История — огъя сюлмаськон

Ангелина Снигирева
By Ангелина Снигирева 23 марта, 2020 16:42

Быдӟым Вормонлы 75 ар тырмонэн валче элькунамы ожлы сӥзем памятникъёс выльдӥсько. Та понна интыосысь кивалтӥсьёс кыл куто, но уже мыло-кыдо пырисько ёросъёсысь но городъёсысь калык, хозяйствоос но предприятиос.

Пичи Пурга ёросысь Гожня гуртысь мемориалэз утялтыса возё 6-тӥ классын дышетскись пиналъёс.
Туспуктӥз Максим Егоров

Пичи Пурга ёросысь Уром муниципал кылдытэтын 16 гурт, 7-аз памятникъёссы вань. Соосты арлы быдэ выльдо, буяло, котырзэс утялто. Муниципал кылдытэтысь талы уксё висъяське, со сяна, гуртоос асьсэос но ужаны потало, кенеше люкаськыкузы, малпасько, мар матысь дыре кароно луоз.

Пичи Пурга ёросысь Гожня гуртын 2016-тӥ арын выль мемориал пуктӥзы. Сое лэсьтыны юрттӥз ёросысь ужбергатӥсь Павел Чушъялов, нош буре ваён плита пуктыны уксё висъяз муниципал кылдытэт.

— Таӵе плитаос вань на кылдытэтысьтымы Эгра, Бажан, Карашур, Каймашур гуртъёсын, — вера Уром кылдытэтлэн йырыз Пётр Коровин. — Каймашурысь калык буре ваён плита ас кужыменыз пуктӥз. Туэ Гожнялась плитае выль нимъёс ватсаны малпаськом. Ожгарчиослэсь нимъёссэс люканы школа но ветеранъёслэн кенешсы юртто. Гожнялан озьы ик усьтэмын буре ваён аллея — дуртӥз пужымъёс мерттӥм.

Гожнялась памятник школа вӧзын сылэ. Сое утялтыса возё 6-тӥ классын дышетскисьёс. Толалтэ лымы сузяло, куазь кӧс дыръя котырзэ утялто, ӵужисько.

— Памятникез утялтоно, малы ке шуоно со тодамы вайытэ асьме гуртмы понна ожмаськем прадедушъёсмы сярысь, — вера 6-тӥ классын дышетскись Марина Михайлова. — Плита вылын пересь песятаелэн но нимыз вань. Со сярысь мыным анай-атае вералляло. Иван Михайлович Михайлов война кутскон азьын колхозын ужам, гуртын самой грамотной адями вылэм. Собере войнае кошкем. Гуртамы нырысетӥез похоронка солэсь вуиз.

Дышетӥсьёс сюлмасько, пиналъёс война, ожгарчиос, ветеранъёс сярысь мед тодозы шуыса. Тулыс проектъёслы сӥзем арня ортчытыны ӧдъяло. Директорлэн воштӥсез Екатерина Власова вера:

— Пиналъёс, кӧня ке группалы люкиськыса, ужалозы. Огез группа памятник котырез чылкыт возён, чебергес карон бордын тыршоз. Мукетыз буре ваён книгаез дасялоз, пиналъёс тодэ ваёнъёсты, туспуктэмъёсты люкалозы. Со сяна, Вормон Нуналэз пусъёнлы сценарий гожтозы.

Элькунамы али 968 памятникъёс, буре ваён объектъёс лыдъясько. 2019-тӥ арын 292 мемориал выльдэмын вал. Та нуналлы шаерысьтымы эшшо 284 памятникез матысь дыре ик выльдоно. Элькунысь бюджет талы 68 миллион 500 сюрс манет висъя. Удмуртилэн Тӧроез Александр Бречалов проектъёсты, сметаосты дасяны косӥз. Со шуиз: «Интыосысь кичӧлтонъёс» проектэ келям куриськонъёс пӧлысь нырысь ик быръёзы памятникъёсты выльдонэн герӟаськемъёссэ.

Анастасия Шумилова

Ангелина Снигирева
By Ангелина Снигирева 23 марта, 2020 16:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<