Марафонэ потӥзы 70 анайёс

Ангелина Снигирева
By Ангелина Снигирева 28 декабря, 2019 09:15

Елена СКВОРЦОВА

Ӝыны ар ӵоже кыстӥськиз удмурт анайёсты фото но видео лэсьтыны дышетонъя «Аныкай» школа. Та проектэз кылдытӥз егитъёслэн «Куара» огазеяськонзы Нациосын ужан политикая министерство юрттэмъя.

Байсаровъёслэн семьязы

Туала анайёс валало: нылпиосты книгаен но кырӟанэн гинэ уд визьма. Тэшкылиос зымо Интернетэ, пуксё компьютер сьӧры. Татын вань видеороликъёс, мультфильмъёс, но соос ваньмыз сямен ӟуч кылын. Соин «Аныкай» школаез кылдытӥсь Ольга Степанова чаклаз: видеоужъёс удмурт кылын но луыны кулэ. Со понна талы дышетоно асьсэды анайёсты ик.

Дышетскон очно но заочно амалэн мынӥз. Очно дышетскыса, 12 мурт

сертификат басьтӥз. Проектлэн пумаз удмурт анайёс пӧлын Интернет марафон ортчиз. Соос 3 уж быдэстыны кулэ вал. Нырысь ик туспуктэм сётоно но семьяен тодматоно. 2-тӥез уж — анайлэн нылпи будэтон амалъёсыз, визь-кенешъёсыз. Нош берпуметӥез уж — нылпиослы сӥзем видео быдэстон.

Проектэз гожтӥсьёс чаклазы: ог 60 мурт ке но пыриськысал ке, умой луысал… Нош анайёслэсь нырысетӥ гожъямъёссэс лыдӟыса, паймизы: вожвылъяськыны 
дасесь 70-лэсь трос анайёс.Соос уло городъёсын но гуртъёсын, асьме шаерысьтымы сяна, марафонэ ужъёссэс лэзизы Пермьысь, Ханты-Мансийскысь, Башкортостанысь, Татарстанысь нылъёс. Пӧлазы вань дышетӥсьёс но спортсменъёс, клубын ужасьёс но скал кыскисьёс. Ваньмыз ик ужъёс — удмурт кылын.

Марафонлэн пумозяз вуиз 34 мурт — анайёслы тужгес секыт потӥз видео кылдытон. Озьы ке но табере удмурт нылпиослы вань мае учкыны Интернетысь. Удмурт анайёс выжыкыл но пуктӥзы, киужлы но дышетӥзы, кырӟан, эктон, шудон возьматӥзы. «Аныкае» ветлыса, «Ютубын» аслэсьтыз «Азбар ТВ» каналзэ усьтӥз ни Лилия Широбокова. Табере со вӧзы ватсаськоз мукетыз ӟеч блог — сыӵе кузьым лэсьтӥзы марафонын вормисе потэм Анюта Байсаровалы.

— Туж шумпотӥсько, та ӵошатсконэ пыриськи шуыса. Нырысь кема тунаськи: пыриськом-а, ум-а? 1-тӥ ужез быдэстыны кылемын на вал 1 час но 25 минут. Малпай: пырисько. Вакчи дыр куспын пост гожтӥ, «ВКонтактеысь» бамам пуктӥ. Собере 2-тӥ но 3-тӥ ужъёсты быдэстӥ. Вормись луи шуыса тодӥ но туж сюлмаськисько: быгатомы-а меда блог кылдытыны? — сюлэмшугъяськемзэ вера Анюта Байсарова.

Вераны кулэ, вормисьлэн семьяезлы «Куара» огазеяськонысь егитъёс юрттозы видео но монтаж лэсьтыны. Озьыен, выль ужъёс азьпалан на.

Марафонлэн пумозяз вуэм котькудӥз анай пусъемын кузьымъёсын. Уката но шумпоттэ мукетыз: табере удмурт анайёслэн нылпиоссэс удмурт кыллы дышетон мылкыдзы эшшо но кужмогес луиз.

Ангелина Снигирева
By Ангелина Снигирева 28 декабря, 2019 09:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<