Куалектыны мугез ӧвӧл

Ангелина Снигирева
By Ангелина Снигирева 26 марта, 2020 13:47

«Огъя Россия» партилэн «Калык контроль» проектаз пыриськисьёс та нуналъёсы вуылӥзы Ижысь куд-ог магазинъёсы. Эскеризы, тырмыт-а сиён-юон, ӧз ӝутске-а дунъёс.

Идысь сиён-юонэн лавкаез эскерон
Туспуктӥз Олег Ларин

Коронавирусэн йырин калык куалектӥз, Ижысь куд-ог магазинъёсын бушазы кеньырен, сакырен, туалет кагазэн ӝажыос. Югдурез чаклан вылысь партиецъёс вуылӥзы Коммунаръёслэн но Пушкинской урамъёсысь «Магнит» но «Пятёрочка» магазинъёсы — таос федерал сетьлэн лавкаосыз луо, озьы ик эскеризы Киров ульчаысь улосамы гинэ вуз карись «Гастроном» магазинэ.

«Магнитэ» эскерисьёс вуизы 10 час котырын. Магазинын ужасьёс ӵапак соку ӝажыос вылэ пуктыло вал пӧртэм кеньыръёсты. Толон, пе, магазинзы пытсаськон азьын дунтэмгес кеньыръёсты басьяса быдтӥзы, нош вуз вуттӥсь машиназы, пе, ӝыны час талэсь азьло гинэ вуиз. Та магазинлэн кивалтӥсьёсыз ватсазы на: «Магнит» сетьлэн Ижын логистической центрез вань, отысь вузэз вутто-люкыло элькунысьтымы ваньмаз «Магнитъёсы» — сиён-юонэн, пе, со вӧлдэтозяз тырмытэмын, шаерысьтымы вань калыкез 3 толэзьлэсь ятыр сюдыны тырмоз.

В. Девятов

«Огъя Россия» партилэн «Егит гвардия» огазеяськонэзлэн Удмурт ёзэныз кивалтӥсь Вячеслав Девятов:

— Ми но, егит гвардеецъёс, чакласа возиськомы югдурез. Калык пӧлын валэктон уж нуиськомы, коронавирусэн йырин куалектоно, урмыса кадь сиён-юон басьяно ӧвӧл шуыса — ваньмыз тырмыт. Калыклэсь вазиськонъёссэ кутыны усьтӥмы пӧсь линия: (3412) 23-28-00 номеръя жингыртыса, котькуд адями вераны быгатоз, кыӵе лавкаосын ӝажыос бушамын, кудаз дунъёс ӝутэмын.

Пушкинской урамысь «Пятёрочка» магазинын ӝажыоссы сиён-юонэн тырмытэмын, дунъёс воштӥськемын ӧвӧл. Магазинын ужасьёс пусйизы: берло нуналъёсы калык, зэм но, тросгес кеньыр-сакыр басьяны кутскиз. Огезъя мукетыз. Но куалектыны мугез ӧвӧл: складъёсамы, пе, товармы-сиёнмы тырмыт. Вуз карисьёсты мукетыз сюлмаськытэ: коронавируслэсь кышкаса, сиён-юон уз тырмы шуыса, калык али басьяськоз, нош бӧрысь сиёнэн тырмытэм ӝажыос котыртӥ уз ик ветлы ни, сиён изъянмоз, магазинлэн табышез усёз.

Лавкаосын чылкытлык сярысь сюлмасько
Туспуктӥз Олег Ларин

«Гастроном» магазинын ымныразы маскаосын, киосазы перчаткиосын но дезинфекция ортчытон суретъёсын адямиос. Кудыосты, ӧс кутонъёсты таос рос-прос ӵушыло. Та магазинлэн кивалтӥсезлэн воштӥсез Елена Никитина вераз: февральлэн кутсконаз ик кутским ни лавкамес антисептикъёсын миськыны-утялтыны. Коронавируслэсь ум кышкаське ке но, солэсь утиськон амалъёс мултэс уз луэ. Сиён-юонзы «Гастрономын» тырмыт, одӥг ӝажы но буш ӧвӧл. Дунъёс но азьвыл кадесь ик.

З. Елизарова

Пичи Пурга ёросысь Гожня гуртын улӥсь Зинаида Елизарова:

— Гуртысьтымы но, ёрос центрысьтымы но лавкаосын ваньмыз вань — уксёед гинэ мед луоз. Ӧй шӧды, калык визьтэммыса мед басьяськоз шуыса. Коронавирус алямлэсь мон уг кышкаськы, золгес сюлмаськыто монэ сэр, сюлэм висёнъёс, лек пыктос.

Со вискын син шорам йӧтӥз мӧйы нылкышно: кудыяз 5 пуйы гречневой кеньыр, 3 пуйы сакыр понӥз. Юасько: семьяды туж бадӟым шат, сомында кеньыр-сакыр басьтыны малпаськоды? Любовь Андреевна: улӥсько, пе, огнам, нылпиосы но, внукъёсы но палэнын, Иже ӵем уг вуыло. Коронавируслэн йырин, пе, оло котькытын карантин ялозы. Магазинэ, калык пӧлы мултэссэ потано медаз луы шуыса, кеньыр но сакыр, пе, запасэн басьтоно кариськи.

«Калык контроль» проектлэн координаторез, Кун Кенешысь Гурт удысъя, музъем кусыпъёсъя, инкуазь узырлыкъёсъя но инкуазез утёнъя ялан ужась комиссилэн кивалтӥсез Владимир Варламов шуиз:

Ӝажыос бушесь ӧвӧл
Туспуктӥз Олег Ларин

— Калык куалектэменыз огезъя мукетыз басьяське. Но кышкало юнме. Адӟиськомы, магазинъёсын ӝажыос сиён-юонэн тырмытэмын, дунъёс но ӝутэмын ӧвӧл. Удмурт шаерын сиён-юон тырмыт. Калыклы вазиськеме потэ, сиён-юон ласянь юнме медаз куалектэ.

Элькунысьтымы промышленностья но вуз каронъя министрлэн воштӥсез Ольга Чепурина ватсаз на: тырмыт-а лавкаосын сиён-юон, ӝутско-а дунъёс — тазэ Промышленностья но вуз каронъя министерство нуналлы быдэ чакласа возе. Та ласянь элькунамы нокыӵе шуг-секытъёс кылдэмын ӧвӧл. Дунъёсты ӝутон учыръёс луизы ке, та ужпумез сэрттон борды ӝегатскытэк басьтӥськоз Монополиосын нюръяськонъя федерал служба.

Елена Никитина

Ангелина Снигирева
By Ангелина Снигирева 26 марта, 2020 13:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<