«Гурт адями – 2019» вожвылъяськон йылпумъяськиз!

Ангелина Снигирева
By Ангелина Снигирева 5 марта, 2020 09:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Конкурсын вормизы Ольга Соловьёва, Любовь Хохрякова, Марина Морякова.

Арлы быдэ та конкурсмы маин ке но паймытъя, кыӵе ке рекордъёс пуктэ. Туэ но азьвылъёсызлэсь висъяськиз. Таяз рад вожвылъяськонэ 18 ёрос пыриськиз, 38 адӟем карымон мурт ӵектэмын вал. Тамында вожвылъяськисьёс 8 ар ӵоже ӧй на вал.

Шумпотымон: туэ конкурсэ пыриськизы азьвыл аръёсы вужерегес кылем ёросъёс но. Кылсярысь, Дэбес ёросысь Четкер но Шудӟялуд гуртъёсын улӥсьёс Любовь Хохрякова депутатсэс ӵектӥзы. Дэбесъёс кинюртэмъёсын но Интернетын куараос люканы зол выризы. Соос ик «Ӟеч сюлэм» номинацие пыриськем 13 мурт пӧлын вормизы, ог 40-50 куаралы гинэ азьпалтӥзы алнашъёсты. Озьы ик вожвылъяськонэ нырысьсэ итӥськизы Красногорск ёросысь лыдӟисьёсмы. Соос ӵектӥзы «Заря» хозяйствоен кивалтӥсез Николай Ключеровез.

О. Соловьёва вормиз «Устоез кивалтӥсь» номинациын

Тужгес трос — 6 муртсы — сярысь Удмурт дунне тыр веразы Глазов палъёс. Уйпал ёросъёсы ӵем вуылыны уг кылды. Нош отын сомында адӟем карымон адямиос! Уката паймытӥзы «Выжыоссэ утись» номинацие ӵектэмъёс — Глазов ёросысь гинэ 4 адями вожвылъяськиз. Глазовысь шаерчиос асьсэ коже гинэ сям-йылолъёсты, историез утьыны уг тыршо, котырысьтызы адямиослэсь выжыоссэс утчан мылкыдзэс бугырто, асьсэ кадь ик мыло-кыдоосты клубъёсы огазеяло.

Паймытӥзы Эгра ёросысь адямиос. Соос ёрос администрацилэн йырызлэн воштӥсез Ольга Соловьёва понна 1556 муртлэн кинюртэмъёсыныз огъя список келязы. Таӵе кузь кинюртэмъёс ми доры вуизы нырысьсэ. Соос ик юрттӥзы эграослы «Устоез кивалтӥсь» номинациын 100 куаралы гинэ азьпалтыны Сьӧлта ёросысь Югдон школалэсь директорзэ Алефтина Григорьеваез.

Л. Хохрякова вормиз «Ӟеч сюлэм» номинациын

Конкурслэн берпуметӥ нуналаз редакцие пыраз Шаркан ёросысь «Восход» но «Ошмес» гурт хозяйствоосысь валтӥсь бухгалтер Григорий Хохряков. Егит воргорон кияз зӧк папкаен вуиз — атаез, Анатолий Хохряков, понна кинюртэмъёсын 927 куара ваиз. Адӟем карымон кивалтӥсьсы понна дурбасьтыны итӥськизы шарканъёс быдэс ёросэн. Нялтас вераса, Шаркан ёросысь «Удмурт Кенешлэн» ёзэз «Гурт адями» конкурслэн котькуд номинацияз адямизэ дэмлаз.

— Атае конкурсэ ӵектэмын шуыса, газетъёсысь, вотэс бамъёсысь адӟи, милемлы со шӧдтэк шорысь ӟеч ивор луиз. Быдэс хозяйствоен куара бичан борды кутскимы, бумагаос киысь кие ветлыса, куд-огез курмылэмын но, вождэс эн вае, — вераз егит бухгалтер.

Шумпотоно Кияса ёросысь Вуж Салья гуртысь лыдӟисьмы Марина Морякова понна. Со вожвылъяськиз «Выжыоссэ утись» номинациын, татчы тужгес трос 15 мурт ӵектэмын вал. Ӧй вал, дыр, одӥг но поселение, школа, клуб, кытын аспал муртсы понна кинюртэмзэ ӧз сётэ. Марина Морякова арлы быдэ асьсэ палась адямиоссэс конкурсмы пыр данъялляз, нош та рад киясаос удмурт нылкышноез ассэ вожвылъяськонэ дэмлазы. Кинюртэмъёсын списокен гинэ соос 1 сюрс 344 куара бичазы, Интернетысь куараосты ватсаса, киясаос вормисе потӥзы. М. Морякова понна дурбасьтыны курыса, иворъёс потӥзы ёрос газетын, куара сётон борды итӥськизы ёрос администрациын ужасьёс но.

М. Морякова вормиз «Выжыоссэ утись» номинациын

Можга ёросысь Трактор но Александрово гуртын улӥсь, Якшур-Бӧдья ёросысь мукшиос, Сьӧлта ёросысь югдонъёс быдэн 2 адямизэс ӵектӥзы. Нырысьсэ вожвылъяськонэ пыриськизы ӟучъёс но поръёс – озьыен, конкурслэн даныз арысь аре будэ.

«Гурт адями» луон понна споръяськон пӧсь пӧрме ке но, адӟиськом, макем огазея вожвылъяськон гуртоосты. Куара люкан понна огкылысь вань гурт калык ӝутӥське, котькудӥз ӵыжы-выжыоссэ, тодмооссэ та уж борды кыске уго.

Озьыен, «Гурт адями-2019» конкурсын вормисьёс Ольга Соловьёва, Любовь Хохрякова, Марина Морякова. Та адямиос данъямын луозы нимысьтыз ужрад дыръя. Со ортчоз май толэзьлэн пумаз, отчы ӧтемын луозы конкурсэ вань пыриськемъёс.

Ангелина Снигирёва

Ангелина Снигирева
By Ангелина Снигирева 5 марта, 2020 09:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<