Кӧт ке тыр — мылкыд шулдыр

Ангелина Снигирева
By Ангелина Снигирева 28 февраля, 2020 14:52
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Покчи классъёсын дышетскисьёсты дунтэк сюдон понна 830 миллион манет кулэ луоз. Быдэс Россиысь 1-тӥ – 4-тӥ классъёсын дышетскись пиналъёсты 1-тӥ сентябрьысен пӧсь сиёнэн дунтэк сюдозы. Кызьы талы дасясько Удмуртиын?

Дэри ёросысь Выль Казьмасын нылпиос асьсэос сиён быръё
Туспуктӥз Валентина Емельянова

Меню — 2 арнялы азьлапал

Дэри ёросысь Выль Казьмас школаын вань пиналъёс пӧсь сиён сиё, анай-атайёссы уже ганяк мылкыдын кошко — нылпиоссы сютэм ветлозы шуыса сюлмаськонэз ӧвӧл.

Столовое пиналъёс гуж! бызё — пумитазы шедем дышетӥсьёссы выро ик дугдытыны: калленгес, сиён ваньдылы тырмоз. Но нылъёс-пиос чик уг кыло кадь соосты! Сютэмесь-а, ӧвӧл-а — тодо: столовойын ужасьёс туннэ нош маке но ческытсэ пӧразы.

Столовоен кивалтӥсь Надежда Нагорных верамъя, меню 2 арнялы вазьгес дасяло. Сиёнзы огпӧртэм медаз луы, ческыт но пайдаё но мед пӧрмоз. Одно пӧзьто шыд, ӝук, макарон яке картошка пунем, одно луэ салат, чай яке компот…

Н. Нагорных
Туспуктӥз В. Емельянова

Нылпиос асьсэос сиёнэз подносэ тыро но ӝӧк сьӧры нуо. Сиськыны пуксемзы бере ӧжытак шыпытало кадь — пуньы кокам куара гинэ кылӥське. Огзы но «тау» шуыны уг вунэто!

— Та покчи классъёсын дышетскись пиналъёсмы вал, — нылъёс но пиос кӧтсэс тырыса кошкем бере вераз школалэн директорез Елена Кабанова. — 1-тӥ-4-тӥ классъёсын дышетскисьёсмы 85 кузя. Соосты нунал ӵоже 2 пол сюдӥськом. Али 2-тӥ ползэ сиськизы ни. 2-тӥ урок мыныку, сюдӥм вал ни йӧлын ӝукен, куддыр сыр, вӧй ватсаськом на. Со понна дун ум куриське — уксё вуэ республикамылэн бюджетысьтыз «Нылпиосты школаын сюдон» программа чотын. Котькуд пиналлы 16 манет 92 копейка висъяське. Городысь нылпиослы со дунын йӧл люкыло ке, ми пӧсь сиён сётӥськом — тазьы каро тросэз гурт школаос.

Нош нуназезэ сиськон ог 60-65 манет усе, пе. Покчи классъёсын дышетскисьёслы но, бадӟым классъёсы ветлӥсьёслы но — огкадь дун. Но трос нылпиё, ёрмыса улӥсь семьяосысь пиналъёслэн анай-атайёссы сое уг тыро – республикалэн бюджетысьтыз нылпилы быдэ 60 манет субсидия вуэ. Дунтэк сиськисьёс та школаын араз ог 50-60 луо — лыдпус вошъяське, угось семьялэсь доходзэ возьматӥсь справка ваёно.

Е. Кабанова
Туспуктӥз В. Емельянова

— Дунтэк но, дунын но сиськисьёслы менюмы одӥг кадь, — шуэ директор Е. Кабанова. — Зэм, пӧраммылэн дуныз 60 манетлэсь ичигес луэ ке, дунтэк сиськисьёслы емыш яке салат ватсаськом на.

Выль Казьмас школаын 197 дышетскисез. Со сяна, школалэн липет улаз ик интыяськемын нылпи сад — отчы 80 нылъёс но пиос ветло. Ваньзылы сиён одӥг интыын пӧрало. Зэм, садике ветлӥсьёслы нимаз меню кылдытӥське, соослы пӧрасьёс но нимаз. Столовойын ужасьёс верало: инты ваньзылы тырме. Шугъяськонъёс уг кылдо пӧраськон тӥрлык.

