Кызьы Можгалан мынэ «Бадӟым ремонт»

Ангелина Снигирева
By Ангелина Снигирева 5 марта, 2020 17:08

Удмуртилэн Тӧроез Александр Бречалов Можга каре вуылӥз, татын «Бадӟым ремонт» проектъя лэсьтэм объектъёсты эскериз, калыкен пумиськылӥз.

Можгалан ортчем кенешон дыръя
Туспуктӥз: udmurt.ru

Дворецын кадь!

Можгалась 1 номеро нылпи садэ кылем арын гужем гинэ пырыны кышкыт вал: липетъёсысь зор-кот вияз. Сисьмем выж уката но медам быры шуыса, «бӧрдӥсь» вӧлдэт вадьсы бадӟым посудаос пуктылыса возизы. Шуныт вайись гумыос сисьмемын. Укно рамаос быремын.

— Нылпиос понна кышкыт вал: укно доры сузьтӥськозы но, со рамаосыныз валче вылазы усёз шуыса. Пӧлазы угось 1,5 аресъемъёсыз но 6 арессэс тырмытэмъёс но вань. 6 группаын 130 пинал – куддыр чакласа но уд вутты. Асьмеос но укноосты комнатаосты тӧлатон вылысь усьяны, пиялазэс миськыны курдаллямы. Сокем ваньмыз быремын ни вал. Юрт 1954-тӥ арын пуктэмын. Ас вакытаз сое «Свет» завод аслаз ужасьёсызлэн нылпиоссылы ӝутӥз. Соку садэз утялтыса возиз. Отӥяз завод садлэсь куштӥськиз но тупатъян ужъёслы уксё ӧзгес кылды ни, — вера нылпи садэн кивалтӥсь Лариса Гарифуллина

«Бадӟым ремонт» проект улсын садэз выльдыны луонлык сюриз. Нылпиосты сӥзьылысен ар пумозь городысь мукет садъёсы выжтӥзы но кышъяськон борды басьтӥськизы. Озьы быдэсак воштӥзы вӧлдэтэз, укноосты, выжъёсты, электропроводкаосты. Табере татын шуныт, югыт но кӧс. Садлэн азбараз асфальт кисьтӥзы. Оглом выльдӥськонлы ог 20 миллион манет кошкиз.

Туэ январе выль сямен воректэм юртэ вуыса, нылпиос но, анай-атайёс но воксё абдразы. Садзы угось дворецлы укшаны кутскиз. Александр Бречалов котырскиз группаостӥ. Можгаос паймытӥзы Тӧроез метеостанциен. Шаерысьтымы вань нылпи садъёс пӧлысь татын гинэ со ужа. Нылпиосты дышето куазез эскерыны, тӧллэсь кудпала пельтэмзэ, зор-котлэсь кӧня усемзэ чакланы.

Специалистъёсты будэтон

Отӥяз Александр Бречалов дыртӥз агропромышленной колледже. Со арысь аре выльдӥське. Колледжлэн аслаз гаражез вань, студентъёс татын пӧртэм техникаен тодматско. Асьсэлэн гыроно-кизёно бусызы вань. Со сяна, фермер луыны дышетонъя мастерскойзы ужа. Пудо эмъян лабораториенызы ушъясько. Татын дышетскисьёс угось пӧртэм опытъёс лэсьтыло, пудолэсь тазалыксэ эскеро, хозяйствоосы потало. Дӥнязы котьку вазиськисьлэсь пудо-животсэ эскеро-эмъяло. Али колледж Гурт удысъя но сиён-юонъя министерстволэсь грантсэ утӥз, соин лабораторизэс но мастерскойёссэс эшшо но выльдыны быгатозы. Кылсярысь, рентген аппарат, УЗИ-сканер басьтыны медо. Татын али ик Worldskills-лэн куронъёсызлы тупась егит профессионалъёсты кыдато.

— Колледжлэн лабораториосызлы синмаськыса, ми татчы дышетскыны пыримы. Мукет училищеосын практиказэс кытын ортчыны паймо, нош ми татын ик пудо эмъяны дышиськом, — Александр Бречаловлы веразы ветеринарияя ёзын дышетскись студентъёс.

Можгалан рос-прос лыдъяське медучилищезы но. Татын али ог 430 мурт дышетске, нош чакламын со 630 адямилы. Дышетскыны пырыны ӧдъясез лачак, но общежитиын 140 муртлы сяна инты ӧвӧлэн, та троссэ дугдытэ. Со пумысен калыкен пумиськон дыръя Удмуртилэн Тӧроезлы ивортӥзы студентъёс, общежитиез паськытатыны курыса вазиськизы. Александр Владимирович лыдъяны-чотаны оскытӥз. Ваньзэ ӵош огдыре лэсьтыны луонлык соку ик уг сюры угось.

Кулэ миллиардъёс

Александр Бречалов пусъемъя, шаерысьтымы вань соцобъектъёсты тупатъян понна ог 10 миллиард манетлэсь ятыр кулэ. Можгалан туэ апреле Йӧ дворец усьтӥськоз. Чакламын вуэз чылкытатонъя сооружение лэсьтыны – со понна ог 500 миллион манет кулэ. Коркаосы Вало шурысь пырись ву чылкыт ӧвӧл угось. Со сяна, предприятиосысь, коркаосысь лыктӥсь кырсь вуосты чылкытатонъя сооружение лэсьтоно – Можгалан со ӧвӧл. Талы но ог 400 миллион манет кулэ. Та 2 объектъёс борды туэ кутскыны медо. Секыт югдур городысь сюресъёсын. Калык ӝожтӥськемъя, ульча вамен выжон интыос рос-прос лэсьтымтэ, школаос, училищеос котырын соос радъямтэ, тыл уг пишты, таин валче нылпиос поглян улэ сюрыло. Та пумысен югдурез тупатыны куриз Александр Бречалов. Городысен куд-ог гуртъёс доры сюресъёс быремен, автобус рейсъёс пытсасько. Кылсярысь, али автобус уг ветлы Ӟуч Пыӵас гуртозь. Тӧро верамъя, частникен вераськемын ни, рейс матысь дыре усьтӥськоз. Куазь кӧсаз ке, гуртозь сюресэз быдэсак выльдозы — талы чакламын ог 40 миллион манет. Тупатъялозы городысь тротуаръёсты, азбаръёсты. Можга — Вавож сюресэз лэсьтозы.

— Валаськомы, та ӧжыт. Туэ тросгес уксё чакламын Вотка, Сарапул котырысь сюресъёсты тупатыны. Вуоно арысен Дэри, Можга палась сюресъёсты выльдомы. Сюресъёсъя фондын уксё арысь аре йылэ бере, объектъёс но уногес лэсьтӥськозы, — шуиз Александр Бречалов.

Елена Сараматова

Ангелина Снигирева
By Ангелина Снигирева 5 марта, 2020 17:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<