Пеймытысь потон

Ангелина Снигирева
By Ангелина Снигирева 13 декабря, 2019 10:17

Кызьы туала технологиос инвалидъёслы юртто

Котькуд нунал Ижысь Дмитрий Дружинин пуныеныз ӵош ӵукна уж дураз дыртэ. 4 пыдо эшез сьӧры ӝог, сэзь вамышъя. Вӧзтӥз ортчись адями валатэк но кылёз, та воргорон мукетъёсызлэсь маин ке висъяське шуыса.

Д. Дружинин но солэн Ида пуныез
Туспуктӥз: А. Снигирёва

Сьӧд вишты

Дмитрий — сукыр. Егит воргоронэз пумитай корка дораз ик, уж дураз мынон сяменыз со вань улэм-вылэмзэ мадиз. Дмитрийлэн улонэз 29 аресозяз мукет адямиослэсь ӧз висъяськылы. Школазэ йылпумъямез бере Ижысь училищеын дышетскиз, токарь-фрезеровщик луиз, заводын ужаз, пӧртэм производствоосын тыршиз, таксист но вал.

— 29 арескам, 2012-тӥ арын, мон шӧдтэк шорысь сукыр кыли, — вера воргорон. — Огпол эшъёсыным город сьӧры ыбылӥськыны потӥмы. Мишене учкисько, нош син азям кыӵе ке сьӧд пичи вишты кылдӥз, кырмышъяй-кырмышъяй, но ӧз быры. Берло со бадӟымгес но бадӟымгес луиз. Кышкатски, больницаостӥ ветлыны кутски, Москваысь клиникаосы кӧня ке пол вуылӥ, но толыкез ӧз луы ни. Нырысь-валысь валамон ӧй вал, мар бордысь таӵе югдур кылдӥз. Берло гинэ, трос пумо эскеронъёс бере, тодмо луиз: син пушкам воспаление кутскем. Соку мон мебель лэсьтонъя огаз предприятиын тыршисько вал, предприятиямы урод материалъёс вуиллям, ӵапак со токсичной суретъёсын мон ужаськем, ачим та сярысь берло гинэ валай ини.

Туж бадӟым куректон вал аслым но, семьяелы но. Таӵе дыръя куд-огез, семьязылы вормонтэм ныпъет луизы шуыса, сукыр луэмзы бере юскисько, асьсэдыз асьсэос быдто. Соку мон кышнояськемын вал ини. Бадӟым тау кузпалылы, со монэным артэ вал, сюлэмме буйгатӥз, ӟечезлы оскон пыӵатӥз. Та секыт вакытэ ик семьяямы шумпотон ивор вуиз — кузпалы нуны возьма вылэм. Табере нылпимылы 7 арес ни, 1-тӥ классэ ветлэ.

Ньыль пыдо эш — Москваысь

— Выль улонлы мар ке бордысен дышыны кутсконо вал. Нырысь-валысь пукси компьютер сьӧры, кызьы сукыр мурт соин ужаны быгатоз шуыса. Бӧрысь тодӥ: сукыръёс асьсэлы юрттӥсь — пуны — кутыны быгато. Пичи дыръям пуные вал, соин мынам но ньыль пыдо эше луоз шуыса, юн оски. Россиысь сукыр адямиослы пуныосты дасянъя школае ветлӥ, со Москва улосын интыяськемын. Та школа пыр трос пумо пуныос пото, но поводырьлы 5 процентэз сяна уг яра.

Мон туж шумпотӥсько, ми Идаен (пунылэн нимыз — авт.) ог-огмес шедьтӥм шуыса. Со мынам эше но, синъёсы но. Со туж лякыт сямо, визьмо, кылзӥськись.

Сукыр адямилы пуны дунтэк висъяське ке но, ваньмыз сое асьсэлы басьтыны уг быгато. Нырысь ик, ачиз адями дась луыны кулэ пуныен улыны. Угось со утялтэмез, саклыкез кулэ каре, юмшаны гинэ соин нуналаз кӧня ке пол потано, миськоно, сузяно, ветеринар доры нуллоно. Мон юромо лыдъяса потӥ: пуныез возьыны арскын ог 60 сюрс манет кошке. Зэм, государство та коньдон пӧлысь кӧнязэ ке берыктэ, но унозэ аслад кисыысьтыд ик поттоно. Собере, пуны сёто таза лулсэръёсын 18 ареслэсь бадӟымъёслы гинэ, вӧзаз улӥсь адямиос пумит ӧвӧл, улон интыез пӧйшурен улыны тупамон ке.

Ида пуные Удмуртиын нырысетӥез поводырь вал. Калыкмы дышемын ӧй на вал пуныен ветлӥсь сукыр адямиослы. Соин нырысь-валысь автобусын, трамвайын кондукторъёс потыны косылӥзы яке пуны понна уксё курылӥзы, лавкаосы но пырыны ӵемысь уг лэзё вал. Сӧсыр адямиос сярысь тросгес мед тодозы, соослы тросгес саклык мед висъялозы шуыса, сукыръёслэн библиотекаязы ужаны лыктэме бере кондукторъёсын пумиськонъёс радъяллям, сукыръёслэн правооссы сярысь вераським. Озьы али кондукторъёсын валамтэос ӧвӧл ни. Али Ижын 4 пыдо юрттӥсьёссы кӧня ке муртлэн кылдӥзы ини.

