Хоккей борды футбол

Ангелина Снигирева
By Ангелина Снигирева 16 января, 2020 14:53

Выль арез Удмуртилэн Тӧроез Александр Бречалов мытӥз Яр ёросын.

Биграгуртын хоккеен шудыны ярато
Туспуктӥз: Э. Карипов

Шумпотон ар

Нырысь ик — вормонъёс сярысь. Яр ёросысь Биграгурт (Дизьмино) школаын кылем арын бадӟым но шумпотымон воштӥськонъёс ортчизы — кылдӥз хоккеен шудонъя туала коробка, выльдӥськизы школалэн липетэз но спортзаллэн выжез.

Школа вӧзысь йӧ коробкаын огшоры но, шутэтскон нуналъёсы но калык уг бырылы. Татын физкультурая урокъёсын конькиен нискылало, нош ӝыт лыктэ гурт калык, Ярысь но вуылӥсьёс вань.

Биграгуртын хоккеен шудонъя нылпи команда вань, туэ соос М. Калашников нимо турнирын кужмоосыз пӧлын вал. Табере вормонъёссы эшшо но уноялозы, шумпотэ школалэн директорез Юрий Шандыбин.

— Таин гинэ дугдыны ум малпаське, али коробкаен артэ лэсьтӥське на футболэн шудон бусы, тулыс турын кизём но капкаосты пуктом ни, — вераз Ю. Шандыбин.

Гуртын спортэз азинтыны луонлык сётӥз «Сообщество» фонд САФМАР благотворительной фондлэн но «Белкамнефть» предприятилэн юрттэмзыя.

Выльдӥськем спортзал
Туспуктӥз: Э. Карипов

Туэ гуртоосты эшшо одӥг шумпотон вите на — концерт учкылозы 200 интылы чаклам выль клубын. Юртэз пуктон понна коньдон висъямын ни. 2016-тӥ арысен гуртоос лулчеберетъя юрттэк уло. Угось клубзылэн липетэз куашказ, сое аварийной лыдъязы но быдэс сэрттӥзы.

— Калыкмы клублэсь мӧз­миз ни, — вера поселенилэн йырыз Алёна Поздеева. — Тани Выль армес школаын ортчытӥм, бадӟым тау директорезлы: доразы калыкез люканы лэзе. Но весяк татын гурт ужрадъёсты уд радъялля. Али кӧня луонлыкъёс пӧртэм кичӧлтонъёс борды итӥськыны, нош милемлы кенешыны нокытын — калыкез ульчае уд люка ук. Соин инициативной бюджетирование выллем проектъёс борды итӥськыны шугъяськиськом.

72 нылпи дораз пуке

Озьы ик Тӧро пумись­кылӥз Яр ёросысь калыкен, сюлмась­кытӥсь юанъёссэ кыл­зӥз. Егит анай каргуртысь мумы-бубыослэн нимынызы вазиськиз: 2 номеро нылпи сад пытсамын, 72 пинал дораз пуконо луэ. Кӧнязэ ке гуртъёсы нулло, нош мар кароно, пиналэн пукыны нокинлы, палэнэ нуллыны транспорт ӧвӧл ке?

Садын «Большой ремонт» чотын лэсьтӥськонэз мытыку, юртлэн борддоръёсыз кӧня ке интыетӥ пилиськиллям. Табере нимысьтыз эскеронъёс ортчытоно: садэз тупатыны луоз на-а яке выльзэ пуктыны капчигес но дунтэмгес.

Таӵе югдурен сэрен анай-атайёс но нылпиос ку­радӟыны кулэ ӧвӧл, шуиз Тӧро. Матысь нуналъёсы ёрос­лэн йырыз дорын югдурез сэрттон понна нимысьтыз кенеш радъяськыны кулэ.

2020-тӥ арын «Тазалыкез утён» нацпроект улсын Ярын усьтӥськоз выль ФАП но выльдӥськоз ёрос больница.

Мукетыз сюлмаськон гер­ӟась­кемын спортэз азинтонэн. Яр ёросысь спорт комплекслэн директорез Александр Буданов юаз: луоз-а ёросын куасэн бызьылонъя база? А. Бречалов оскытӥз: матысь аръёсы Ярын Гурт шудонъёсты ортчытыны чакламын, солы шуыса куасэн но роликен ворттылонъя сюресъёс лэсьтӥськозы. Азьвыл спорт объектъёс азинлыко ёросъёсын ӝутӥськизы, табере уж мукет сямен мыноз — саклык висъяськоз сыӵе ёросъёслы, кытын физкультураен но спортэн вырыны луонлыкъёс ичи на.

«Озёрки» хозяйстволэн ки­валтӥсез Борис Артемьев верамъя, Пудэм — Озёрки сюресэз тупатыны кулэ. Та сюреслы А. Бречалов нимысьтыз саклык висъяны куриз, со нӧд дыръя потаны луонтэм 62 сюресъёс пӧлы пыртэмын.

АНГЕЛИНА СНИГИРЁВА

Ангелина Снигирева
By Ангелина Снигирева 16 января, 2020 14:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<