Дышетӥсь, директор но калыкен ужась

Ангелина Снигирева
By Ангелина Снигирева 21 января, 2020 13:02

Сьӧлта ёросысь Югдон школа ёросын одӥгез адӟем карымонэз, татын нылпиослы ӟеч тодон-валан сётыны, дышетӥсьёслы ужаны луонлыкъёс кылдытэмын. Та понна сюлмаське школалэн директорез Алефтина Григорьева.

А. Григорьева

Алефтина Сергеевна 40 арлэсь кема дышетон удысын тырше ини, соос пӧлысь 13 арзэ — Югдон школалэн директорез луыса. Ужан сюрессэ мытӥз Сьӧлта ёросысь Кейлуд гуртын покчи классъёсты дышетӥсь бордысен, бӧрысь Югдонэ выжиз. Нырысь покчиоссэ визьнодаз, отӥяз историен но обществознаниен дышетӥз. Нош 2006-тӥ арын сое бырйизы директоре.

Алефтина Сергеевнаез нылпиос но, дышетӥсьёс но, анай-атайёс но гажало. Мар ке борды кутске ке, сое пумозяз лэсьтэ, сётэм кылзэ быдэстэ, калыкен вераськыны, адямиосты огазеяны быгатэ. Та сямъёсыз понна ик А. Григорьева 2006-тӥ арын директоре быръемын вал. Быгатӥсь кивалтӥсьлэн кияз шедьыса, школа трос вормонъёс басьтӥз, выльдӥськиз. 2008-тӥ арын югдон дышетӥсьёс «Дышетон» проектэ пыриськизы но Россиысь устоосыз школаос пӧлы сюризы. Азинлыко проектъёсын ужаны быгатэмзэ но вормонъёссэ лыдэ басьтыса, школалы 1 миллион манет сётӥзы. Та премиен ноутбукъёс, интерактивной доска, спортэн вырон тӥрлык басьтэмын вал. Югдонын ялан ортчыло пӧртэм конференциос но спорт ӵошатсконъёс. 2015-тӥ арын шаертодонъя улоскуспо фестиваль радъяськиз, отчы пыриськизы, шаерысьтымы сяна, Киров улосысь но Татарстанысь адямиос. Нылпиосты сюдонэз ӟеч радъямез понна 2015-тӥ арын ик школа шаерамы гурт школаос пӧлын устоеныз лыдъямын но Промышленностья но вуз каронъя министерстволэн данъян грамотаеныз пусъемын. 2018-тӥ арын татын ортчиз «Удмурт дунне» газетлэн кубокез понна куасэн бызьылонъя вожвылъяськон, гуртэ шаерысьтымы 200 пала спортсменъёс люкаськизы.

Та вакытэ Алефтина Сергеевна трос сюлмаське егит дышетӥсьёсты школае кыскон, соослы ужаны луонлыкъёс кылдон понна. 21 дышетӥсьёс пӧлысь ӝыныез — егит специалистъёс.

Алефтина Сергеевна общественной ужен выронлы но трос кужымзэ сётэ. 1985-тӥ арын солэн кичӧлтэмезъя Югдон школаын усьтэмын вал шаертодонъя музей. Со али но дышетӥсьёслэн но нылпиослэн данъяськонзы луэ, отын гуртлэн, школалэн историеныз узыр материалъёс утиськемын. 1998-тӥ арын А. Григорьева ёросысь Депутатъёслэн Кенешазы быръемын, 4 созывын депутат вал. 10 ар ӵоже со кивалтӥз «Огъя Россия» партилэн Сьӧлта ёросысь Югдон гуртысь ёзэныз, Кун Думаысь депутатлэн Николай Мусалимовлэн юрттӥсез вал. Трос лэсьтӥз гуртоосызлэсь сюлмаськонъёссэс, куронъёссэс быдэстон понна.

Ӟеч дышетӥсьлэн, усто кивалтӥсьлэн, мыло-кыдо общественниклэн трос данъетъёсыз — пусъемын Кун Кенешлэн Данъян грамотаеныз, Удмурт Тӧролэн грамотаеныз, пыртэмын ёрослэн Данъян пул вылаз, луэ Удмуртиысь сӥё-дано дышетӥсь, Россиысь дышетон удысысь дано ужась.

Сьӧлта ёросысь Югдон школаысь дышетӥсьёс

Ангелина Снигирева
By Ангелина Снигирева 21 января, 2020 13:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<