Ида лякыт сямо, кылзӥськись пуны
Туспуктӥз А. Снигирёва

Идаен ми артэ 4 ар пала ини, со мынэсьтым улонме трос поллы капчигес кариз, шуыны луоз. Соин ӵош мон уж дорозям 10 минут куспын вуисько, бодыен мынысал 40 минут. Тани, ужаны мыныкум, УдГУ дорысь стоянка пыр ортчисько, Идае ӧй луысал ке, мон бодыеным вань машинаосты шуккылыса-ӵабъяса быдтысал, дыр, соос угось отын кызьы сюрем пуктылэмын. Но куддыръя мыным огнам кытчы ке мыноно луэ. Кылсярысь, концерт кылзыны, эшъёсыным мунчое — таяз учыре сукыръёслы чаклам нимысьтыз аудионавигатор юрттэ. Со вера, кытын тубатъёс, кытын сюрес вамен пыдын выжон инты, кытын кыӵе магазин вань. Светофоръёс сярысь ке… Куд-огез куараен верало, ку сюрес вамен выжыны яра, но котькытын тазьы лэсьтэмын ӧвӧл на. Горд яке вож буёл ӝуа, уг вера навигатор но. Соку вӧзам сылӥсь адямиосты юрттыны курисько. Но ӵемысь малы ке асьме калык кышкатске, номыр вератэк, дыртыса вӧзтӥм ортче. Но соку но югдурысь потыны луонлык вань — онлайн волонтёръёс. Соослы телефонэн нимысьтыз программа пыр жингыртыны луэ, озьы кытысь ке дуннелэн мукет пумысьтыз ӟуч кылэз валась адями видеосвязь пыр мынам синъёсы луэ.

Улонэ поттэ компьютер

Адями сукыр луэ ке, со кӧм пушказ ватӥськыса улэ шуыса малпано ӧвӧл. Со озьы ик ураме потэ, эшъёсыныз пумиське, ужа. Дмитрий 2015-тӥ арын лыктӥз Сукыръёслэн но ляб адӟисьёслэн элькун библиотекаязы, татын выль эшъёс шедьтӥз. Отчы ветлӥсь егитъёс асьсэлэсь клубзэс кылдытӥзы. Кӧня ке ар талэсь азьло грант утӥзы но палаткаос, спальникъёс басьтӥзы. Табере араз 4 пол инкуазе потало, чорыгало, шутэтско.

Вылезлы ӝог дышетскыны быгатэмзэ но мукетъёслы юрттыны бадӟым мылкыдзэ адӟыса, Д. Дружининэз ӧтизы библиотекае ужаны. Озьы егит воргорон татчы ветлӥсь адямиосты компьютерен вырыны, сукыръёслы тупась программаосын ужаны дышетыны кутскиз. Нялтас тодон-валан люказ Удмурт кун университетын, туэ библиотекарьлэн удысэзъя диплом басьтӥз.

— Таза адямилы телефонэн жингыртыны номыр шугез ӧвӧл ук, — азьланьтэ Дмитрий. — Нош синтэмъёс сое но лэсьтыны курадӟо. Тани ми доры вазиськиз вал одӥгез анай, нылпиезлы юрттыны курыса. Кыӵе шумпотӥз сукыр нылаш, нырысьсэ ачиз анаезлы жингыртыны пӧрмытӥз шуыса. Озьы туала техникаез кутыса, ми но улонлэсь бере ум кылиське, озьы ик Интернетэ пыриськом, мар дуннеын, Россиын луэ, тодӥськом.

Дмитрий монэным но эксперимент лэсьтӥз: синъёсме маскаен ворсаны курыса, компьютер сьӧры пуктӥз. «Привет» ке но печатла, шуиз. Уж дурын компьютер сьӧрын быдэс нуналъёсын пукисько, текстъёсме ӝог печатласько кадь. Нош таяз учыре воксё ӟудӥ: клавиатураысь кыӵе буквалэн кытын интыяськемез сярысь вунэтӥ. Ярам, Дмитрийлэн юрттэмезъя букваосты шедьтӥ, озьы ке но одӥг кыл но гожтыны ӧй быгаты. Нош сукыръёс, пе, 8 занятие куспын быдэс клавиатураез умой дышето, бӧрысь текстъёс асьсэос гожъяны пӧрмыто ни.

Алигес Дмитрий вуылӥз Нижний Новгородысь сукыръёслы улонын юрттонъя центре. Отын «Универсальный мобильный помощник» программая тодон-валан люказ. Табере пиосмурт Удмуртиысь сукыр нылпиослы но бадӟымъёслы туала программаосын ужаны юрттоз. Та проектэ пыриськем адямиос пӧлысь устоез вуоно арын мыноз Москвае, быгатонлыксэ «Словом и жестом» конкурсын возьматоз. Вераны кулэ, Дмитрий — шаерысьтымы нырысетӥез сукыръёсты дышетӥсь-тренер.

— Та программа чотын тросгес саклык висъялом сукыр нылпиослы. Угось анай-атайёслэн нылпиосынызы ялан пукыны, книга лыдӟыны дырзы уг окмы. Собере, али ваньмыз учебникъёс но Брайль шрифтэн (сукыръёслы юромо лэсьтэм шрифт — авт.) гожтэмын ӧвӧл ук. Нош та нылпиослэн но улонын асьсэдыз шедьтэмзы, кыӵе ке удысъя дышетскемзы потэ. Тани тодмоосы пӧлын массажистэ, юристэ дышетскемъёс вань. Нош смартфонэн текстъёсты но лыдӟыны, адямиосын но кусып возьыны, урамъёстӥ ветлыны, книга кылзыны луэ.

Ангелина Снигирёва

Ангелина Снигирева
By Ангелина Снигирева 13 декабря, 2019 10:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<