Вумуртъёс крезьгурало, Палэсмурт эктэ

Ангелина Снигирева
By Ангелина Снигирева 25 марта, 2020 11:16

Ижысь Туала драматургияя но режиссурая центр (ЦСДР) егит драматургъёсты но крезьгурчиосты эшъяськытӥз. «4′33″» лаборатория улсын соос 2 толэзь ӵоже пичи операос кылдытӥзы.

«Отчего горох — магнолиопсид?» крезьгуро перформансысь суред.
Туспуктӥз Александр ШКЛЯЕВ

Композиторъёслы лекция лыдӟиз крезьгурчи Александр Маноцков. Солэн нимыз туала академической крезьгурен тунсыкъяськисьёслы тодмо — А. Маноцков пӧртэм театръёсын ужа, крезьгурзэ бадӟым оркестръёс но шудо. Россиысь тодмо крезьгурчи валэктӥз, кызьы операослы партитураос гожъяно, вераз дырлэн но музыкалэн юн герӟаськемзы сярысь. А. Маноцков ик дэмлаз «Мифы и легенды удмуртского народа» книгаысь выжыкылъёсъя операос гожтыны.

Драматургъёсын пумиськонэ вуылӥз театровед, Москваысь «Практика» театрысь завлит Анна Банасюкевич. Талэсь азьвыл та театрын ортчем «Практика постдраматурга» лаборатория: отын драматургъёс суредасьёсын, крезьгурчиосын ӵош ужаны дышетскиллям. Али театрын пӧртэм искусствоос сурасько. Со сяна, режиссёрлэн кужымез кулэсме: драматург, актёръёс но театрын мукет ужасьёс солэсь ужзэ дэмен быдэсъяны ӧдъяло.

2 толэзь ӵоже ЦСДР-ын радъяськизы туала академической музыкалы сӥзем лекциос. Музыковед Евгения Новосёлова лекциоссэ кутскиз Америкаысь Джон Кейджлэн творчествоез бордысен — ӵапак со «4′33″» крезьгуро пьесалэн авторез луэ.

Драматургъёс но композиторъёс, паръёслы люкиськыса, 6 опера пӧрмытӥзы. Соослы юрттӥськизы А. Маноцков но ЦСДР-ысь режиссёр, Удмурт драматургияя школалэн ректорез Павел Зорин. Операосъя эскизъёс лэсьтэмын вал, драматургъёс но композиторъёс асьсэос ик режиссёрлэсь ужзэ быдэстӥзы. Куд-ог операосты шудӥз филармониысь струнной квартет.

Сцена вылэ потазы удмурт выжыкылъёсысь геройёс. Куд-огез тодмантэм воштӥськизы, туала вакытэ выжизы. Кылсярысь, Иван Пушкарёвлэн операяз вожоос «гопникъёслы» пӧрмизы. Кулонэз алданы медӥсь адями сярысь мадёсэз Виталий Савинов драматург но Анна Дмитриева композитор туала улонысь учырен герӟазы. Соос Санкт-Петербургысь Андрей Павленко онкологлэсь историзэ возьматӥзы. А. Павленко, ракен висемез сярысь тодыса, кӧшкемыт висёнэз сярысь подкастъёс гожъяз, видеодневник нуиз — озьы со ракен висисьёслы юрттыны тыршиз. Туэ 5-тӥ январе со кулӥз. Вашкала мифлэсь но зэмос улонлэсь герӟаськемзэ авторъёс возьматӥзы верлибръёс, классической крезьгур пыр.

Ижевскез электронной крезьгурлэн шоркарез нимасьёс вань. Екатерина Бускина драматурглэн но Ринат Аминов крезьгурчилэн ужазы вумуртъёс, Иж прудысь потыса, крезьгурало — крезьгуро инструментъёсын интые жуг-жаген шудо. Электронной крезьгур чузъяськиз Анастасия Шумилова драматурглэн но Чудья Жени крезьгурчилэн 
перформансазы но. Соос таракан но кӧжы сярысь серемес выжыкыл пуктӥзы. Палэсмурт но туала улонысь геройлы пӧрмиз: со городын улэ, но со пушкын 2 адямиос нюръясько кадь. Мария Ханыкова крезьгурчилэн алангасаръёс сярысь ужаз фолк крезьгур улсын Дарали Лелилэн кылбурез чузъяськиз.

Драматургъёслы но крезьгурчиослы юрттӥськизы видео лэсьтӥсьёс но. Алангасаръёс кошкизы Никита Сморкаловлэн видеоез улсын, таракан но кӧжы сярысь пьесалы видео лэсьтӥз Вера Штыкова, нош Палэсмуртлэсь кыктозэ экран вылын улӟытӥз Максим Мезенцев медиахудожник.

Операосын тодматскемзы бере А. Маноцков но А. Банасюкевич мылкыдзэс веразы, драматургъёслы но композиторъёслы визь-кенеш сётӥзы. А. Маноцков ӵектӥз азьланяз, вань ужъёсты огинэ карыса, одӥг бадӟым опера лэсьтыны но сое сцена вылын пуктыны.

Виктория Крамова

Ангелина Снигирева
By Ангелина Снигирева 25 марта, 2020 11:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<