Суомиез эшшо но зол яратӥ

Ангелина Снигирева
By Ангелина Снигирева 4 декабря, 2019 16:47
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

16-тӥ — 23-тӥ коньывуонэ ветлӥ Финляндие фин-угор калыкъёслэн Sugrifest-2019 фестивалязы. Сое котькуд ар «Финляндия — Россия» огазеяськон радъя. Азьло та фестивале фин-угор кырӟасьёс ветлӥзы, нош туэ «Фин-угор кизилиос» нимо ӵошатсконын вормем блогеръёсты ӧтизы.

Финляндие вуылэм удмурт азьветлӥсьёс
Туспуктӥз: Л. Шихова

Гондыр кырӟан но Skype

«Фин-угор кизилиос» ӵошатсконэ 57 блогер пыриськем, нош вормисьёс пӧлы 13 мурт сюрем. Пӧлысьтызы 6-ез — удмуртъёс: кырӟасьёс но блогеръёс Анастасия Иванова, Богдан Анфиногенов, кылбурчи Мария Галеева, «Куара» огинлэн кивалтӥсез Владислав Степанов, «Инстаудмурточки» марафонэз радъясь Вера Трефилова но мон, блогер.

Нырысетӥ нуналаз милемыз ваньмес удмуртъёсын кылдытэм Ugrin paikka интые вайизы. Сиппола карын тӥни сыӵе нимын удмурт корка вань. Татын котькудӥз аслаз проектъёсыз сярысь вераз. Туж тунсыко вал валаны, маин удмуртъёс мукетъёсызлэсь висъясько.

Пор, эрзя но мокша, ханты, ненец, коми-пермяк азьветлӥсьёс вотэс бамъёсазы али гинэ асьсэ кылынызы гожъяськыны кутско ай, соослэн трос кышканъёссы, кинлы но малы со кулэ шуыса. Удмуртъёсты верано ке, асьмеос та выллем кышканъёсмес ог 10 ар талэсь азьло вормимы ни, али удмуртъёслэн йыразы но ӧвӧл, удмурт кылын гожтэм постэз кин ке мыскыллялоз яке уз вала шуыса. Ӧз вала ке, юалоз. Озьы ик мукет ӧръёсын но. Кылсярысь, поръёс али гинэ асьсэ кылынызы кылбуръёссылы «ВКонтактеын» нимаз бам усьтӥллям, нош асьмелэн но коми-пермякъёслэн сыӵе кылбур «юртъёсмы» кемалась вань ни. Та ласянь туж шумпотто коми-пермяк бускельёсмы, соос асьмелэсь вотэсын ужмес чаляк синйылто но асэсто, кема уг малпасько. Со туж умой, дыр. Ӝог воштӥськись дунне сьӧры вуэмед потэ ке, мукетъёсызлэсь адӟем кар но ачид лэсьты.

Паймытӥз ханты воргорон Тимофей Молданов. Егит блогеръёс пӧлын огназ мӧйы вал. Та воргорон нылпиосты хантыослэн гондыр кырӟанъёссылы дышетэ, пе. Нош ханты кылын кырӟан понна кылзэ но дышетоно. Соин ик Тимофей нылпиосты нырысь кыллы дышетыны кутскем. Но толалтэ, сюресъёс лымыен ортчонтэм согиськыку, дышетскисьёс дораз вуылыны быгатӥллямтэ. Соин ик соосты Skype пыр визьманы малпам. Озьы гондыр кырӟанъёслы дышетӥсь воргорон туала онлайн-дышетӥсьлы пӧрмем. Котькыӵе учырысь потыны луэ, туала технологиослэсь кышканэз ӧвӧл.

Финъёс паймизы милемлы, ми — соослы

Финляндиысь библиотекаын
Туспуктӥз Л. Шихова

Берло милемыз 2-3 муртлы люкизы но Финляндилэн пӧртэм палъёсаз нуизы. Котькуд нунал ми кармес но улон интымес вошъямы: Сиппола, Лаппеенранта, Париккала, Иматра, Тампере, Вантаа, Хельсинки. Котькуд нунал выль школаын урокъёсы вуылӥм но асьме сярысь мадьылӥм. Мон Мария Галееваен но коми-пермяк эшеным Вася Епановен одӥг группаын вал. Пиналъёслы туж яразы милям презентациосмы но соос понна валантэм кылынымы вераськеммы, дышетӥсьёслы кельшизы милям мерлыко вотэсын кылдытэм ужъёсмы. Мон, кылсярысь, «Мылкыд-йӧлпыд» огинэным но удмурт Instagram баменым тодматъяй, Вася коми-пермяк кылын кылбуръёс но коми-пермяк мемъёсын «Тупи-тап» огинъёсыз сярысь туж тунсыко мадиз. Та пияш али Венгриын дышетске ке но, коми-пермяк проектъёссэ уг вунэты. Маша «Усточикар» лагерь сярысь вераз. Отын со котькуд ар пичи журналистъёсты гожъяськыны дышетэ.

