Кун Кенешын Правительстволэн 2019-тӥ арын ужамезлы йылпумъянъёс лэсьтӥзы

Ангелина Снигирева
By Ангелина Снигирева 27 марта, 2020 14:04
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
А. Бречалов
Туспуктэм: udmurt.ru

Визьмазы янгышъёс

25-тӥ мартэ ортчиз Кун Кенешлэн азьвыл ялымтэ 23-тӥ сессиез. Валтӥсез ужпум — Правительстволэн 2019-тӥ арын ужамезлы йылпумъянъёс лэсьтон.

Ортчем арлы йылпумъянъёс лэсьтӥз Удмуртилэн Тӧроез Александр Бречалов. Докладзэ мытыса, со тодэ вайытӥз Россилэн Президентэзлэсь Владимир Путинлэсь Федерал Собранилы верамзэ: «Валтӥсь ужпум — улон-вылонэз ӟечомытон, быдэс странаысьтымы адямиослэн азинскыны огкадь луонлыкъёссы мед луозы». Ӵапак та сярысь ик, шуиз элькун Тӧро, туннэ вераськом. Кутскиз янгышъёс бордысен.

— Сюресъёсты тупатъянын азинсконъёс ӧжыт ӧвӧл, — шуиз Тӧро. — Но синйылтытэк кельтыны уг луы тырмымтэосмес но. Туэ тулыс куазь вошъяськемен, данакез сюресъёс ярантэм луизы. Но тае куазь вылэ гинэ погыльтыны уг яра. Асьмеос но янгыш. Кылсярысь, 55 сюресъёс асфальтэн 1 полэс гинэ шобыртыса кельтэмын вал. Лымыез урод сузямен, шунамезъя со асфальт вискы пичиен-пичиен пыӵаз но сюресъёсты пуш ласянь уродмытӥз. Туэысен кылдытӥм нимысьтыз служба, со чакласа возе, кызьы улос сюресъёсты утялто. Толэзь куспын 2 сюрс пала тырмымтэос шараясько.

Со сяна, быдэстоно ужъёсты азьло ик умой-умой чакланы ум пӧрмытӥське, пе. Кылсярысь, кылем арын подрядчик 16 сюресъёсты волятӥз. Асфальтэн кисьтыны дасяз, но материалъёс ӧвӧлэн ужъёс 2-3 арнялы дугдӥзы. Мукет учыръёсы сюресъёсты тупатъяськом, но светофоръёс, кыллись «полицейскойёс», сюрес дуре пусъёс пуктыны ум дыртӥське. Нош сюрес вольыт, знакъёс ӧвӧл бере, машинаос отӥ ӝог ширъяны кутско. Луо кышкыт шуккиськон учыръёс. Таӵе сюресъёс пӧлы кылем арын сюризы Ижысь Мужвайской урам но Барановлэн ульчаез.

Республикамы «урок» басьтӥз школа пуктонын но. «Артель» компания ӝегатӥз Ижысь Берш урамын но Кезын пуктӥськонзэ. Талы луыса, кылсярысь, Кезысь 1 сюрс 630 пиналъёс тэрытӥськоно луо 920 муртлы чаклам вуж школае.

— Та янгышъёс-тырмымтэос бере одно визь пырыны ку­лэ, — ӝот-ӝот вераз Тӧро. — Табере лэсьтӥськисьёс ужъёссэс 1 арнялы ке но ӝегатыны кутскизы ке, огкылъёс уретэмын луозы.

Кисымы буш ӧй вал

— Элькун бюджет кылем арын чакламлэсь 9 миллиард манетлы йылӥз, 94,416 миллиард манет пала луиз, — пусйиз Тӧро. — Кун 
пунэмъёслэсь процентъёссэс кулэстэмен валче гинэ, 111 миллион манет шыръяськиз, 2020-тӥ арын эшшо ог 127 миллион манет шыръяны быгатом.

Закупкаосъя центр кылдытыса, 3 миллиард манет шыръяськиз. Кылсярысь, Россилэн Президентэныз дэмлам «Тазалыкез утён» нацпроект чотын нылпи больницаослы 14 цифровой рентген-комплексъёс басьтэмын. Закупкаосты центр пыр радъямен, 40 миллион манет шыръяны луиз — одӥг комплекслэн дуныз 9,4 миллион манетысен 6,6 миллионозь усиз.

Элькун казналэн расход люкетэз ог 12 миллиард манетлы йылӥз но 96,47 миллиард манет луиз. Лыдпусъёс будӥзы, национальной проектъёс пыӵатӥськемен но школаосты, нылпи садъёсты, больницаосты, культурая юртъёсты тупатъямен. 
Бюджетысь 72 процентэз, ог 68,6 миллиард манетэз, кошкиз социальной удыслы. Национальной проектъёслэн огъя дунзы 16,655 миллиард манет луиз.

Кытчы кутоно элькун бюджетысь уксёез — выль проектъёслы луыса мылкыдзэс вераны быгато шаерамы вань улӥсьёс.

Одӥгез сыӵе проект — «Интыосысь кичӧлтонъёс». Ар ӵоже калыклэн 83 кичӧлтонъёсыз улонэ пы­ӵа­зы, бадӟым люкетэз герӟась­кемын сюресъёсты, калык шутэтскон интыосты выльдонэн. Огъя дунзы ог 70 миллион манет луиз. Туэ та проектлы 3 поллы тросгес уксё висъяны чакламын.

Элина Кумачева


Ангелина Снигирева
By Ангелина Снигирева 27 марта, 2020 14:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<