Жуг-жаг понна — проездной

Ангелина Снигирева
By Ангелина Снигирева 28 февраля, 2020 16:02
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмуртиысь «Спецавтохозяйство» предприятие нырысьсэ ортчытӥз «Экопроездной» акция. Татчы пыриськыса, Ижысь школьникъёс быгатӥзы дунтэк басьтыны транспортэн ветлыны карта. Со понна бичаны кулэ вал бумага, пияла, алюминий но пластик.

Дунтэк проездной басьтӥз 521 нылпи
Туспуктэм: «Спецавтохозяйстволэн» пресс-службаез

Вуж газетлэн пайдаез

«Экопроездной» акцие пыриськисьёслы 3 транспортэн ворттылыны чаклам проездной дунтэк сёто — со 420 манет сылэ. Но со понна вторсырьё люканы кулэ.

«Спецавтохозяйство» нимысьтыз памятка дасяз, мар бичано но кӧня сое люкано шуыса. Кылсярысь, 1 проезднойлы люканы кулэ яке 30 килограмм макулатура, яке 25 килограмм пияла ӟенеликъёс но банкаос, яке 4 килограмм пластик, яке 4 килограмм алюминий. Нош кӧня ке пумо вторсырьё бичамын ке, солэн огъя секталаез 40 килограмм медло.

Нырысь ачим тодматски куронъёсын. Кылсярысь, макулатура пӧлы люканы луэ газет-журналъёсты, книгаосты, картон коробкаосты, тетрадьёсты. Уг яра — магазинысь чекъёсты, факс пыр потӥсь бумагаез, фотографиосты, 1 пол кутӥськись салфеткаосты, бумага стаканъёсты.

Пияла пӧлы куто пӧртэм ӟенеликъёсты но банкаосты. Уг яра — лампочкаосты, пияла но керамика посудаез, табалы но кастрюлялы чаклам пияла ӵоктэтъёсты, укно пиялаез.

Алюминий пӧлы пыро напиток, сур, коктейль тырем банкаос. Таосты паньгатыны кулэ.

Тужгес чакласьконо, пластик люкаку. Уго вторсырьё пӧлы бичаны лэземын нимысьтыз маркировкаен (1, 2, 4 пусэн) пластикез гинэ. Кылсярысь, напитокъёсын яке сурен пластик бутылкаосын «1» гожтэмын. Шампунь, гель, кизер майтал возьыны чаклам посудаын «2» пуктэмын. Йӧлэн, йогуртэн, аръянэн тырмытэм пуйыосын «4» гожтэмын. Таосты, иське, бичаны яра. Нош та пластик пӧлы ик куштыны уг яра 1 пол кутӥськись вилка-пуньыосты, йогурт-пудинг стаканъёсты, таблетка блистеръёсты, клёнка пуйыосты, кукей яке мукет сиён тырон контейнеръёсты, чипс, шоколад упаковкаосты но трос мукетсэ.

Узырлык — дорын

Таӵе тодон-валан люкаса, «Экопроездной» акцие семьяме кыскыны малпай.

Озьы ми январе ик 3 мешок дасямы: бумагалы, пластиклы но пиялалы. Нырысь ик вань ӝажыосысь вуж газет-журналъёсты сузямы, шудон упаковкаосты бичамы. Степан пимы люказ вуж тетрадьёссэ но черновикъёссэ. Табере кикур быдӟа бумагаосмы но жуг-жаг пӧлы уг куштӥсько — макулатура пӧлы пыро. Нош ачим толэзь куспын сыӵе чакласькыны кутски — выль носки-дӥсь бордысь картон этикеткаосты но бумагалы мешоке тырисько.

Пияла бичанэз верано ке, мынам кемалась люкаськемын вал сок-пюре бервылысь пичи банкаосы. Соос гылъямын но балконын быдэс пакет тыр люкамын. 
Куштыны малы ке киы ӧз пырылы. Нош «Зелёный паровоз» акциосы мыныны дыр ӧз тупалля. Озьы 10 килограмм пияламы дорын кылле вылэм.

Пластик люканы озьы ик мыло-кыдо кутским. Куддыръя йӧл но аръян басьтӥськом бутылкаен. Бушам ӟенеликез одно ик гылтӥськом, куасьмемез бере паньгатӥськом — соку со ӧжытгес инты басьтэ. Озьы ик «ревизия» ортчытӥ ванноям но нылпиослэн «магазиназы» — татысь вань буш шампунь-гель посудаосты бичай. Дышетӥ кузпалме но пиме йӧл пуйыосты гылъяны — азьвыл ми соосты жуг-жаг пӧлы сэрпалтылӥм. Табере бушатэм пуйыосты гылтӥськом, куасьтӥськом но лач-лач тыриськом. Конечно, соос секытэсь ӧвӧл, 
со понна ульчаын уз лошъяське, переработкае мынозы.

Пумиським шугъяськонъёсын но. Кылсярысь, семьяямы 
3 нылпи. Соос котькуд нунал сямен сиё йогуртъёс-пудингъёс. Нош со бервылысь стаканъёс «5» пусэн гожтэмын. Озьыен, люкам пластик пӧлы поныны соосты ми ум быгатӥське. Сыӵе ик сюлмаськон тетрапак коробкаосын. Пиналъёс ярато юыны коктейльёс но сокъёс. Но та пичи коробкаосты макулатура пӧлы уд поны.

Вторсырьё бичаськомы шуыса, ми ивортӥм песянай-песятайёсмылы но, мукет ӵыжы-выжыосмылы но. Соосты но куримы бумагазэс люканы. Милемлы юрттӥськизы уж дурысь эшъёсы но. Озьы вакчи дыр куспын 31 килограмм бумага люкаськиз.

Табере чаклам нуналэ та макулатураез экопунктэ вуттоно. Жаляса верано, сыӵе инты Ижын одӥг гинэ — Камбарской ульчаын. Милям улон интымылэсь со кыдёкын, но ми ӧм чоталэ, кӧня бензин но кӧня дыр быроз шуыса. Милям кузпалыным валтӥсь малпанмы — пимес жуг-жаг бичаны но сое шонер утялтыны дышетоно.

Иван Маринин

«Спецавтохозяйство» предприятилэн кивалтӥсез 
Иван Маринин:

— Ми та ужмес семьяен быдэстоно акция шуыса мытӥмы. Шумпотӥськом, озьы ик пӧрмиз шуыса. Анай-атайёс нылпиосынызы ӵош кылем-мылемъёсты люкылыны но бичаны дышетскизы. Табере соос огъя уж понна сюлмасько.

Чылкыт улэм понна — 420 манет!

Экопроездной люкылон мынӥз 4 час ӵоже. Ужрадэ вазь вуэмъёс черодъёсын сылоно луизы — мылкыд карисьёс трос люкаськизы. Тэк улэм интые, пиналъёс быгатӥзы пыриськыны мастер-классъёсы, тодматскизы вторсырьёлэсь лэсьтэм арбериосын, сьӧразы ваем ӵашаосын чай юизы.

Оглом 521 пинал та нуналэ экопроездной басьтӥз. Степанлы 502-тӥ проездной шедиз. Озьыен, со 420 манет шыръяз.

Табере таӵе акция Ижын толэзьлы быдэ ортчылоз. Таяз толэзе пимы люка пияла. 25 килограмм пияла — со ог 70 ӟенелик, пе.

Елена Скворцова

Ангелина Снигирева
By Ангелина Снигирева 28 февраля, 2020 16:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<