Кема возьмам кыллюкам

Ангелина Снигирева
By Ангелина Снигирева 29 января, 2020 15:06

Историяя, кылъя но литературая Удмурт институтынужасьёс 2 томъем «Ӟуч-удмурт кыллюкам» дасязы. Сое 2 сюрс тиражен поттыны юрттӥз Нациосын ужан политикая министерство. Словарен тодматскон ортчиз 27-тӥ толшоре Ижысь Эшъяськон юртын.

Бичетэ 55 сюрс кыл пыртэмын

Кыллюкамен тодматскыны но авторъёсты ӟечкыланы трос калык лыктӥз: тодосчиос но гожъяськисьёс, удмурт газет-журналъёсысь журналистъёс но редакторъёс, дышетӥсьёс, библиотекарьёс но политикъёс. Ваньзы ик шумпотэмын.

Азьвылэз ӟуч-удмурт кыллюкам 1956-тӥ арын потӥз вал. Дыр ортчемъя но кыл воштӥськемъя со валамон, вужмиз. Вужаз изданиын ог 40 сюрс кыл вал, выляз 55 сюрслэсь ятыр кыл люкамын. Уно кылъёс пыртэмын удмурт кыллэн вераськетъёсысьтыз. Со сяна, неологизмъёс, пӧртэм удысъёсысь (политика, наука, экономика, оскон но мукет) терминъёс люкамын. Куд-ог вуж кылъёс выльысен улӟытэмын, выльдэм пуштросэн кутыны ӵектэмын. Словарез толковой но шуыны луоз: куд-ог кылъёслэн пуштроссы валэктыса сётэмын, тросэз кылъёс борды визькылъёс, лэчыт веранъёс ватсамын.

— Удмурт кыл архивъёсын, музейёсын уг кылльы, со улэп маке, — шуиз нациосын ужан политикая министр Лариса Буранова. — Соин сое улонысь пӧртэм удысъёсын кутыны быгатӥськом. Али удмурт кылэз одно ик туала информационной пространствое пыртоно.

Таӵе книга ӝажы вылын тузонӟыса уз улы — сое кулэ каремзэс ужрадэ тросэз вуэмъёс веразы. Кылсярысь, Дышетон удысысь национальной ужпумъёсты тодон-эскеронъя институтлэн кивалтӥсез Надежда Ураськина верамъя, институтазы котькуд ужась нуналлы быдэ ужаз кутэ 2008-тӥ арын потэм удмурт-ӟуч словарез, табере ӟуч-удмуртэз но ӟеч юрттэт луоз. Надежда Ивановна шуиз: словарь потэмен, асьмеос кӧня ке поллы узырмимы, нош табере удмурт кыллэсь туала научной грамматиказэ возьмалом — угось школалы учебникъёсты соя дасяло.

Выль кыллюкам удмурт кылэз азьланяз но азинтыны юрттоз. Та сярысь вераз Удмуртиысь Эскеронъёс ортчытъянъя федерал центрлэн кивалтӥсез, физика но математика наукаосъя доктор Михаил Альес.

— «Яндекс» компаниен электронной переводчик кылдытон пумысен огкыл гожтэмын. Выль кыллюкам солэн интъетэз луоз. Асьмеос национальной республикаын улӥськом, соин калыкъёслэн кусыпъёссы вань вакытъёсы азьпал радын луо. Удмурт кыл улӥз ке, калык но улоз, — шуиз Михаил Юрьевич.

Центрысь валтӥсь учёной секретарь Игорь Поздеев тодматӥз электрон кыллюкамен. Сое шедьтыны луэ udmcorpus.udman.ru вотэс бамын. Татын удмурт-ӟуч но ӟуч-удмурт кыллюкамъёс вань. Со сяна, та вотэс бамын ик ужаны луэ удмурт кыллэн корпусэныз (кылшыкысэныз). Отчы пыро удмурт кылын гожтэм текстъёс, кыллюкамъёсысь кылъёс. Корпуслы тэлеӟыны Национальной библиотекаысь ужасьёс юртто — соос удмурт книгаослэсь электрон версиоссэ Интернетэ интыяло.

Кыллюкамез лэсьтӥсьёсты ӟечкылаз «Удмурт Кенеш» огазеяськонлэн тӧроез Татьяна Ишматова. Кыллюкамлэсь 2 томзэ кие кутыса гинэ но, валаськод, кӧня ужамын та словарь бордын, шуиз Татьяна Витальевна. Со пусйиз: авторъёсыз удмурт кыллэн историяз пыризы ини.

Ужрадын данъязы но Нациосын ужан политикая министерстволэн таукаронъёсынызы пусйизы кыллюкамез дасям тодосчиосты: Татьяна Душенковаез, Александр Егоровез, Людмила Карповаез, Сергей Максимовез, Ольга Титоваез, Александр Шибановез, Людмила Кирилловаез, словарьлэсь кыл кутӥсь редакторзэ Леонид Ившинэз но словарьлэсь вёрстказэ лэсьтэм Ирина Широбоковаез.

Шумпотонэн валче выль ужпумъёс но вань. Удмуртиысь Эскеронъёс ортчытъянъя федерал центрлэн кивалтӥсезлэн воштӥсез Людмила Бехтерева шуиз: матысь дыре шонер гожъяськонъя выль правилоос юнматоно но словарь поттоно. Зэм но, таиз ужпум висьытӥсь луэ: 2002-тӥ арын потэм «Удмурт кылын шонер гожъяськонъя кыллюкамын» но 2008-тӥ арын печатлам «Удмурт-ӟуч кыллюкамын» куд-ог кылъёс пӧртэм сямен гожтэмын.

Ужрадэ вуэмъёс тодматскизы на удмурт кылын азьвыл потэм словарьёсын — «Удмурт кыллюкамъёсты кылдытон сюрес» адӟытон дасяллям Национальной библиотекаысь ужасьёс. Соос ик ужрадэз но ортчытӥзы.

Словарез басьтыны луэ «Удмуртия» издательстволэн книга лавкаысьтыз. Дуныз 3 сюрс манет. Кыллюкам дунтэк вуоз библиотекаосы, удмурт редакциосы, дышетон учреждениосы.

Анастасия Шумилова

Ангелина Снигирева
By Ангелина Снигирева 29 января, 2020 15:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<