— Арлы быдэ ик тусьты-пуньы, кастрюляос ке но басьтыны тыршиськом, — шуиз Надежда Нагорных. — Кылем арын басьтӥм сӥль коран.

Ачиз столовой укыр бадӟым ӧвӧл. Но вань пиналъёсты сюдыны вутто – котькуд переменалы быдэ я огез, я мукетыз класс сиськыны лыктэ. Татын югыт, чылкыт, гужемлы быдэ ик пичияк ке но ремонт лэсьтыны туртто.

Нуналаз — 8 тонна йӧл

Выль Казьмас школа шаерысьтымы трос мукет школаослэсь уг висъяськы. Нылпиосты сюдон ваньмаз сямен тыро-пыдо радъямын. Дышетонъя но наукая министерство ивортэмъя, туннэ 96,6 процентэз пиналъёс дышетскон интыязы пӧсь сиён сиё.

Пӧлысьтызы данакез — дунтэк. Дышетонъя но наукая министр Светлана Болотникова верамъя, республикалэн бюджетысьтыз уксё висъяське трос нылпиё ёрмыса улӥсь семьяосысь но инвалид пиналъёсты сюдыны. Таӵеос шаерысьтымы покчи классъёсын дышетскисьёс пӧлын ог 5 сюрс 300.

Со сяна, 2005-тӥ арысен улонэ пыӵатӥське «Нылпиосты школаын сюдон» программа, азьвыл сое ӵемысь «Школа йӧл» шуылӥм. Талы луыса нуналлы быдэ 1-тӥ-4-тӥ классъёсысь 8 тонна пала йӧл юо.

— Тау Кун Кенешысь депутатъёслы, та программалы дурбасьто но арлы быдэ элькун казнаысь уксё висъяны чаклало, — шуэ дышетонъя но наукая министр Светлана Болотникова — Та программая городысь пиналъёс ӵукнаоссэс дунтэк йӧл юо ке, гурт школаосын сое пӧсь сиёнэн воштӥзы — йӧлын ӝук сёто, вӧзаз чай, нянь ватсало на. Озьы оглом ваньзэ лыдэ басьтоно ке, та вакытэ шаерысьтымы покчи классъёсын дышетскись ог 50 сюрс нылпиос дунтэк пӧсь сиён сиё ни.

С. Болотникова

Дышетонъя но наукая министр Светлана Болотникова:

— Покчи классъёсын дышетскисьёсты дунтэк пӧсь сиёнэн сюдыны республикамы дась. 1-тӥ-4-тӥ классъёсын та вакытэ 83 сюрс пала пиналъёс. Соос пӧлысь ог 50 сюрсэз али но дунтэк сисько.

Ваньмыз ӧвӧлэз 1-тӥ-4-тӥ классъёсын дышетскисьёс шаерамы 83 сюрс кузя. Озьыен, выль куронъёсъя ваньзэс таосты туэ 1-тӥ сентябрьысен дунтэк сюдыны кутсконо. Дышетонъя но наукая министерство лыдъяз ни: ватсаса 830 миллион манет кулэ луоз. Та пӧлысь 81 процентэз, 673 миллион манетэз, вуыны кулэ, пе, Россилэн бюджетысьтыз, кылемзэ, 157 миллион манет, шедьтоно луоз республика.

— Школаосын пищеблокъёс ярантэмесь ӧвӧл, — ватсаз Светлана Болотникова. — Угось 2013-тӥ арозь «Нылпиосты школаын сюдон» элькун программа чотын ик соос выльдӥсько вал, отчы выль тӥрлык басьтылэмын — талы соку 100 миллион манет висъяськиз. Зэм, вань столовойёс али ик пиналъёслы тырмыт сиён пӧраны дасесь шуыны уг луы — ог 100 миллион манет кулэ луоз на отчы ватсаса тӥрлык басьтыны.

Выль федерал законъя покчи классъёсын дышетскисьёс дунтэк сиськыны кутскозы туэ 1-тӥ сентябрьысен. Со сяна, туэ 1-тӥ мартысен дунтэк сюдыны кутскозы трос нылпиё семьяосысь вань пиналъёсты, семьялэн доходэз лыдэ уз басьтӥськы — тазэ решениез кутӥз Удмуртилэн Тӧроез Александр Бречалов.

Элина Кумачёва

Ангелина Снигирева
By Ангелина Снигирева 28 февраля, 2020 14:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<