Пургаласен Иже — оп! шуытозь

Ангелина Снигирева
By Ангелина Снигирева 12 декабря, 2019 16:07

3-тӥ арзэ Пичи Пурга черкогурт но Ижевск город вискын ветлэ 323 номеро микроавтобус. Табере райцентрысь Иже вуыны сюлмаськон уг кылды, уго автобусъёс ветло туж ӵем — 10-20 минут вис карыса.

Ижысен Пургала таӵе микроавтобусъёс ветло. Соос интыяськемын К. Маркс ульчаын
Туспуктӥз: М. Егоров

Кӧня ке ар талэсь азьло Пургалан транспортэн югдур алама вал. Ижысь ИПОПАТ предприятилэн рейсовой автобусъёсыз бушазы — калык пуксьылӥз таксие. Нош таиз транспорт ужаз, куронъёслэсь пеганы вырыса. Кылсярысь, 13 пассажирлы чаклам «Газельёсты» 8 муртлы шуыса тупатъязы. Соку таӵе машинаен огшоры таксистъёс ужаны быгато. Нош соосты нокин уг косы рейс азьын медосмотр ортчыны, машиназэ чакланы. Пассажиръёс верамъя, 2016-тӥ арын Иже вуон понна билет 120 манет сылӥз. Озьы ке но тужгес сюлмаськытӥз, калыкез нуон-ваён трос куронъёсты тӥяса радъямын шуыса.

Соин валче 2017-тӥ арын Удмуртиысь Транспортъя но сюрес хозяйствоя министерство конкурс ялӥз Пичи Пурга но Ижевск вискын выль маршрут усьтонъя. Отын вормисе потӥз «КА 345» огазеяськон.

— Ми калыкез нуон-ваён удысын кема аръёс ужаськом ни. Тодӥськом вань куронъёсты, быдэсъяськом соосты. Но ужмес мытыкумы, нырысь ик кулэстӥм билет дунъёсты. Райцентрысь городэ нуон-ваёнлэн асдуныз 85 манет вал ке но, билетэз 60 манет карим, — шуэ «КА 345» огазеяськонлэн кивалтӥсезлэн воштӥсез Алексей Макаров.

Билет дун, азьвылэныз ӵошатыса, кулэсмиз ке но, компания чаклаз на льготаос. Кылсярысь, 1-тӥ группаысь инвалидъёс, Быдӟым ожысь ветеранъёс, пичи ожъёсы пыриськемъёс, трос нылпиё ёрмись семьяосысь пиналъёс дунтэк ветлыны быгато. Озьы ик пичигес дунын ворттыло пенсионеръёс, инвалидъёс. Оглом, льготникъёслы чакласа, нуналаз 4 рейс чакламын.

323 номеро маршрут кылдэмен валче Пичи Пургалан улӥсьёслы но интыос усьтӥськизы. Уго Ижысь Пургала буш автобусъёсты уд келя. Соин ӝыныез водительёс – пурга пиос. Табере «КА 345» огазеяськон арендае басьтӥз райцентрысь огзэ базаез. Эшшо нимысьтыз огкыл юнматэмын ёрос больницаен. Солы луыса рейсэ потӥсь водительёсты эскере фельдшер. Автобусъёслэсь ужамзэс чакла механик.

Озьы котькуд нунал микроавтобусъёс 30 рейс лэсьто Иже, 30 пол мыно Пургала. Оглом нуналлы быдэ 1 сюрс адями отчы пуксе-ваське. Али билетлэн дуныз 70 манет луиз ни. Озьы ке но та маршрутэн нуналлы быдэ ветлӥсьёс быгато дисконтной карта басьтыны. Соя ворттылон дун 50 манет луэ.

Калыкез нуись-вайись компания сюлмаське озьы ик транспортсэ выльдыны, Ижын но Пичи Пургалан быдэн одӥг выль остановкаос пуктэмын. Озьыен автобус возьмась мурт тӧллэсь но зор-котлэсь утиськемын.

Город но райцентр вискын ужась огазеяськон озьы ик басьтӥськиз районысь гуртъёсы маршрут усьтон борды. Кылсярысь, Бобья-Учае, Вуж Мӧньяе перевозчикъёслэн мынэмзы туж ик уг поты. Уго тросгес ветло пересьёс но нылпиос. Озьыен, трос пайда уд потты. Но Алексей Макаров шуэ: уксё сьӧры гинэ уйиськыны кулэ ӧвӧл, сюлмаськоно калыклэн тазалыкез но улонэз понна, пассажирез кулэ интые ӟеч транспорт мед вуттоз.

Елена Скворцова

Ангелина Снигирева
By Ангелина Снигирева 12 декабря, 2019 16:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<