Сямыз снайперлэн кадь вал

Ангелина Снигирева
By Ангелина Снигирева 28 февраля, 2020 16:17

19-тӥ феврале М. Калашников нимо музейын ортчиз Евгений Драгунов конструкторез (1920-1991) буре ваён ӝыт. Туэ 20-тӥ тулыспалэ солэн вордскемез дырысен 100 ар тырмиз.

Е. Драгунов конструктор

Евгений Фёдорович вордскиз Воткинскын. Шор ёзо школаез ас ёзъёсызлэсь вазьгес йылпумъяса, 14 аресаз Ижысь индустриальной техникуме дышетскыны пыриз. Е. Драгунов кема аръёс ӵоже ужаз Ижысь машиностроительной заводын, валтӥсь конструктор вал. Быдэс дуннелы тодмо луэ Драгуновлэн снайперской винтовкаез. Со сяна, ожын но спортын кутӥськись мукет тодмо винтовкаосты малпаз на. Ачиз но конструктор усто ыбылӥське вал — 14 аресаз ини «Ворошиловский стрелок» знакен пусъемын.

Евгений Фёдорович сярысь шуныт тодэ ваёнъёссэс вераны люкаськизы «Ижмашын» ӵош ужам эшъёсыз, ӵыжы-выжыосыз. Бадӟымез внучкаез Екатерина Дружинина вераз, макем лякыт но тунсыко адями вал песятаез. Ижкаретӥ ӵем поръяллямы, со ик пыӵатӥз мыным Ижкарез яратон мылкыд, вераз Е. Дружинина. Е. Драгуновен ӵош ужам дано оружейникъёс Иван Дерюшев но Николай Безбородов веразы Евгений Фёдоровичлэн вераськись но мыло-кыдо луэмез сярысь. Воргоронъёс паймытӥзы: ваньзы сямен асьсэлэсь кылбуръёссэс лыдӟизы, нош Александр Липатов инженер, гитараен шудыса, аслэсьтыз кырӟанзэ быдэстӥз. Ӵапак 
А. Липатовлы кельтэм кульманзэ (чертёжъёс лэсьтон дуско) Е. Драгунов, заводысь кошкыкуз. Евгений Фёдоровичлэн пиез Михаил Драгунов но атаез сярысь мадиз. Атаезлэсь пыӵал тӥрлыклы, ужезлы синмаськемез солы но паласькем — М. Драгунов но пыӵал тӥрлык поттон бордын ужа, атаезлэсь разработкаоссэ азинтэ.

Зэмос интеллигент — тазьы ваньзы верало дано оружейник сярысь. Таӵе лякыт муртлэн сямыз снайперлэн кадь вал, пе, — котьку тодэм, кытчы учконо, мар лэсьтоно малпанэз йылозяз-пумозяз вуттон понна.

10-тӥ маёзь музейын ужа Е. Драгуновлы сӥзем «Вижу цель» адӟытон (6+). Татын люкамын архивысь документъёс, тодэ ваёнъёсыз, туспуктэмъёс, Е. Драгуновлэн чертёжъёсыз, винтовкаос но туала снайперъёслэн пыӵал тӥрлыксы.

Анастасия Шумилова

Ангелина Снигирева
By Ангелина Снигирева 28 февраля, 2020 16:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<