Герд сярысь — Кам сьӧрын

Ангелина Снигирева
By Ангелина Снигирева 10 марта, 2020 09:34

Удмуртилэн палэназ ортчем Герд лыдӟонъёс историмы, калыкмы шоры палэнысен учкыны луонлык сётӥзы. Та конференцилэн кулэлыкез эшшо юнгес шӧдӥськиз кадь. Даур ортчыса но, Герд удмуртъёсты огазеяз, шугъяськытӥсь юанъёслы валэктонъёс утчаны косӥз, малпаськытӥз.

Кам сьӧрысь удмуртъёслэн азьветлӥсьёссы С. Гарифуллин,
Ю. Саитов, Т. Шайбакова
Туспуктӥз М. Егоров

Вакытлэн шорсюлмыз

Башкортостанысь Татышлы ёросысь Выль Татышлы гуртын Гердлы сӥзем конференциез усьтӥз «Удмурт Кенеш» огазеяськонлэн кивалтӥсез Татьяна Ишматова. Угось ӵапак «Удмурт Кенеш» трос аръёс ӵоже ни радъя Герд лыдӟонъёсты. Татьяна Витальевна пусйиз, таиз конференция К. Гердлэн, Т. Борисовлэн но М. Прокопьевлэн кунлык кылдытон бордын ужамзылы сӥземын. Герд лыдӟонъёс Удмуртилэн палэназ нырысьсэ ортчо. Озьы асьсэ азьветлӥсьёссы сярысь ялан тросгес удмуртъёс но мукет выжы калыкъёс тодыны быгато.

— Мон кӧня ке вожъяськыса учкисько шаерамы улӥсь удмуртъёс шоры, — веранзэ мытӥз Уфаысь Эшъяськон юртлэн директорез Ильгиз Султанмуратов. — Соос сюан, нылпилы ним сётон сямъёссэс вашкала дыръя сямен возё. Нош башкир калык трос сям-йылолъёссэ вунэтӥз ни. Улон воштӥське, выль технологиос кылдо, соин валче — выль шугъяськонъёс. Но вунэтоно ӧвӧл: кытын ке ӧс ворсаське, нош кытын ке усьтӥське. Герд лыдӟонъёс 23-тӥзэ радъясько, озьыен, со туж кулэ. К. Герд удмурт калыклэн зэмос героез вал.

— Сюлмысь шумпотӥсько, Герд лыдӟонъёс камсьӧр удмуртъёс дорын ортчо шуыса, — вераськонзэ удмурт кылын мытӥз Франциысь тодосчи Ева Тулуз. — Мон удмурт кылэз дышетӥсько, но туж ик умой вераськыны уг быгатӥськы на. Малы татчы вуи? Герд но Кам сьӧр шаер сюлэмылы матын — соин.

Ева Тулуз пусйиз: К. Герд вакчи дыр куспын туж трос лэсьтӥз. Ас вакытаз удмурт калыклэн сыӵе азьветлӥсьёсыз ӧй ке луысалзы, вераськысалмы меда туннэ удмурт кылын?

Кузебай Герд — со вакытлэн шорсюлмыз. Мон озьы шӧдӥсько, — шуиз Ева. — Эскерисьёс но троссэ уг тодо на. 1992-тӥ арын гинэ 
Николай Кузнецов писательлы луыса тодмо луизы трос фактъёс. Тау солы! Гердлы мон адямилы, личностьлы кадь синмаськи. Улэп дыръяз со зэмлыкез ӧз шедьты. Трос утчаськиз, трос малпаськиз аслаз калыкез сярысь. Но соку туж секыт вакыт вал.

Ева Тулузлэн верамезъя, Герд огшоры адями ӧй вал. Нош со вакытэ адямилэсь пӧртэм луыны эшшо кышкытгес вал.

— Трос аръёс малпаськи: берыктоно-а Гердлэсь кылбуръёссэ француз кылэ? Пуштроссэ берыктӥ, сокем чебер кылъёс ӧй шедьты ке но. Но, туж жаль, Франциын сое уг валало. Валэктон понна нимаз книга гожтоно, Гердлэн вакытэз сярысь верано…

Нырысь ик — общественник!

Зэмзэ вераса, мукет кунъёсысь тунсыкъяськисьёслэн Герд сярысь англи кылын лыдӟыны луонлыксы вань. Угось публицист Николай Кузнецов репрессиос улэ шедем удмурт югдытӥсьёсмы сярысь англи кылын но книга поттӥз. Россиысь одӥг выжы калыклэн но сыӵеез ӧвӧл, пе.

Нош таяз конференциын Николай Спиридонович котьку сямен ик туж малпаськытӥсь доклад лэсь­тӥз.

— Удмурт анайёс будэтӥзы кык туж быдӟым адямиосты — Гердэз но Борисовез. Удмурт калыклэн туннэ нуналозь одӥг гинэ сыӵе тандем шуонэз, кудӥз али но пумозяз дунъямтэ, — пусйиз Н. Кузнецов. — Одӥг ласянь, асьмеос ваньзэ тодӥськом ни кадь, мукет ласянь, умой-умой ум на валаське. Мон али вераськисько Гердэз зэмзэ но туж ӟеч тодӥсь, валась адямиослэн нимынызы но. Со даурлэн быдӟым адямиосыз — литературовед Фома Ермаков но историк Никифор Павлов. Соослэсь ӟечгес Гердэз нокин ӧз эскеры, ӧз на гожты. Но, жаль, кыкназы но улонысь кошкемын ни.

