Самсоновъёс дорысь — Надежда Дурова дӥне

Ангелина Снигирева
By Ангелина Снигирева 12 декабря, 2019 15:13

4-тӥ декабре пичи пургаос ортчытӥзы Пичи Пурга ёросысь литературалэсь арзэ йылпумъянлы сӥзем сӥё-дано ужрад. Татын ик тодмо луиз: 2020-тӥ арын Удмуртиысь литературалэн шоркарез Сарапул город луоз.

Удмуртиысь литературая шоркар тебере луоз САрапул

Буйганы уг малпало

Национальной библиотекалэн директорез Татьяна Тенсина верамъя, 3 ар талэсь азьло малпан кылдӥз: мар тунсыкозэ лыдӟисьлы адӟытоно? Саклык висъяны малпазы шаерысьтымы литературалы. «Удмуртиысь муниципал кылдытэтъёслэн литератураоссылэн нуналъёссы» проектэз Национальной библиотека мытӥз 2017-тӥ арын. Со дырысен элькунысьтымы литературалэн шоркарез арлы быдэ воштӥське. Алнаш ёросысь со кӧчиз Можга районэ, нош туэ сӥлы каризы Пичи Пурга ёросысь писательёсты.

Ар ӵоже элькунамы радъяськизы Пичи Пурга ёросысь потэм писательёсын пумиськонъёс, литературалы сӥзем флешмобъёс, кылбур слэмъёс, книгаосын адӟытонъёс. Ар чебер но яркыт ужрадэн йылпумъяськиз. Отчы пыриськизы та ёросысь гожъяськисьёс, куное вуизы Национальной библиотекаысь ужасьёс но Сарапул городысь культура удысысь ужасьёс.

Пичи Пурга ёрослэн йырыз Сергей Юрин вазиськиз пичи пургаослы но куноослы:

— Малпасько, пуктэм ужпумъёсты ар ӵоже быдэстӥм, Пичи Пурга ёросысь литератураез возьматыны быгатӥм, чаклам ужрадъёсты умой ортчытӥм. Но асьмелы трос тыршоно на, калык мед лыдӟиськоз, адямиос доры литература мед вуоз шуыса. Соин оскисько, ёросамы литературалэн арез таин уз йылпумъяськы.

Ужрадын чузъяськизы кылбуръёс, веросъёс, пурга авторъёслэн чуръёссыя гожтэм кырӟанъёс. Кылбуръёссэс лыдӟизы Семён Карпов, Оксана Бисар, Анастасия Шумилова. Владимир Возняков кылбурчи но бард Выль арлы сӥзем кырӟан быдэстӥз. Любовь Тихоновалэн кылбурезъя гожтэм «Удмурт нылкышно» кырӟанэз быдэс зал быдэстӥз. Елена Миннигараева прозаик веросъёссэ лыдӟиз. Семён Самсоновлэн «Шур мед бызёз» повестьысьтыз люкетсэ сюлме пырымон лыдӟизы Пугачёво каргуртысь культурая юртысь ужасьёс Пётр Денисов но Гульнара Калимуллина.

Сӥё-дано ужрад дыръя Семён Самсонов нимо ёрос премиен пусйизы Яган-Докъя гуртысь Анна Ивановна Вологжанинаез. Та премиез сёто Пичи Пурга ёрослэсь данзэ ӝутӥсь, калык понна тыршись муртъёслы. Анна Ивановна гуртэзлэсь но ёросэзлэсь историзэ уте но эскере, книгаос гожъя, Яган-Докъяысь шаертодонъя музеен кивалтэ.

Ужрадын озьы ик ӟечкылазы Анатолий Иванович Прозоровез. Туэ со Россиысь «Семейная реликвия» премиен пусъемын вал. Кема аръёс ӵоже Анатолий Иванович выжыоссэ эскере, туспуктэмъёсты люка, ӵыжы-выжыосызлэсь улон сюрессэс гожтыса кельтэ.

Ужрад йылпумъяськиз Пичи Пурга ёрослы сӥзем поэмаен — «Маленькая поэма о Малой Родине» произведенизэ быдэстӥз Богдан Анфиногенов кылбурчи.

Ар но тырмыт ӧвӧл

Проектлэсь пусъёссэ — гожъяськон тылыез но пулэсь вӧлэм мунёез — сьӧразы нуизы Сарапулысь куноос: Сарапул городысь администрациен кивалтӥсьлэн воштӥсез Виктор Шестаков, культурая но егитъёсын ужан политикая управленилэн кивалтӥсез Игорь Манылов но Сарапулысь библиотекаослэн директорзы Лилия Быкова.

— Милесьтым юазы: малы одӥг городлы быдэс ар ӵоже саклык висъяно кариськиды? Кӧня ар кошкоз Удмуртиысь вань ёросъёсысь литератураосын тодматскыны? Но Сарапул сокем тунсыко город, одӥг ар но уз тырмы ваньзэ 
возьматыны, солэсь вань бамъёссэ лыдӟыны, — вераз Татьяна Тенсина.

Виктор Шестаков осконзэ вераз: Сарапулысь литературалы сӥзем арез ортчытыкузы, пичи пургаослэсь бере уз кыле.

— Шумпотӥськом: та проектэн сэрен асьмеос но дано гожъяськисьёсмес тодамы ваёмы, Сарапулэ вуэм куноосты но соосын тодматомы. Городамы туж трос дано муртъёс, кылсярысь, этнограф, шаерчи но священник Николай Блинов, нылкышно кавалерист но писатель Надежда Дурова, нылпи писатель Лидия Будогоская, прозаик Дмитрий Бор-Раменский но мукетъёсыз. Кӧня ке ар ӵоже «Память Сарапула» проект улсын писательёсмылэсь произведениоссэс книгаосын поттаськом, Сарапуллэн историезлы сӥзем изданиос печатласьком.

Со сяна, Сарапулын интыяськемын шаерысьтымы нырысетӥез библиотека. Со усьтэмын 1835-тӥ арын — озьыен, вуоно арын 185 ар тырмонзэ пусъёз. Ӵапак библиотекарьёс городлэсь историзэ утё, калыкез писательёсын тодмато. Нош вуоно арын сарапулъёс узыр культуразэс, тунсыко историзэс но чебер литературазэс быдэс элькунмылы возьматозы. 

Виктория Крамова

Ангелина Снигирева
By Ангелина Снигирева 12 декабря, 2019 15:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<