Егитъёслэсь бере уг кыльы

Ангелина Снигирева
By Ангелина Снигирева 25 марта, 2020 17:29
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Эгра ёросысь Зура черкогуртысь Римма Корепанова пичиысен куасэн нискыланы яратылӥз. Таза улонэн эшъяськемысь ӧз дугды туннэ нуналозь.

Эгра ёросысь Зураысь 
70 аресъем Р. Корепанова нуналлы быдэ куасэн ветлэ.

70 аресъем нылкышно нуналлы быдэ куасъёс вылэ султэ, ог 10-12 иськемез ортче.

— Зурамы пуме туж чебер трасса лэсьтӥзы, — шумпотэ Римма Анатольевна. — Куасэн бызьылыны сюрес лёгемен ӵош тренажёръёс но пуктылӥзы. Табере отысь калыкез уг бырылы, уката но трос потало егит пенсионеръёс. Мон соос пӧлын анай кадь ветлӥсько ни. Но бере кылеме уг поты ай. Вис карисько ке, юаськыны кутско: кытчы толон ышылӥд?

Лымы тани-тани шуналоз шуыса, Римма Анатольевна чик уг кӧбера вылэм. Куасэн нискыланы ӧз луы ни ке, пыдын бызьылыны потало, пе. Эшшо великез вань. Питранъёс вылын озьы ик нуналскын ог 10-12 иськемез ортче. Нош пыдын бызьылыны, ӝог ветлыны куддыр 2-3 иськем но тырме, пе. Озьы Римма Анатольевна мыло-кыдо пыриське ёросын ортчылӥсь куасэн но пыдын бызьылонъя пӧртэм ӵошатсконъёсы.

— Но ӵошатсконъёсын вормонъёс басьтон вылысь озьы уг выриськы, — шуэ нылкышно. — Ки-пыдъёсме уг посӥськы ке, кемалась ӧй сиськы ни кадь потыны кутске. Мугор ачиз куре.

Римма Анатольевна Володя кузпалыныз гинэ улэ. Кыкназы но — та ёросысь ик — Квардавозьысь. Соос быдэс улонзэс колхозлы . Нылкышно кунян но, парсь но сюдӥз, скал но кыскиз. Нош мужикез азьмынӥсь механизатор вал, Ужын Слава орденэн, медальёсын пусъемын.

Корепановъёс 45 ар ӵош уло ни. Котькыӵе вакытъёсмы вал, шуо. Но ог-огзы вылэ куатаськыса, ог-огенызы вераськытэк улылэмъёссы ӧй вал, пе. Римма Анатольевна аслэсьтыз но, кузпалызлэсь но анайзэ берпуметӥ нуналозязы утялтӥз — огез 90 аресозь, мукетыз 79 аресозь улӥзы.

— Одӥг-ог соосын валамтэос потылӥзы ик, но пумитазы ноку ӧй вазьылы, — вера кышномурт. — Йырме ошисько но кыре потӥсько вал. Буйгатскемзы бере пырисько, тупаськом. Копаськон нокинэ ноку ӟече ӧз вутты на. Собере, анайёсмы милемлы туж юрттӥськылӥзы. Одӥгеныз но нылпиеным декретын ӧй пукы — соослы куштыса кельтӥсько вал. Котьку но трос пудо вордылӥм, скал-кунянъёслы но, чипы-куреглы сиён дасяло вал — дасьсэ сётыны кема ӧвӧл ни ук.

Корепановъёс 4 пинал вордӥзы: 3 ныл но 1 пи. Зэм, Альбина нылзы егитысен улонысь кошкиз. Нош кылемъёсыз табере асьсэос семья кылдытӥзы, 6 нунокъёсын, 2 правнукъёсын шумпоттӥзы ни. Соос пичиысен адӟыса будӥзы, семьяын ог-огед сярысь сюлмаськыса, ог-огедлы юрттыса улоно шуыса. Соин ик али маке ужано-а, шулдыръяськоно-а — ури-бери вуо мумы-бубызы дӥне. Эмеспиоссы но, кензы но асьсэя ик шедизы, пе, нимазъяськыса уг уло.

— Шуныт кылын но, кузьымъёсын но пиналъёсмы ялан шумпотто, — азинтэ веранзэ Римма Корепанова. — Туэ тани куасэн нискыланы дӥсь нош ик кузьмазы. Вал ини со мынам, но нылпиосы лыдъязы, вылезлы воштоно ни шуыса. Сюлмасько ке, сюлэм шумпотэ. Пиналъёс ӟечесь ке, нылкышнолы солэсь бадӟым шуд ӧвӧл ни, малпасько.

Римма Анатольевналэн спортэн эшъяськон мылкыдыз уката зол паласькем Ольга нылызлы. Ольга Владимировна табере арысь аре пыриське шаерысьтымы гурт спортсменъёслэн шудонъёсазы, сьӧраз кыскиз Маша нылзэ но.

Элина Кумачева

Ангелина Снигирева
By Ангелина Снигирева 25 марта, 2020 17:29
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<