Гурзылэсь кепырало

Ангелина Снигирева
By Ангелина Снигирева 27 марта, 2020 15:47

Дэри ёросысь культурая юртъёс пӧлысь чиньыен лыдъямонэз гинэ пулэсь кылемын на, одӥгез Сизьгуртын сылэ. 20 арлэсь кема отын ужа ни Елена Симакова.

Е. Симакова
Туспуктӥз Валентина Емельянова

Городын вордскем но будэм нылаш гуртын улоз шуыса ӧз но малпа вал, дыр. Егит дыръяз, гуртын улӥсь песянай-песятайёсыз доры бертылыкуз, пияшлы синмаськем. Озьы со, Удмурт кун университетысь Искусствоосъя но дизайнъя институтэз йылпумъяса, гуртэ лыктӥз. Нырысь аръёсаз гурт улон секытэн сётскем. Тужгес но курадӟылэм гур эстыны, но пумен дышиз. Нош гуртысь клубе ужаны интыяськыса, та быгатонлыкез туж иназ луиз.

— 2014-тӥ арын клубмылэсь 50 арзэ пусйимы, — шуэ Елена Симакова. — Ӝыны даур шуиськомы ке но, та юрт солэсь но вужгес лыдъяське. Вайиллям сое 1958-тӥ арын Балтач гуртысь.

Юбилейзэ пусъён азьын клублэсь укнооссэ, липетсэ, ӧссэ выльдӥзы. Табере со эшшо уно аръёссэ сылоз на. Та клубын бадӟым фойеез, концерт учкон залэз но специалистлэн кабинетэз вань. Юртэз пуэн эсто. Гуръёс вань залъёсын сыло. Кезьыт дыръя конвекторъёс юртто.

Клубе пырасьёс нуналлы быдэ уно люкасько. Мылкыд карисьёс теннисэн шудо. Фойеысь одӥгез сэрег библиотекалы пӧрмытэмын. Азьвыл аръёсы Елена Семёновна книгаосты Изгурт библиотекаысь нуллӥз. Табере толэзьлы быдэ ёросысь библиобус вуылэ, но клубысь книгаосты но лыдӟисьёс уг бырыло. Куд-огез дорысьтызы книгаоссэс ваё, «Юртты гуртоослы книгаен» проектэ пырисько.

— Дӥнямы пӧртэм ужрадъёс ортчо, — шуэ Елена Семёновна. — Арняяз быдэн одӥг пол люкаськыло егит семьяос, нылпиос но арлыдоос. Семьяос понна йогая кружок ужа. Отчы ӵемгес ветло егит анайёс. Соос клубе пичи нылпиосынызы пото. Анайёс мугорзэс куасаллян вакытэ нылпиоссы суредаськыны, кырӟаны-эктыны дышетско. Школае ветлӥсь нылпиос понна эктонъя кружок ужа. Нош арлыдоос, сӥзьыл бакча ужъёссэс йылпумъяло ке, «Кибашлыос» клубе люкаськыло.

Елена Симакова нимысьтыз тау каре Лидия Игониналы. Лидия Александровна туж капчи мылкыдо, пе, ужрадъёсы мыло-кыдо пыриське, быгатонлыкъёссэ сценкаосын возьматэ, гуртысь арлыдоослэн кенешенызы кивалтэ.

Клубзы пулэсь ай
Туспуктӥз Валентина Емельянова

Культурая юрт дорын котькуд гужем гуртлэсь нуналзэ ортчыто. Выль арез но дэмен пумитало. Клубен кивалтӥсь тау каре гуртысьтызы ужбергатӥсьёслы но. Одӥгез Выль ар ортчытыны, мукетыз гуртлэсь нуналзэ радъяны юрттэ, куинетӥез дунтэк пу вае.

— Эх, ужрадъёсмы эшшо но тросгес луысалзы, клубе газ кыскысалзы ке, — лулӟылэ Елена Симакова. — Газмы клуб доры вуттэмын, нош юртэ пыртэмын ӧвӧл. Нимысьтыз котельной но пуктоно ӧй луысал. Угось ас вакытаз клубамы кино возьматъяллям, солы шуыса нимысьтыз кинобудка пуктӥллям вылэм.

Дэри ёросысь Сизьгурт Ижевск городлэсь кыдёке ик интыяськемын ӧвӧл, ог 25 иськемын гинэ. Соин но, дыр, клубе аспӧртэм артистъёс вуыло. Кемалась ик ӧвӧл африкан барабанщикъёс калыкез паймытӥллям. Нош шаерысьтымы нимо-дано артистъёсыз но коллективъёсыз сизьгуртъёс ӧтьыны кепырало: артистъёс бадӟым гурзы шоры паймыса учко, пе. Музейысь экспонатъёсын сямен, туспуктэме пуксё. Нош сизьгуртъёс пу клубзы коть вань ай шуыса шумпото.

Валентина Емельянова

Ангелина Снигирева
By Ангелина Снигирева 27 марта, 2020 15:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<