Вашкала шыкысысь — туала улонэ

Ангелина Снигирева
By Ангелина Снигирева 24 января, 2020 15:06

«Удмуртия» издательствоын потэм «Секреты удмуртских мастеров» книга (12+) тодматэ удмурт калык искусствоен но киужъёсын.

Выль книгалэн вылыз

Книга чеберлэсь но чебер пӧрмиз. Сое ог 3 ар ӵоже дасяз бадӟым коллектив: туспуктӥсьёс, дизайнеръёс, люказ издательствоысь валтӥсь редактор Георгий Грязев. Проектлэн кивалтӥсез, издательстволэн директорез Юрий Кузнецов тау каре «Айкай» театрлы, Брангуртысь песянайёслы, «Шаркан трикотаж» огазеяськонлы, «Лудорвай» музейлы, Калык творчествоя элькун коркалы, Туризмъя но киужъёсъя элькун центрлы. Таӵе мылысь-кыдысь юрттӥськисьёстэк та быдӟа ужмы ӧй пӧрмысал, шуэ Юрий Васильевич.

— Та книга издательствомылы 100 ар тырмонлы сӥзем ужрадъёслы, изданиослы чебер йылпумъян луиз. Оскиськом, таӵе бадӟым ужмы даурлы кылёз. Книгамес чакласькомы калыккуспо конкурсъёсын возьматыны, одно ик пыриськомы Москваын Красной площадьын ортчылӥсь фестивале, — вера Ю. Кузнецов.

«Секреты удмуртских мас­теров» возьматэ, кызьы 
калык киужъёс но искусство воштӥськизы 19-тӥ даурысен 21-тӥ даурлэн кутсконозяз. Удмурт юртъ­ерен, кеносэн, дӥськутэн, уксётӥрлыкен, куиськонэн но трос мукетыныз тодмато яркыт туспуктэмъёс, тодосчиослэн статьяоссы. Уйпал но лымшор удмуртъёслэн но бесерманъёслэн аспӧртэмлыкъёссы но возьматэмын. Бадӟым саклык висъямын туала вакытэ азинскись киужъёслы, шаерысьтымы кибашлыослы.

Издание возьматэ: калык киужъёсын тунсыкъяськон али будэ. Кылсярысь, пу вышкыосты берло дыре ӵемгес лэсьяны кутскизы. Калык инкуазь сярысь сюлмаськыны ӧдъяз, экологиез утисьёс инкуазь материалъёслэсь арбериосты вылӥ дунъяло.

Берлоез та выллем издание потӥз вал «Удмуртия» издательствоын 1988-тӥ арын (авторез Константин Климов). «Удмуртское народное искусство» книгаысь куд-ог туспуктэмъёс выль издание но выжизы. Со понна издательстволэн архивысьтыз слайдъёсты рос-прос выльдӥзы.

— Киужъёс пыр возьматэмын удмурт калыклэн лул-сюлмыз, ассэ шӧдонэз, историез. Соин та удысэз син азьын возёно. Киужъёслы сӥзем книгаос одно ик луозы на. Малпаськомы нимаз ёросъёсысь дӥськутлы сӥзем альбомъёс поттыны. Удмуртъёслэн дӥсьсы туж узыр. «Секреты удмуртских мастеров» книгалэн вылбамаз — Татарстанысь Балтач ёросысь сюан дэремен нылаш. Со кияз лянэс возе. Таӵе дӥсез юромо пуктӥм: удмурт дӥсь шуыку, син азе Брангуртысь песянайёслэн дэремъёссы гинэ медаз пуксе.

Книгаен тодматскон ортчоз Ижысь Эшъяськон юртын март толэзе. Татын ик удмурт дӥсен дефиле, киужъёсын адӟытон радъяськозы.

Виктория Крамова

Ангелина Снигирева
By Ангелина Снигирева 24 января, 2020 15:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<