Дор палъёслэн кӧкыязы

Ангелина Снигирева
By Ангелина Снигирева 17 марта, 2020 14:46

Удмурт кун университетэз йылпумъямез бере Светлана Белослудцевалы киыз но пыдыз вал кадь Иже кыльыны — тросэз ӵош дышетскем эшъёсыз интызэс шедьтӥзы шоркарын. Нош со бырйиз вордскем Кез палъёссэ, дышетон удысэз.

С. Белослудцева Юлия нылыныз

Гуртэ берытскон

90-тӥ аръёсы школаын дышетӥсьёслы уждун тыремысь дугдӥзы, визьнодасьёслэн данзы усьыны кутскиз. Озьы Светланалэн ӵош дышетскем эшъёсыз пӧлысь кин кытчы интыяськиз — школае ӧз мынэ. Светланаез но индылӥсьёс сюризы: тон мар, сыӵе визьмыныд, быгатонлыкъёсыныд берен Кез палъёсад берытскод-а?

Но со ӧз ӝабырскы город борды. Аслаз дышетскем школаяз, Гыяын инты ӧй вал, ӧтизы артысь Александрово школае. Ӟуч кылъя но литературая, англи кылъя дышетӥсь луыса ужаны кутскиз, классэн кивалтӥсь каризы на — 5-тӥ классэз сётӥзы. Озьы визьнодасьлэн огсыр улонэз кутскиз.

— Уждун толэзьёсын ӧз тырылэ, Гыяысь Александровое вуыны автобусэ билетлы но пунэмаськоно луэ вал, — тодаз вае дышетӥсь. — Но та удысэз бырйи шуыса, ноку но ӧй жалялля, берло но та выллем малпанъёс йырам ӧз лыктылэ.

Ма, Светлана дышетӥсь луыны ик вордскем но, вылды. 1-тӥ классэ со лыдӟиськыны, гожъяськыны быгатыса мынӥз ни. Юромо талы сое нокин ӧз дышеты — ачиз каллен выриз. 2 ареслы бадӟымгес агаез вал — анаез солы урокъёссэ лэсьтыны юрттылӥз. Котыразы веръяськылӥз (бергаз) Светлана но. Али пайме: англи кылъя учебник мышкын словарь вал, сое, ачиз номырзэ валатэк, быдэсак тетрадь вылэ переписать кариз.

Школае мынэмез бере Светланаез лябгес дышетскись нылпиос вӧзы пуктылӥзы но лыдӟиськыны дышетыны курылӥзы. Нош шор классъёсы вуэмез бере нылаш урокъёс нуылэ ни вал. Светлана уката ик яратылӥз сочинениос гожъяны. Сочинениоссэ дышетӥсьёссы бадӟым классъёсын дышетскисьёслы лыдӟыло вал.

Школаез йылпумъякуз, Светлана Белослудцеваез биологиен дышетӥсьсы биологе, математиксы математике мыныны дэмлало вал. Но вормиз удмурт кылъя но литературая дышетӥсьсы — со вакытэ Глазовысь пединститутын удмурт факультет ӧй вал бере, Светлана мынӥз УдГУ-ысь удмурт филологияя факультетэ. Адӟем карымон дышетскиз.

Зэм, удмурт кылъя урокъёс нуыса, Светлана Николаевна озьы ик ноку ӧз вутты — школаязы та предметъя визьнодасьсы вал. Собере кема ик дыр ӧз ортчы — завуч луиз.

Удмурт сэрег

Светлана Белослудцева огвакытэ 2 арзэ Гыя администрациен кивалтӥз, сомындагес ик ужаз ёросысь дышетонъя управлениын.

— Собере ёросысь кивалтӥсьёс шуизы: директор луыса мынод Александрово школаяд ик, — тодаз вае Светлана Николаевна. — Озьы директорын ог 10 арлэсь ортчемзэ валаса но ӧй вутты кадь. Уж уй но, нунал но уг быры, отпускъёсты адӟоно ӧвӧл. Школае кызьы сумкаен но бадӟым пакетэн лыктӥсько — озьы ик кошкисько: директор луэм сяна, ӟуч кылъя но литературая урокъёсылэсь ӧй куштӥськылы. Урокъёслы дасяськыны, тетрадьёсты эскерыны дыр дорын гинэ шеде. Урокъёсты ялан одӥг кадь уд ортчыты ук.

