«Удмурт Кенешлэн» исполкомез К. Герд нимо премилэсь лауреатъёссэ юнматӥз

Ангелина Снигирева
By Ангелина Снигирева 31 января, 2020 17:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Та нуналъёсы «Удмурт Кенеш» огазеяськонлэн исполкомез люкаськылӥз. Вераськон мынӥз туэ ортчытоно валтӥсь ужрадъёс сярысь. Пумиськонэз нуиз «Удмурт Кенеш» огазеяськонлэн кивалтӥсез Татьяна Ишматова. Ужрадэ пыриськиз Кун Думаысь депутат Алексей Загребин.

«Удмурт Кенешлэн» исполкомаз

Башкириын — нырысьсэ

Нырысь ик вераськон мынӥз туэ, 27-тӥ феврале радъяно Герд лыдӟонъёс сярысь. Нырысьсэ Герд лыдӟонъёс луозы Удмуртилэн палэназ, Башкортостанысь Татышлы ёросысь Выль Татышлы гуртын. Палэнысь удмуртъёс туж тунсыкъясько удмурт азьветлӥсьёсын, Удмуртилэн кунлык басьтэмез бордын ужам югдытӥсьёсын. Соин ик конференциын пыр-поч докладъёс лэсьтозы филология наукаосъя кандидат А. Шкляев, писатель Н. Кузнецов, педагогика наукаосъя кандидат В. Ившина но мукетъёс. Герд лыдӟонъёсы озьы ик пыриськозы Туризмъя но киужъёсъя центр, Удмуртиысь Национальной библиотека, Удмурт кун университет, Киужъёсъя юрт, радъяськоз удмурт книгаосын тодматон-вуз карон, СМИ-ослы сӥзем адӟытон.

«Удмурт Кенеш» огазеяськонлэн кивалтӥсез Татьяна Ишматова ёросъёсысь «кенешчиослы» вазиськиз: Башкортостанэ Герд лыдӟыонъёсы мынӥсь делегациосады одно ик пыртэ егитъёсты но. Нош УдГУ-ысь удмурт филологияя, финно-угроведениея но журналистикая институтлэн директорез Наталья Кондратьева пусйиз: Башкортостанысь удмурт нылпиос понна студентъёс но дышетӥсьёс туж ӟеч программа дасяло.

Арлы быдэ Герд лыдӟонъёс азьын пусъё К. Герд премилэсь лауреатъёссэ. «Удмурт Кенешлэн» нимысьтыз комиссиез огкылэ вуиз: туэ К. Герд премиен пусъёно «Айкай» фольклор театрлэсь кивалтӥсьсэ, «Удмурт Кенеш» огазеяськонлэн исполкомезлэсь но Ижысь Общественной палаталэсь ёзчизэ Пётр Даниловез но Башкортостанысь удмурт культурая центрлэн кивалтӥсезлэсь воштӥсьсэ, «Удмурт Кенеш» огазеяськонлэн Пичи кенешезлэсь ёзчизэ Юрис Саитовез. Исполком та малпанэз умоен лыдъяз, кандидатъёс понна огкылысь дурбасьтӥз.

Ужпумъёс трос

Туэ быдэстоно ужрадъёс пӧлын дуннеысь фин-угор калыкъёслэн конгрессы, Россиысь фин-угор калыкъёслэн форумзы.

Дуннеысь фин-угор калыкъёслэн конгрессы ортчоз июнь толэзе Эстониын. Отчы котькуд фин-угор улосысь 5 делегатэз ыстыны чакламын. Исполкомын огкылэ вуизы: удмуртъёслэн нимынызы конгрессэ мынозы Удмурт филологияя, финно-угроведенияе но журналистикая институтлэн директорез Наталья Кондратьева, «Удмурт дунне» газетлэн валтӥсь редакторез Зинаида Рябинина, «Лудорвай» музейлэн кивалтисез Татьяна Шкляева, Можга ёросысь Пазял школалэн директорез Олег Чувашов но кылбурчи Богдан Анфиногенов.

«Удмурт нылкышно кенеш» дасяське удмурт нылкышноослэн огазеяськемзы дырысен 100 ар тырмонэз пусйыны. Огазеяськонлэн кивалтӥсез Надежда Степанова ивортӥз: бадӟым ужрад ортчоз 8-тӥ апреле Пичи Пургалан. Отын «Удмурт нылкышно кенешлэн» йылпумъянъёслы но быръёнъёслы сӥзем конференциез радъяськоз, А. Оки премилэн туэ ар понна лауреатъёсыз пусъемын луозы.

Исполкомын Удмуртилэн кунлык басьтэмез дырысен 100 ар тырмонлы сӥзем ужпумъёсты но ӝутӥзы.

— Умой луысал, шаерысьтымы кивалтэтлэн, ёросъёслэн сайтъёсазы луысалзы ке Удмуртилэн историезлы, кунлык басьтэмезлы сӥзем ивортонъёс, историысь учыръёс, югдытӥсьёслэн тусъёссы. Сайтъёсы пырись адямиослэн со соку ик син азязы мед йӧтысал. Озьы историмес ӟечгес тодысалмы, — дэмлаз кивалтӥсез Пётр Данилов.

«Кенешчиос» та малпанэз умоен лыдъязы но пусйизы: публикациосты дасяны кулэ профессионалъёс. История зэмлыко сётэмын мед луоз.

Малпаськоно ни матэктӥсь перепись сярысь но. Татьяна Ишматова «кенешчиослы» вазиськиз: калык пӧлын валэктон уж али ик нуно.

Кун Думаысь депутат Алексей Загребин пусйиз миграциен, дышетонэн герӟаськем ужпумъёсты.

— Ми ум быгатэ миграциез дугдытыны. Калык кошке городъёсы. Удмуртиысь вань калык пӧлысь ӝыныез али Ижын улэ. Озьыен, тыршоно городъёсын удмуртлыкез утьыны, со понна луонлыкъёс кылдытыны.

Алексей Егорович дэмлаз, дышетон азьын сылӥсь ужпумъёслы сӥзьыса нимысьтыз пумиськон радъяны.

— Ӟеч малпан, — пусйиз Татьяна Ишматова, — но ойдолэ со пумиськонэ, «Удмурт Кенешлэсь» активистъёссэ сяна, дышетӥсьёсты, депутатъёсты но вань мылкыд карисьёсты ӧтёмы.

Зэм, ортчем ар пумын «Удмурт Кенешлэн» Пичи кенешаз дышетонлы сӥзем ужпумъёс ӝутэмын ни вал. Вераськон нырысьсэ, дыр, сокем ӟырдыт но пайдаё мынӥз. Шаерысьтымы Дышетонъя но наукая министерство но общественность ог-огзэс кылӥзы. Озьы ке но юанъёс трос на. Угось Дышетон удысысь национальной ужпумъёсты тодон-эскеронъя институтлэн ортчытэм юалляськонэз возьматӥз: анай-атайёс школаын удмурт кылэз дышетон мылкыдзэс верало ке но, директоръёс солы пумит луо. Озьыен, та ужпумез ас эрказ лэзьыны нокызьы уг яра.

Елена Миннигараева

Туспуктэмъёс: «Удмурт Кенешлэн» пресс-службаез

Ангелина Снигирева
By Ангелина Снигирева 31 января, 2020 17:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<