«Корсар»: ӟеч пиратъёс но 32 фуэте

Ангелина Снигирева
By Ангелина Снигирева 27 марта, 2020 16:19

3 нунал ӵоже Операя но балетъя театрын ортчиз «Корсар» балетлэн премьераез (12+).

«Корсар» балетысь суред
Туспуктӥз Анастасия Шумилова

Етӥз пиратъёс, чебер грек нылъёс, яркыт декорациос, ӝог эктонъёс… Геройёсын ӵош учкисьёс зарезьын сильтӧллэсь пегӟо, лагунае но варнылъёсын (рабыня) вуз каронъя базаре, корсаръёслэн гротазы но гареме сюро. Спектакль ӵоже декорациос кӧня ке пол вошъясько, сцена вылэ огдыре маке мында артистъёс поталляло — ваньзы шукырес дӥсен пӧрмытскемын.

«Корсар» балетын пиратъёс — эрикез яратӥсь, кышкасьтэм воргоронъёс. Валтӥсь герой Конрад — ӟеч сюлмо, йӧно пиосмурт — грек нылмуртлы Медоралы синмаське. Конрад но мукет корсаръёс Сеид-пашалы но адямиосын вуз карись Исаак Ланкедемлы пумит султо, Медоралы но мукет грек нылъёслы пегӟы-ны юртто. Вань шуг-секытъёс пыр ортчыса, яратӥсь сюлэмъёс пумаз огазеяськозы.

«Корсар» балетлэсь крезьгурзэ 1856-тӥ арын гожтӥз француз композитор Адольф Шарль Адан. Англиысь Джон Байрон кылбурчилэн «Корсар» поэмаез вылэ пыкъяськыса, либретто гожтӥз француз драматург Жюль Анри Вернуа де Сен-Жорж. «Корсар» дуннеысь огез тодмо но дано классической балет луэ, бадӟым сценаос вылысь уг кошкылы. Россиын сое нырысьсэ пуктӥзы 1963-тӥ арын Санкт-Петербургысь Мариинской театрын.

Балетмейстер Николай Маркелов верамъя, Ижысь Операя но балетъя театрын, 
классической постановкаосты дасяку, Мариинской театрлэсь адӟем каро. Озьы ке но котькуд спектакль аспӧртэм пӧрме. Кылсярысь, балетэ «Райская птичка» эктон ватсамын вал. Н. Маркелов пусъемъя, вуз карон интыын ортчись сцена азьын солисткалы нимысьтыз номер пуктӥзы, вань артисткаос дӥсьсэс воштыны мед вуттозы шуыса. Эшшо сценаез ӝог-ӝог вошъяны кулэ. Сценографъёс но художникъёс «Корсарез» ярато — паймымон декорациос, син мальдымон чебер дӥськут дасяло.

— Та спектакль бордын берло 2 арзэ ужаськомы ини, шуыны луоз, — вера Н. Маркелов. — Нимысьтыз номеръёсты оген-оген пуктылӥмы. Кылем арын гужем быдэсак дасяны ӧдъямы. Эктӥсьёс понна та огез секыт балет луэ — хореографиез йӧспӧртэм. Кылсярысь, Медора героиняез шудӥсь солисткаослы 32 фуэте быдэстоно. Балетэ быдэс труппа пыриське, ог 40 кышномуртъёс, 25 воргоронъёс. Куд-ог мизансценаосын хорысь артистъёс но юрттӥсько. Озьы ик Культурая элькун колледжысь дышетскисьёсты но сцена вылын адӟыны луэ.

Классической спектакльёсты Операя но балетъя театрын пукто, валтӥсь рольёсы Казаньысь яке Москваысь дано артистъёсты чортыса. «Корсар» — палэнысь ӧтем артистъёстэк дасям нырысетӥ постановка. Со возьматэ: театрлэн труппаез дась секыт спектакльёслы, пусъе Н. Маркелов.

Та вакытлы Операя но балетъя театр ужа: спектакльёс мыно, «Корсаре» матысь дыре билетъёс ӧвӧл ини. Куд-ог спектакльёсты мукет дырлы выжтоно луизы ик.

Анастасия Шумилова

Ангелина Снигирева
By Ангелина Снигирева 27 марта, 2020 16:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<