Николай Спиридонович пусйиз, Герд — нырысь ик общественник вал. Собере гинэ — югдытӥсь, кылбурчи но мукет.

— «СОФИН» ужъя бумагаоссэ учкыса, висъяны луэ удмурт калыклы сӥзёнъёссэ. Герд туж быгатэ вал калыкен вераськыны, мылкыдзэс вырӟытыны.

Солы котьку юрттылӥз Трофим Борисов. 1920-тӥ арын удмурт большевикъёслэн конференцизы ортчыны кулэ вал. Борисов отчы Гердэз но ӧтиз. Иосиф Наговицын (удмурт комиссариатлэн нырысетӥ тӧроез) пумитъяськиз, угось Герд партие пырымтэ вал. Озьы ке но кылбурчи отын вераськиз. Бӧрысь озьы ик мукет кенешъёсы пыриськиз, удмурт нылкышноослы сӥзем кенешын но туж ӟырдыт вераськиз. Борисов ик Гердэз Ижысь нылпи юртлы директоре юнматӥз. Кыкназы соос удмурт литературалы саклык висъяны кутскизы, писательёсты огазеязы. Борисов юрттӥз Гердлы Москваысь литинститутэ пырыны, Гердэз ушъяса, Наговицынлы шуиз: «Зарни шунды ӝужалоз» кылбурез калык гимн луиз ини…» «Укыр вылӥ дунъяськоды», — оскытэкгес пумитаз вазиз Наговицын. «Со озьы ик вань», — аслэсьтыз кариз Борисов.

Бумагаосты бугыръяса-лыдӟыса, валаны луэ: К. Герд автономиез кылдытонэ пыриськиз, та ужын одӥгез мылкыд сётӥсез, радъясез вал. Герд но Борисов кыкназы но, азьпала нуись тылъёс кадь, улонзэс, вань кужымзэс калык понна сётӥзы, — пусйиз Николай Кузнецов.

Удмурт калык понна…

100 ар талэсь азьло кунлык кылдон вакытъёсты тодэ вайытӥз литературовед Александр Шкляев но. Со верамъя, Борисов аслаз ужаз удмурт калык но демократия вылэ пыкиськиз, нош Наговицын — пролетариат но классовой куронъёс вылэ.

— Нырысетӥ удмурт юг­дытӥсьёс революцилы пумит ӧй вал, соос чакласькизы: удмурт калыклы урод уз луы-а? Нырысетӥ удмурт ӧтчамъёсты учконо ке, отчы Инмарлы оскись адямиос но пыриськизы ай. Кылсярысь, 1921-тӥ арын ортчем удмурт писательёслэн ӧтчамазы вераськиз священник, тодосчи Григорий Верещагин. Нош 1920-тӥ аръёслэн шоразы югдур воштӥськиз. Удмурт азьветлӥсьёслэн мылкыдзы куашказ, угось кутскизы репрессиос…

Александр Григорьевичлэн верамезъя, кунамы котьку 2 пӧртэм концепция вал. Одӥгез — ваньзы одӥг кылын вераськыны кулэ, соку гинэ огъя калык луом. Мукетыз — пӧртэм кылъёсты утёно, соос пыр азинсконо…

— Паймоно кадь, удмуртъёс пӧлысь вань тужгес кужмо кылчиос Башкортостанысь, Татарстанысь потӥзы. Озьыен, пӧртэм кылын вераськисьёс пӧлын улыса, соослэн кылшӧдонзы будӥз, соос азинлыкогес луизы, — Башкортостанысь удмуртъёслы синмаськемзэ вераз Александр Шкляев.

Нялтас вераса, даур талэсь азьвыл нырысетӥ удмурт ӧтчамъёс Кам сьӧрысь удмуртъёслы луыса ортчизы. Удмуртъёслэсь 1-тӥ но 2-тӥ съездзэс ортчытӥз Татарстанысь егит дышетӥсь, кылбурчи но общественник Максим Прокопьев. Макем трос лэсьтысал на со, ожын ке ӧй бырысал. Угось 1919-тӥ арын М. Прокопьев РСФСР-ысь наркомнацын вотской отделэн кивалтыны кутскиз. Конференциын солы сӥзем рос-прос доклад лэсьтӥз Башкортостанысь Янаул городысь 11-тӥ классын дышетскись Альбина Баширова. Со пусйиз:

— Вуоно удмурт элькунлэсь кунгожъёссэ ас киыныз нырысь ик суредаз Максим Прокопьев. Вуоно конституциез но дасяны выриз. Кузебай Герд но Максим Прокопьев ог-огзылы кыл сётӥллям: кулытозязы удмурт калык понна ужалозы…

Башкортостанысь удмуртъёслэн центренызы ки­валтӥсь Салимьян Гарифуллин бадӟым тау кариз доразы Герд лыдӟонъёсты ортчытэмлы. Азьвыл адямиос ӧз тодэ, кин со Герд, Борисов, Прокопьев. Соослы луыса Удмурт элькун кылдӥз ке но, батыръёсмы сярысь школаын ӧз вераллялэ, вузъёсын ӧз дышетэ. Нош али асьмеос шудо вакытэ улӥськом. К. Гердлэн «зарни шундыез» ӝужаз. Озьыен, выль кужымен ужано!

Елена Миннигараева

Ангелина Снигирева
By Ангелина Снигирева 10 марта, 2020 09:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<