Кырӟантэк мӧзмыт луиз

Ангелина Снигирева
By Ангелина Снигирева Декабрь 2, 2019 16:27

Дэри ёросысь Лудорвай гурт интыяськемын шоркарлэсь 18 иськемын гинэ. Городлэн матын луэмез гуртлы ӟучомон но, мукет сюлмаськонъёс но вае.

«Ошмес гуръёс» ансамбль
Туспуктӥз: М. Егоров

Кылсярысь, Лудорвайысь шор ёзо школа 170 дышетскисьлы чакламын. Но берло дыре гурт котырысь бусыосы тачак выль ульчаос кылдӥзы. Ижын улӥсьёс татчы юрт пуктылӥзы, нылпиоссэс но вайизы. Соин валче школаын дышетскисьёслэн лыдзы 298 мурт луиз ни. 2 этажъем школаын табере 2 сменаен тодон-валан люкало. Нош дышетӥсьёслэн лыдзы ӧз йылы — озьы ик 34 мурт гинэ ужа.

Берло аръёсы Лудорвайысь нылпиос шаплы кыстӥськизы ӟучомон пала. Школалэн директорез Надежда Мерзлякова верамъя, пиналъёс ваньмыз ик удмурт кылъя урокъёсы ветло. Дышетон мынэ удмурт кылэз ӟеч тодӥсь нылпиослы чаклам программая но, удмурт кылэз тодӥсьтэм пиналъёслы чаклам «Ӟеч-а, бур-а, удмурт кыл» учебникъя но. Озьы ке но удмурт нылпиос куспазы ӟуч кылын верасько.

Удмуртлыкен герӟаськем сюлмаськонъёссы вань мӧйыослэн но. Кема аръёс ӵоже Лудорвайысь кенакъёс ветлӥзы «Ошмес гуръёс» ансамбле. Гурт калыклэсь вашкала кырӟанъёссэ утизы, быдэсъязы, соосты нош ик калыке поттазы. Кӧня ке ар талэсь азьло ансамбльлэсь 15 арзэ мыло-кыдо пусйизы. Соку коллективе ог 15 кузя ветлӥзы, кышноос пӧлын 2 воргоронъёссы но, баянэн шудӥсьсы но вал. Но берло аръёсы Лудорвайын кырӟаны мӧзмыт луиз. Малы ке шуоно «Ошмес гуръёслэн» люкаськон интызы быриз. Азьвыл соосты котыраз люкаса ужа вал библиотекарь Татьяна Чигвинцева. Табере гуртысь библиотека ворсамын, коллективын кырӟасьёслэн пыран-потан интызы ӧвӧл, нош калыкен адӟиськон мылкыдзы туж бадӟым.

Соин «Удмурт дунне» газетын ужасьёсын пумиськонэ «ошмес гуръёс», удмурт дӥсьёсын пӧрмытскыса, мыло-кыдо вуизы. Пӧлысьтызы тужгес арлыдоезлы. Анфиса Петровна Борисовалы 85 арес, со туж яратэ вераны тумошо учыръёсы шедьылэмзэ. Соку тодаз вае пичи дырзэ но, ужан вакытъёссэ но.

Сыӵе ик кыллы усто кышномурт — Сергеева Галяапай. Со туж шӧртчи песянай.

— 3 дипломе мынам! — шоккетэ со. — Скал кыскисьын ужай но огаз ӵошатсконын вормисе потӥ — диплом сётӥзы. Осеменатор но вал — таизлы нимысьтыз дышетскыны ветлӥ. Бригадирын но ужай — гурт калык понна самой адӟемпотостэм мурт луи соку. Собере 3-тӥ дипломлы кошки больницае, отын висисьёсты утялтӥсь покчи медсестра луи, — шуэ Галина Николаевна.

Кузпалыныз Архип Васильевичен Галина Николаевна уло ни 58 ар ӵоже. Нош вис шедьыку, Галяапай гожъяське. Бумага вылэ кисьтӥсько вордскем палъёсызлы, Лудорвай котырысь инты нимъёслы сӥзем чуръёсыз. Котькыӵе шулдыръяськонэ-юбилее Галяапай кылбур гожтыса мынэ. Гуртоосыз сое кылзо, ымзэс усьтыса. Матысь дыре Галина Николаевналэсь куд-ог гожъямъёссэс газет бамъёсамы но печатлалом.

Елена Скворцова

Ангелина Снигирева
By Ангелина Снигирева Декабрь 2, 2019 16:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<