Бусые учкылэ тулыс

Ангелина Снигирева
By Ангелина Снигирева 27 марта, 2020 12:29

Тулыслэн бадӟымесь вамышъёсын матэктэмез зол шӧдӥське ни гурт хозяйствоосысь гаражъёсын. Татын техниказэс бусые поттыны дасяло. Тазьы ик шунтӥз ке, апрель шорын кизьыны кулэ ни.

«Кипун» хозяйствоысь механизатор В. Русанов
Туспуктӥз: Шаркан ёрос администрацилэн пресс-службаез

Шаерамы туннэ лыдъяське 5 сюрс 714 трактор, ю тысь утялтонъя 896 комбайн, пудо сиён дасянъя 603 комбайн. Кылем арын гинэ гурт хозяйствоос 2,2 миллиард манетлы басьтыны быгатӥзы 834 техника.

Но выль техникаез но тол бере чаклатэк-тупатытэк уг луы. 18-тӥ мартлы шаерысьтымы ог 86-87 процентэз гинэ тракторъёс но грузовой машинаос, 88-90 процентэз сеялкаос но герыос бусые потыны дасесь ай. Туннэ ӟечгес югдур Алнаш, Вавож, Можга, Грак, Дэри, Ува, Сарапул, Пичи Пурга но Шаркан ёросъёсын.

— Колхозын ноку гань-гань кариськыны уг луы, — вера Шаркан ёросысь «Кипун» хозяйствоен кивалтӥсь Сергей Иванов. — Зоро куазен ӵош мылкыддэ куашкатӥд ке, пудо но сютэм кылёз, техника но уз тупатӥськы. Ярам, механизаторъёсмы оскымонэсь. Вазенгес ни культиваторъёсты но, сеялкаосты но тракторъёсты но тупатӥзы. Рос-прос ужамзы потэ ни механизаторъёслэн. Гаражын уж быремын угось. Бусыын интыен-интыен 10-20 сантиметр зӧкта сяна лымыез ӧвӧл ни, интыен-интыен — ӝыны метр. Куазь сётӥз ке, апрель шорын кизьыны кутском.

Коть али ик кизьыны потысал ни — киос лыдо, шуэ «Кипунысь» устоез механизатор Валерий Русанов. Хозяйствоын со 1998-тӥ арысен тырше. Кивалтӥсез Сергей Иванов пусъемъя, Валерий Геннадьевичлы котькыӵе ужез оскыны луэ — ваньзэ йӧн-йӧн быдэстоз, жадемзэ но уз возьматы. Кинэ ке косыса-косыса ужатоно, нош Валерий Русанов ачиз уж юаса ветлэ, тамак кысконлы гинэ но дырзэ уг быдты — таза улонэн эшъяське.

Нялтас вераса, Шаркан ёросын тулыс ужъёслы дасяськонъя «Кипун» хозяйство огез адӟем карымонэз луэ. Татын гектарлы быдэ тужгес трос удобрение басьтэмын. Кылсярысь, йыды улэ котькуд гектаре 100 килограмм поттозы, нош кукуруза улэ —300 килограмм. Шаерамы котькуд гектаре 15,3 килограмм сяна удобрение понымон ӧвӧл на.

Али «Кипунын» ӟеч кидыс басьтонэн выро. 2 сюрс 96 гектар бусыоссы пӧлысь кизёно 1 сюрс 400 гектар. Тол шуныт возиськемен, туэ пӧртэм нымы-кибыос, шыръёс алялозы шуыса кышкан вань. Соин ик макем тросгес удобрение понӥд, сокем ӟечгес ӝужалозы будосъёс, шуэ Сергей Иванов.

— Туэ ар ӟечгес луоз шуыса оскиськомы. Кылем арын зоро улэмен, пудо сиён ӟеч ӧй вал. Басьтэм сиёнэн сюдоно луимы. Озьы ке но йӧлмес ӧм уськытэ. Туннэ котькуд скаллэсь уй-нунал куспын шорлыдын 34 килограмм йӧл кыскиськомы, кылем арын сярысь со 4 килограммлы уногес, — шуэ Сергей Николаевич.

Елена Сараматова

Ангелина Снигирева
By Ангелина Снигирева 27 марта, 2020 12:29
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<