Светлана Белослудцевалэсь азьло Александрово школаен кивалтӥз Надежда Трефилова — со зол хозяйственник вал, школа понна трос лэсьтыса вуттӥз. Но выль кивалтӥсьлы но уж сюриз. Быдэс республикамы тодэ: Александрово школаысь пиналъёс туж эшъясько спортэн. Эшшо отысь вань пиналъёс дышето удмурт кылэз — ёросын таӵе школаос ӧвӧл ни.

— Удмуртлыкез юнматонмес кутским музеймы бордысен, собере усьтӥм шутэтскон сэрег — школамылэн одӥг сэрегаз ӟус пуктӥм, удмурт шӧмъем штораос ошылӥм… Туж потэ на, вань дышетӥсьёсмылэн но, пиналъёсмылэн но удмурт дӥсьёссы мед луозы шуыса.

Оло, куке та малпанзы улонэ пыӵалоз ик. Угось Александрово школаын котьмалы амал шедьто. Кылсярысь, школаысь штораоссэс вошъязы, макулатура бичаса. Азбарзы тулысысен сӥзьылозь розаос пӧлы вые — асьсэос ик выжыято соосты. Табере 
выпускникъёссы но котькуд ар выль розапуд школалы кузьмало — озьы азбарзы арысь аре чебергес но чебергес луэ.

— Школаын директорын ужатозям, олокин но луыса вуттӥ, — азинтэ веранзэ Светлана Николаевна, — спортсменка но вал, кырӟась но луи. Школаямы коллективмы туж умой — ваньмы одӥг кыткетын ужаськом.

Ӝажыын — история

Кемалась ӧвӧл Светлана Белослудцевалы выль уж ӵектӥзы — ёросысь архивен кивалтыны. Таиз но ужез тунсыко потэ — быдэс ёрослэн историез ӝажыосысь папкаосы тыремын. Бадӟым люкетэз документъёс электрон амалэ выжтымтэ на, та бордын ужано луоз, пе. 2019-тӥ арын ортчытӥзы ёроссылы 90 ар тырмонэз. Таин валче уно документъёсты бугыръяно луиз. Соос вылэ пыкъяськыса ик, котькудӥз сямен муниципалитет выставка дасяз.

— Бугыръяськонъям ик Кез ёросамы потӥсь «Звезда» газетамы печатласькем гожъямъёсме шедьтылӥсько ни, — вера С. Белослудцева. — Уката но школамы сярысь гожъяны туж яратӥсько вал.

Дышетон удысысь С. Белослудцева воксё ӧз кошкы — арняяз одӥг пол ветлэ на Александровое. 10-тӥ но 11-тӥ классын дышетскисьёслы ӟуч кылъя но литературая урокъёс нуэ. Визьнодам пиналъёсыз олимпиадаосын, ЕГЭ-ын ӟечесь тодон-валанъёссэс возьмато. Исследовательской ужен мыло-кыдо выро. Кылсярысь, Светлана Николаевна али туж тунсыко уж борды басьтӥськем: эскере, кызьы ӟучъёс вераськоназы удмурт кылъёсты куто. Та уже нылпиосты но кыске. Трос тунсыкозэ люказы ни. Кылсярысь, ӟучъёслы уката кельшо, пе, «чебер», «майбыр» кылъёс.

Табере С. Белослудцевалэн Юлия нылыз но школаын ужа ни — Александрово школаын ик ӟуч кылъя но литературая урокъёс нуэ, анаезлэн пытьыостӥз вамыштэ.

Светлана Белослудцева, гуртэ берытскыса, ӧз янгыша. Дор палъёсыз жадёнзэ но веськато, азинсконъёсызлы но сюлмысь шумпото кадь.

Элина Кумачева

Ангелина Снигирева
By Ангелина Снигирева 17 марта, 2020 14:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<