Шаермы выльдӥськонъёслы дась

Ангелина Снигирева
By Ангелина Снигирева 31 января, 2020 15:47

Кызьы республикаямы пыӵатӥськозы Россилэн Президентэзлэн Владимир Путинлэн Федерал Собранилы вазиськоназ ӝутэм ужпумъёс? Та юан пыр-поч эскеремын Кун Кенешын.

Кун Кенешысь депутатъёс В. Путинлэн вазиськонэз пумысен вераськизы
Туспуктэм: udmgossovet.ru

Сессиос ортчытъян залэ Кун Кенешысь депутатъёсын ӵош люкаськылӥзы ёросъёсысь, городъёсысь Депутатъёслэн Кенешъёсынызы, отысь партиослэн фракциосынызы кивалтӥсьёс — Президентлэн посланиез тамында калыкен шаерамы нырысьсэ эскеремын. Мугез валамон: укыр бадӟымесь воштӥськонъёс луыны кулэ. Мар дэмла Россилэн Президентэз — люкаськемъёслэн эшшо одӥг пол тодазы вайытӥз Тӧролэн но Правительстволэн аппаратэнызы кивалтӥсь Сергей Смирнов. Пусйиз: экономикаез ӝутонэн, калыклэсь улон-вылонзэ ӟечомытонэн герӟаськем ужпумъёс шаерамы али ик быдэсъясько ни. Кылсярысь, 2018-тӥ арен ӵошатыса, 2019-тӥ арын 7 процентлы тросгес инвестициос кыскемын, 202 проектъёслэн дунзы 300 миллиард манет пала луиз.

— Шӧдскымон воштӥсь­конъёс социальной удысын но, — вераз Сергей Смирнов. — 2019-тӥ арын пуктэмын 
27 ясли. Социальной контрактэз пыӵатыны туэ 247,9 миллион манет чакламын, кылем арынлэсь со 39 поллы тросгес. Талы луыса 1 сюрс 900 семья югдурзэ тупатыны быгатоз.

Кизнер ёросысь Депутатъёслэн Кенешенызы кивалтӥсь Вениамин Андреев:

— Ёросмы мыло-кыдо пыриське «Бадӟым ремонт» проектэ — туэ Балдейкаысь школаез но Ягулысь нылпи садэз тыро-пыдо тупатъялом. Усьтыны чакласьком 2 ФАП, одӥгез луоз Кибьялан, кыкетӥезлы инты бырйиськом на. Тупатъян ужъёс озьы ик чакламын культурая юртъёсын.

Россилэн Президентэз куриз: покчи классъёсын вань дышетскисьёсты дунтэк сюдоно. Республикамы талы но дась. Кылсярысь, Тӧро Александр Бречалов кылем ар пумын решение кутӥз: трос нылпиё семьяосысь вань пиналъёс школаын дунтэк сиськозы. Со сяна, туннэ сиськемзы понна коньдон уг тыро ёрмыса улӥсь семьяосысь нылпиос, инвалид пиналъёс — озьы 1-тӥ-4-тӥ классъёсын дышетскисьёс пӧлысь ог 50 сюрс палаез дунтэк сисько ни. Оглом покчи классъёсын дышетскисьёс ог 80 сюрс пала. Кулэ луоз на школа столовойёсысь сиён пӧран тӥрлыкез выльдыны — талы республикамылэн казнаысьтыз ог 100 миллион манет кулэ луоз.

— Тазалыкез утён удысын но пусйымонэз вань, — азинтӥз С. Смирнов. — Кылсярысь, туэ 88 фельдшер-акушер пунктъёс пуктыны кутском. Калыклы дунтэк яке пичи дунын эмъюмъёс висъяны 1 миллиард манет чакламын. 2018-тӥ арен ӵошатыса, со 3 поллы тросгес.

Зэм, тазалыкез утён удысын быдэстоно ужпумъёс туж трос на, кылсярысь, поликлиникаосысь, ФАП-ёсысь эмъян тӥрлыкез выльдоно, специалистъёс шедьтоно. Ёросъёсысь, городъёсысь вуэм депутатъёс юалляськизы: малы пӧртэм ёросъёсын эмъюм дунъёс пӧртэмесь, малы туннэ капчигес сюрыны дунын ужась поликлиникаосы, малы реабилитацилы тырмыт саклык уг висъяськы. Тазалыкез утёнъя министрлэн воштӥсез Мария Галеева ӧз ваты, ваньзэ соку ик лэсьтыны уг луы. Но югдур, пе, воштӥськыны кулэ.

— Пӧртэм ужрад кутыса, 2024-тӥ арын шаерамы шоро-куспо улон вапум 78 аресозь йылыны кулэ, — шуиз со. — 2019-тӥ арын 72,6 ар луиз. Ог 10 ар талэсь азьло та лыдпус 66 арес котырын вал.

Якшур-Бӧдья ёросысь Депутатъёслэн Кенешенызы кивалтӥсь Сергей Поторочин:

— Оскисько, матысь аръёсы нылпиослэн лыдзы будоз. Талы ёросмы дась: гуртъёсын нылпи садъёсы черодъёс ӧвӧл. Ёрос центрамы но матысь дыре ӵыжак-выль ясли усьтӥськыны кулэ — со пуктэмын ни, лицензиез гинэ ӧвӧл на.

Калыкез улон-вылонын утён политикая но ужъя министрлы Татьяна Чураковалы юанъёс трос ӧй вал. Ваньмыз валамон: семьяослы юрттэт сётон — валтӥсь интыын. Россилэн Президентэз сӥзиз, кылсярысь, табере анай капитал сётӥськоз ни 1 пинал ваем понна но — 466,6 сюрс манет, 2-тӥ пинал понна эшшо 150 сюрс манет ватсаськоз но 616,6 сюрс манет луоз. Нош 3-тӥ пинал понна ипотекаез пытсаны 450 сюрс манет вуоз.

— Вунэтоно ӧвӧл улос программаосмы сярысь но, — пусйиз Татьяна Чуракова. — Кылсярысь, семьяын 3-тӥ, 4-тӥ но со бӧрсьы пинал вордскиз ке, республикамылэн бюджетысьтыз 240 сюрс манет сётӥськоз — сое кутыны луоз улон инты басьтыку, нырысетӥ взнос тырыны.

Тросгес семьяос табере толэзьлы быдэ но юрттэт басьтыны быгатозы. Кылсярысь, татчыозь федерал бюджетысь коньдон выплатаос (та вакытлы 9 сюрс 964 манет) чакламын вал нырысетӥ нылпилы 1 но ӝыны арес тырмытозь — сое шаерысьтымы 46 процентэз семьяос басьтӥзы. Табере со сётӥськоз, пиналлы 3 арес тырмытозь — ог 73 процентэз семьяос басьтозы ни. Талы оглом 470 миллион манет лыктэ ке вал, кулэ луоз ог 1 миллиард манет.

Элина Кумачёва

Ангелина Снигирева
By Ангелина Снигирева 31 января, 2020 15:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<