Азьветлӥсь луэм интые…

Ангелина Снигирева
By Ангелина Снигирева 30 марта, 2020 12:23
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылем арын шаерысьтымы пиналъёс 615 пол законэз тӥязы. Валля арен ӵошатоно ке, со 27 йыртэманлы тросгес, ивортӥз МВД-ысь участковойёслэсь ужзэс радъянъя но быдэ вуымтэосын ужанъя отделлэн кивалтӥсезлэн воштӥсез Вероника Малькова.

Кылем арын 1 сюрс 937 пинал учётэ басьтэмын.
Со пӧлысь ӝыныез гинэ сюлмаськытӥсь югдуре шедем семьяосын уло.
Туспуктӥз Максим ЕГОРОВ

Юыса — йыртэманы

Быдэ вуымтэ нылпиос ӵемгес лушкасько. Пиналъёс мурт ваньбурез капыртыны пото шӧмаськыса: 100 йыруж быдэстэмын кудӟем йырын.

Пиналъёс огазеяськыса йыртэмало. Нылпи уг дӥсьты огназ лушкаськыны, нош ӵошен кариськыса, кужмогес но, кышкасьтэм но луэ. МВД-лэн статистикаезъя котькуд 3-тӥ йыруж группаен быдэстэмын.

Ижысь 17 но 15 аресъем пиос ӝегатэмын супермаркетысь лушкаськемзы понна. Уйин, ӧсэз тӥяса, пияшъёс лавкаысь виски но шоколад поттӥзы. Бӧрысь, матысь коркалэн подъездаз пырыса, сиизы-юизы. Ӧрӟияськем йыртэмасьёс уката шаплы луизы. Эшшо мукет лавкае пыризы — татысь кӧня ке блок тамак поттӥзы. Оглом ворам товарзы 10 сюрс манет тыр луиз. Табере пияшъёслы пумит уголовной ужъёс ӝутэмын. Соосты пытсэт сьӧры 5 арлы келяны быгатозы.

Вероника Малькова пусъе: пинал лушкаськисьёс пӧлысь бадӟым люкетэз — школаын дышетскисьёс. Кылем арын 530 йыртэмась ӝегатэмын вал ке, пӧлысьтызы 277-ез — школьникъёс, 154-ез — ссузъёсысь студентъёс. Йыртэман сюрес вылэ султӥсьёслэн шоро-куспо арлыдзы — 16-17 арес.

— Кылем арын шараямы йыртэмась группаез — 2 ар ӵоже пиналъёс законэз 24 пол тӥяллям. 15-17 аресъем пиосын кивалтӥз 18 аресъем пияш. Со, йыртэман сюрес вылэ султыкуз, быдэ вуэмын ӧй вал на. Нош табере суд кылзэ чурыт юалоз, — вераз Вероника Малькова.

Лушкаськыны дышетӥз анай

Нылпиосты законэз тӥян сюрес вылэ кыско бадӟымъёс но. Та учыръёсъя ӝутэмын 12 уголовной уж. Уката сюлмаськытэ мукетыз: законэз тӥяны нодъяло пиналъёслэн матысь адямиоссы.

Озьы одӥг анай 15 аресъем пизэ но солэсь эшсэ лушкаськыны визьмаз, вылаз ик, курыт юонэн куноятъяз. Тодмоезлэсь банкысь картазэ кайпалтыса, отысь уксёзэ — 14 сюрс манет — банкоматысь 
басьтӥзы пиналъёс. Кышномуртэ кыл кутытӥзы — лушкаськон понна но, быдэ вуымтэосты йыртэманы нодъямез понна но. Озьы ке но судья амало анаез жаляз: эшшо 2 пичи нылпиосыз вань шуыса, условной амалэн 2 арлы кыл кутон сётӥз. Но кышномуртлы та визь 
ӧз ватса. Со судлэсь куронзэ ӧз быдэсъя, пиналъёсызлы саклык ӧз висъялля. 
Йыртэманэз шӧмъям пиез эшшо законэз тӥяз. Соин валче пытсэт сьӧры вуиз пияш но, колоние 1 толэзьлы келязы анайзэ но. Нош пичи пиналъёс реабилитацияя центре интыямын вал. Колониысь мозмытскыса, нылкышно семьязэ огазеяны ӧз сюлмаськы. Табере солэн анай луон правоез но таламын.

Миым 290 бадӟымъёс кыл кутытэмын пиналъёсты юон сюрес вылэ кыскемзы понна.

— Кылсярысь, нылпи полицие кудӟыса шеде ке, тодыны тыршиськом: кин солы юон басьтӥз, кинэн ӵош ӟамыръязы? Кылем арын 170 протокол гожтэмын вуз карисьёслы пумит — соос нылпиослы аракы вузазы. Административной кыл кутытонъя вуз карисьлы 30 сюрс манет штраф сётӥське. 2-тӥ ползэ таӵе йыртэман шараяське ке, уголовной кыл кутон лякиське — соя 11 вуз карисьлы 50 сюрс манетысен 80 сюрс манетозь тыриськон сётэмын, — вераз Вероника Малькова.

Ӝыныез — ӟеч семьяосысь

Экспертъёс шуо: пичи йыр­тэмасьёс эшшо но тросгес, 
вылды. Уго пиналэз кыл кутытыны луэ 14 аресысен. Озьыен, покчигес нылпиосты полиция огъя статистикае уг ватса. Сыӵе быдэ вуымтэосты профилактикая учётэ гинэ пуктыны луэ.

Кылем арын 1 сюрс 937 пинал учётэ басьтэмын. Со пӧлысь ӝыныез гинэ сюлмаськытӥсь югдуре шедем семьяосын уло. Кылсярысь, 120 пиналэз опекунъёс будэто, 833 нылпилэн ӧвӧл мумыез яке бубыез. 984-ез пиналъёс будо ӟеч семьяосын. Йыртэмась эшъёссы пӧлы шедьыса, соос но кырыж сюрес вылэ султо.

1 арня ӵоже Удмуртиысь МВД ортчытӥз профилактикалы сӥзем «Подросток-группа» ужрад. Со чотын гинэ мумы-бубыос вылэ 150 протокол гожтэмын.

2012-тӥ арысен Удмуртиын ужа 59 номеро закон. Соя 18 аресозь нылпиослы уйин асьсэ понна ветлыны лэземын ӧвӧл. Октябрьысен апрель пумозь егитъёс ӝыт 22 часысен ӵукна 6 часозь ульчаын но, калыко интыосын но луыны кулэ ӧвӧл. Майысен сентябрь пумозь «комендант час» — 23 часысен 6 часозь. Озьы ке но кылем арын та законэз 1 сюрс 467 пиналъёс тӥязы. Нылпи таӵе куронэз 2-тӥ ползэ тӥя ке, кыл кутыто мумы-бубызэ. Миым 108 анай-атайёслы КоАП-ысь 5.35 статьяя тыриськон лякемын — солэн быдӟалаез 2 сюрс манетысен 3 сюрс манетозь.

МВД-ысь участковойёслэсь ужзэс радъянъя но быдэ вуымтэосын ужанъя отделлэн кивалтӥсезлэн воштӥсез Вероника Малькова чакла: пичи йыртэмасьёсты валто сэзь пиналъёс. Соос та улонын азьветлӥсь луыны быгатысалзы. Но юн луон сямзэс потто мукет удысын.

Елена Скворцова

Ангелина Снигирева
By Ангелина Снигирева 30 марта, 2020 12:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<