Авторез — удмурт калык

Ангелина Снигирева
By Ангелина Снигирева 4 марта, 2020 16:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Удмуртия» издательство, Удмуртилэн кунлыкезлы 100 ар тырмонлы сӥзьыса, туэ поттӥз ини ӟуч-удмурт кыллюкам, туала литературалы сӥзем «Удмурт проза» но «Удмурт поэзия» антологиос. 3-тӥ мартэ эшшо одӥг данъяськымон изданиен тодматским. «Секреты удмуртских мастеров» (12+) книгаын люкамын удмурт калык искусство, чебересь киужъёс — нош со пыр возьматэмын калыкмылэн визьмыз, лулыз, дунне шӧдонэз.

Презентациын калык дӥсен мода возьматон ортчиз
Туспуктэм: udmurt.ru

«Секреты удмуртских мастеров» книга возьматэ калык киужъёслэсь но искусстволэсь 19-тӥ даурысен 21-тӥ даурлэн кутсконозяз воштӥськемзэ. Яркыт туспуктэмъёс, тунсыко статьяос тодмато удмурт юртъерен, кеносэн, дӥськутэн, уксётӥрлыкен, пӧртэм киужъёсын. Книгаын уйпал но лымшор удмуртъёслэн, бесерманъёслэн аспӧртэмлыкъёссы но возьматэмын. Берлоез та выллем издание — «Удмуртское народное искусство», авторез Константин Климов — потӥз вал «Удмуртия» издательствоын 1988-тӥ арын.

«Секреты удмуртских мастеров» книгаен тодматскыны Эшъяськон юртэ уно калык люкаськиз. Куноосты ӝыт ӵоже шулдыртӥз «Айкай» театр. Ӵапак та коллектив удмурт дӥсез профессиональной сцена вылэ поттӥз. Кивалтӥсьсы Пётр Данилов верамъя, азьвыл фольклорен вырись коллективъёс стилизованной дӥсь нуллӥзы. Нош али тросэз кырӟась-эктӥсьёс, вашкала сандыкъёсысь куэм дӥсез поттыса, соин сцена вылэ пото. Вашкала дӥсез улӟытыны капчи ӧвӧл — артистъёс сое валаса нуллыны кулэ, вераз Пётр Павлович.

«Удмуртия» издательстволэн директорез Юрий Кузнецов тау шуиз «Айкай» театрлы, Брангуртысь песянайёслы, «Шаркан трикотаж» огазеяськонлы, «Лудорвай» музейлы, Калык творчествоя элькун коркалы, Туризмъя но киужъёсъя элькун центрлы, мукет огазеяськонъёслы но адямиослы — угось трос калык ужаз та книга бордын. Юрий Васильевич осконзэ усьтӥз, эшъяськон кусыпъёс азьланяз но чебересь книгаос поттыны юрттозы шуыса.

Г. Грязев книгалэн вордскемез сярысь мадиз
Туспуктэм: udmurt.ru

Книгалэн вордскемез сярысь мадиз «Удмуртия» издательствоысь валтӥсь редактор Георгий Грязев:

— 4 ар талэсь азьвыл Кремльын «Красная площадь» фестиваль дыръя ми «Сарапул — жемчужина Камского берега» но «Я живу в Удмуртии» книгаосмы понна дипломъёс басьтӥм. Соку малпан кылдӥз: удмуртъёслэн калык искусствозылы сӥзем бадӟым чебер книга одно кулэ. Малпанъёсмес кема «котыса» возим — усто пӧрасьлэн ыльнянез озьы ик котӥське. Быдэс элькун но кисьманы кулэ вал, дыр. Элькунамы киужъёсъя центръёс чебересь ужъёс кылдытъязы, тодосчиос научной ужъёс гожъязы, калык искусствоез эскеризы. Та книгалэн авторез ӧвӧл. Мон люкай-бичай гинэ, бадӟым узырлык пӧлысь устозэ бырйи. Книгаын уно туспуктэмъёс — ог 30 фотографъёслэн ужъёссы печатламын. Книгаез лэсьтыны оскимы егит дизайнермылы Валентин Семёновлы — со ог 150 издание дасяз ини, тросэз ужъёсыз дипломъёсын пусъемын.

Ужрад дыръя книгаез дасясьёс, книга поттон удысын адӟем карымон ветеранъёс Кун Кенешлэн, Нациосын ужан политикая министерстволэн, Печатья но ивор вӧлмытонъя агентстволэн таукаронъёсынызы пусъемын вал. Калык творчествоя элькун центрысь методистэз Елена Байковаез ӟечкылаку, Юрий Кузнецов шуиз: Удмуртиын гинэ озьы луыны быгатэ — кибашлы ачиз ик модель но, научной консультант но.

Нациосын ужан политикая министр Лариса Буранова вераз: та книгалэн авторез — быдэс удмурт калык.

— Книга шоры учкыса, малпан лыктэ: кыӵе ми, удмуртъёс, шудоесь! Асьмеос туж узыресь, со сяна, быгатӥськом вашкалаосмылэсь ваньбурзэс утьыны, сое азинтыны, — шуиз министр.

Книгалэн вылтусыз

Люкаськем калыкез ӟечкылаз Кун Кенешысь ялан ужась комиссилэн кивалтӥсез Татьяна Ишматова но. Та книга шоры учкыса, удмурт калыкенымы данъяськон мылкыд пурӟе, шуиз со. Со дыре ик валано: асьмеос кыл кутӥськомы калык ваньбур понна, соин тыршыны кулэ, мед со, 100 ар ортчыса но, улэп луоз.

Удмурт киужъёсты утёнын но азинтонын бадӟым инты басьто калык киужъёсъя центръёс. Тае пусйиз культурая министр Владимир Соловьёв но. Министр верамъя, 2019-тӥ арын центръёсмы 39 процентлы тросгес табыш поттӥзы, 2018-тӥ арен ӵошатыса. Озьыен, калык киужъёсын тунсыкъясько, киужъёсты басьто, соос туала вакытэ но кулэ.

Анастасия Шумилова

Ангелина Снигирева
By Ангелина Снигирева 4 марта, 2020 16:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<