ выжиз. Таоссэ утялтыны трослы капчигес, шуэ. Озьыен, азбараз куаш потто ӟазег, курка (немыч), пӧртэм пумо ӵӧж, дыдык, пислэг, бегунок, фазан, дукъя но мукетъёсыз.

— Пенсие потыса, гуртын мар карод? Телевизор азьын пукыса, эшшо ӝоггес пересьмод. Эсьма, азбаре потӥськод но, тылобурдоос котырад люкасько, сиён куро. Сюлэм шумпотыны кутске, — вера Виталий Владыкин.

Ӟазег, ӵӧж вордон огвыллем потӥз но, кӧня ке ар талэсь азьвыл фазан басьтӥз. Кыр тылобурдоос кузёзэс яратӥзы.

— Фазанэз будэтыны воксё секыт ӧвӧл, — шуэ пиосмурт. — Курегез сямен ик утялтоно. Тусыз но куреглы тупа, быжыз гинэ маке кузьда. Нош сӥльыз — кылдэ ньылод, сыӵе ческыт. Куноос вуо ке, курег сӥль шоры уг ик учко, фазанлэсьсэ соку ик быдто.

Виталий Зотович пусъемъя, фазан бадӟым уг луы — ог 2 килограмм. Кузьдалаез 80 сантиметрозь вуэ. Котьмар сёт — номыре но уз кельты. Туж яратэ сима, йыды, чабей, кукуруза, кубиста, картошка, ӵужкушман но мукет бакча сиёнъёсты. Гужем картошка бакчаысь колорад жукъёсты вожмаськыса сиё.

— Ӝӧк вылысь кылем-мылемез но мултэс уг каро. Таза мед будозы шуыса, сиёназы дырын-дырын тырылӥсько чорыг вӧй, чорыг пызь, мел. Соку пиоссы но таза вордӥсько.

Фазан араз 50 пуз поттэ. Ӵогиськем пиоссы котырын Виталий Зотович берганы яратэ. Сюдыны комбикорм басья, пӧзьтэм курегпуз, векчи корам турын-куарез азязы тыре. Озьы ӝоггес чеберско, пе.

— Фазанъёс кыр пӧйшуръёс бере, огпол 10-сэ тэле лэзи. Инкуазьын кызьы меда будозы шуыса тодэме потӥз. Удмурт кун университетысь тодосчилы Александр Меньшиковлы малпанме верай. Эше угось дышетскемезъя орнитолог. Тылобурдо будэтон сярысь со ӵемысь визь-кенеш сётъя. Но лэзем фазанъёсмес оло пӧйшуръёс кесяллям, оло пӧйшурасьёс кутӥллям — ӧм шедьтэ ни.

Пыдъёссы кырыжесь

Тэлетӥ ветлыкузы, эшъёслэн малпанзы вордскиз: дукъяосты будэтыса эскероно. Шаерамы таос чиньыен лыдъямон кылемын. Арысь аре лыдзы кулэсме.

— Азьвыл егерьёс дукъяосты кутыло но мукет ёросъёсы нуыса кельто вал, вирзы мед воштӥськоз шуыса. Али соин нокин уг выры ни. Соин ик дукъяос туж лябесь. Пыдъёссы икыр-кукыр вордӥсько, огез огпала, мукетыз воксё мукет пала учко, таин сэрен ветлэмзы уг луы. Сиён шедьтыны быгатытэк, пӧйшуръёслэсь но 
адямиослэсь лобӟыны уг быгато — быро. Азьланяз но озьы луиз ке, тэльёсысьтымы дукъяосты адӟыны уз луы ни. Эгра котырын соос туж ӧжыт ни, — вера Виталий Владыкин.

Виталий Зотович Александр Григорьевичен дэмен басьтӥськизы та тылобурдоосты поттон борды. Рос-прос тодэмзы потэ дукъяослэн быремзылэсь мугзэ но. Нимысьтыз питомник нерге кылдытыны спонсор шедьтысалмы ке, оло, уж умойгес мынысал, шуо. Дукъяосты поттон понна угось йӧнала инкубатор кулэ.

Берло дыре Россиын дукъя будэтонэн вырисьёс йыло но йыло. Ӝог будо, шуо. Кин ке, тэльысь дукъялэсь карзэ шедьтыса, пузъёссэ дораз вае, соосты курег я немыч улэ тыре. Дукъяос ӵемысь сиськыны вунэто. Соин ик соосты дырыз дыръя сюдоно. Ярато кыз но пужым лыс, кускыли. Но тазьы сюдыса, сӥльзы лыс шӧм луэ. Соин ик лысэз воштыны луэ векчи юдэм бакча сиёнэн, ю тысен. Лобӟыса медаз кошке шуыса чаклано. Соин ик гидэз ялан пытсаса возёно. Ӟоскытэз уг ярато — карлэн ӝуждалаез 2 метр ке но мед луоз. Туж кышкасесь, куалекто ке, пегӟиськом кожаса, борддор борды но куддыр пазьгисько.

Виталий Владыкин но Александр Меньшиков верамъя, кыр тылобурдо вордыны разрешение кулэ. Сое пӧйшурасьёслы шугъяськытэк сёто.

Елена Сараматова

Ангелина Снигирева
By Ангелина Снигирева 16 марта, 2020 12:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<