Законъёс вошто улонэз

Ангелина Снигирева
By Ангелина Снигирева 16 января, 2020 10:56

Россиын туэ ортче Данъян но буре ваён ар Быдӟым Вормонлы 75 ар тырмонэн валче. Нош шаерамы паськыт пусъёмы кунлыклы 100 ар тырмонэз. Со сяна, туэысен пыӵаны кутскизы уно выль законъёс.

Туспуктӥз: М. Егоров

Пенсиос

Пенсиос сярысь выль законъя туэ 55 но 60 арессэс пусйись нылкышноос но воргоронъёс пенсия басьтыны кутскозы ай 2021-тӥ-2022-тӥ аръёсы гинэ. Туэ июнёзь пенсие потон дырзы вуоз 1964-тӥ арын июньысен декабрёзь вордскем нылкышноослэн, озьы ик 1959-тӥ арын та вакытэ ик вордскем воргоронъёслэн.

6,6 процентлы — шорлыдын 1 сюрс манетлы — йылӥз ужасьтэм пенсионеръёслэн пенсизы. Озьы быдэс кунмыя шоро-куспо пенсилэн быдӟалаез луиз 16 сюрс 400 манет. Йылтэмын гурт удысын 30 ар но солэсь ятыр ужам адямиослэн пенсизы борды ватсэт но.

Тазалык

Диспансеризациез яке профилактикаез ортчись адямилэн лек пыктосэз шараяськиз ке, врачлэн уждунэз борды ватсаса уксё тыриськоз — котькуд учыр понна 1 сюрс манет котыр. Талы федерал бюджетын чакламын 1 миллиард 200 миллион манет. Озьыен, эмъясьёс эшшо но ӟечгес эскерыны тыршозы адямилэсь тазалыксэ.

Уждун, пособие

850 манетлы (7,5 процентлы) йылӥз пичиез уждун (МРОТ), солэн быдӟалаез луиз 12 сюрс 130 манет. Азьвылэн ӵошатыса, 13 сюрс 500 манетлы ӝутскиз анай капиталлэн быдӟалаез но — табере 2-тӥ (яке со бӧрсьы) нылпи ваем понна сётӥськоз 466 сюрс 617 манет.

Ӝутскиз ужтэк кылемъёслэн пособизы но: пичиез — 1,5 сюрс манет, бадӟымез — 8 сюрс манет. Ужтэк кылем предпенсионеръёслэн (пенсие потытозязы 5 ар ужаны кылем муртъёслэн) пособизы йылӥз 11 сюрс 300 манетозь.

Ипотека

Гуртоослы улон инты басьтыны сётӥське капчиятэм ипотека — тужгес троссэ 3 процентэн. Ипотекаез басьтыны луоз гуртъёсын улон сэрег басьтон понна гинэ, сётӥськоз со 25 арлы, квартира дунлэсь 10 процентсэ басьтыку ик тыроно луоз.

Туала амалъёс

Пыӵаны кутскизы ужъя электрон книжкаос. Туэысен уже нырысьсэ интыяськисьёслы бумага вылын трудовой книжка уз усьтэ ни, нош мукет ужасьёс бырйыны быгатозы: электрон амалэз кутоно яке азьвыл усьтэм книжказэс возёно. Нырысетӥезлэсь куштӥськыны луоз, кивалтӥсьлы куриськон гожтыса. Со сяна, ужан интыысьтыз вань кулэ луись справкаосты адями курыны быгатоз, бумага вылын гинэ ӧвӧл, электрон амалэн но.

Машина басьтон

Выль басьтэм машинаез учётэ пуктон понна ГИБДД-е вазиськоно уз луы ни. Та ужез радъялозы автосалонын. Нош вужзэ машинаез басьтыку, азьвыл сямен ик автоинспекцие вазиськоно луоз.

Доход басьтэм понна выт

Квартираез вузаса табыш басьтэм понна выт (НДФЛ) уз кутӥськы, квартираез басьтэм дырысен 3 ар гинэ ортчиз ке но. Азьвыл та дыр тупатэмын вал 5 ар. Но та капчиятон пыӵалоз, адями одӥг гинэ улон интызэ вуза ке. Мукет недвижимостез вань на ке, НДФЛ-эз тыремез уг поты ке, возьмано луоз азьвыл сямен ик — 5 ар.

Пунэмъёс

Адями банкысь яке микрофинансовой огазеяськонысь басьтэм кредитсэ дырыз дыръя пытсаны уг быгаты ке, со понна люкаськись штрафъёс, пениос 1,5 поллы тросгес луыны кулэ ӧвӧл кредитлэн быдӟалаезлэсь. Шуом, адями пунэмаськиз ке 1 сюрс манет, соя тыриськонъёсыз 1,5 сюрс манетлэсь тросгес луыны уз быгатэ. Та выльдӥськон пум поноз уно сюрс процентъёсын сётӥськись микрозаймъёслы, азьвыл аръёсы угось трос калык, соосты пытсаны быгатымтэенызы, улон интытэк кылиз.

Елена Никитина

Ангелина Снигирева
By Ангелина Снигирева 16 января, 2020 10:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<