Котькуд пумиськеммы бере дышетӥсьёс трос юанъёс сётъязы, тросэзлэн школьникъёслэн асьме калыкмы сярысь кылэмзы но ӧвӧл. Соин ик ми соослы шудонъёс ортчытъям: вераллям удмурт кылын кыӵе ке кылэз, кудӥз кылӥськемезъя но валатонэзъя фин кыллы тупа, кылсярысь, юыны — juo, пу — puu, йӧ — jää но мукет. Берло «Курка, ӵӧж но мукетъёс» удмурт мультикез возьматъям. Серекъяса учкизы. Нош веранмес туала удмурт клипъёсын йылпумъяллямы. Озьы асьме bobolenin-эз финъёс Him-ен ӵошатыса учкизы но кельшытӥзы. Нош Богдан Анфиногеновлэсь «Super-удмурты» клипсэ воксё но удмуртъёслэсь кункрезьзэс сямен кылзӥзы.

Сэре милемлы асьмелы но фин школаосты возьматъязы. Ми паймыса бырим: гимназиосын вань крезьгуро инструментъёссы вань. Ма, классъёссы но соослэн рок-группалэн репетиция ортчытъян висъетэзлы тупа. Тӥни малы вань финъёс, кудъёссэ мон та улонам пумитай, туж чебер кырӟало, крезьгуро инструментэн шудыны быгато. Покчи нылпиос, кылсярысь, урокъёсын бергась пуконъёс вылын пуко, пыдкуксэс кушто, нош переменаосы одно ик ураме пото но отын бызьыло, йырзы мед тӧлатскоз шуыса. Соосты озьы котькыӵе зоро но кезьыт куазен ураме потто, пе.

Бадӟым классъёсын дышетскисьёслэн асьсэ улонзы. Соос электрон учебникъёсын дышетско, сьӧразы ноутбукъёс гинэ нулло. Урок дыръя гань-гань телефоназы пукыны быгато, куаретӥсь ӧвӧл. Угось соос дышетӥсьсэс кыло, пе. Пичиос но, бадӟымъёс но столовойын сиён асьсэос тыро. Пичи дырысенызы дышетэмын: тусьтызылэн ӝыныяз бакча емышъёс луыны кулэ, мукет ӝыныяз — пӧсь сиён.

Огаз гимназиын паймытӥз дышетӥсьёслэн висъетсы, соослэн отын холодильниксы но, тусьты-пуньы миськон машиназы но сылэ, нош эшшо — массаж лэсьтон креслозы. Паймыса ангесы чальтче ни вал! Таӵе гимназиын мон но дышетӥсь луысал!

Адями понна

Кык уй ми коми-пермяк нылмурт дорын изимы, со фин воргоронлы бызем, таре соос кык пичи пиоссэс будэто. Отын дыръямы пиоссы чик но ӧз бӧрдэ, асьсэдыз сыӵе умой возизы. Соин ик коми-пермяк нылэз юанъёсын ёртӥ, кызьы озьы пӧрме, малы фин нылпиос уг бӧрдо? Нош со шуиз, ачим но, пе, уг валаськы. Картэ, пе, пиналлэн котькыӵе йӧнтэмамез шоры чиньы пыртӥз выллем учке: ма, йӧнтэмаз но йӧнтэмаз, берло мар на, со понна мар куаретонэз. Татын али туж сюлмасько, пе, пинал кылзӥськись медаз буды шуыса, эрико будэтыны тыршо, сотэк берло мукет муртъёслэсь но сыӵе ик капчиен кылзӥськоз но урод учыре сюрыны быгатоз, пе. Ачим но анай бере, мыным туж тунсыко мукет анай-атайёс шоры учкыны но малы ке дышетскыны.

Финляндиын школаосын крезьгуръя висъетъёссы
Туспуктӥз Л. Шихова

Эшшо Суомие ветлэме тодам кылёз пӧртэм интыосын, кытчы шуак-дуак вуылӥ. Кылсярысь, Хельсинкиысь Oodi выль лыдӟиськонни, отчы котькуд мылкыд карись лыктыны но книга лыдӟыса пукыны быгатэ, нош лыдӟиськон картаед вань ке, соку книгаез дорад но кутыны луэ. Эшшо татын дунтэк компьютеръёс сьӧрын пукыны но ужаны луэ, яке 3D принтерен маке печатланы, яке ӝӧк выл шудонъёсын шудыны, яке вуриськыны, бен, вуриськон машинаос но библиотекаын сыло. Ваньмыз дунтэк. Но сое нокин уг тӥя, арам уг кары. Финъёслэсь юай но, кызьы озьы, соос шуизы: ми бадӟым налогъёс тыриськом ук, соин ик милям ваньмыз адямиос понна лэсьтӥське.

Тӥни сыӵе Суомиез усьтӥ мон аслым Sugrifest-лы луыса.

Лукерья Шихова

Ангелина Снигирева
By Ангелина Снигирева 4 декабря, 2019 16:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<