Кыз ӝуатэмын, кузьымъёс дасямын

Ангелина Снигирева
By Ангелина Снигирева 12 декабря, 2019 15:07

7-тӥ декабре Шарканысь Тол бабайлэн резиденцияз сӥё-дано ӝуатӥзы шаерысьтымы валтӥсь кызэз. Табере со яркыт тылъёсын кисьтаське, Выль арлэсь вуэмзэ матэктытэ!

Тол бабай дорын куноос

Выль ар кыз ӝуатэмын «Выжыкылысь геройёс — Тол бабайлэн вордскем палъёсаз» фестиваль дыръя. Туэ со 8-тӥ ползэ радъяськиз. Шулдыръяськонэ вуылӥзы быдэс Россиысь выжыкыл геройёс, кылсярысь, Татарстанысь Кыш Бабай но Кар Кызы, Переяславль-Залесскийысь Царь Берендей, туэ нырысьсэ Шарканэ кожиз Бурятиысь Сагаан Убген, Нош Великий Устюгысь Дед Мороз но Снегурочка ӵем вуылӥсь куноослы пӧрмизы ни. Россиысь куноосын ӵош шулдыръяськиз Финляндиысь Йоулупукки.

Нош кӧня нылпиос, анай-атайёс люкаськылӥзы выжыкылысь геройёс котыре! Шаерысьтымы гинэ ӧвӧл, быдэс группаосын вуылӥзы Пермь, Киров улосъёсысь, Татарстанысь, вал Москваысь лыктэмъёс но. Оглом ог 5 сюрслэсь ятыр! Шудӥзы, бызьылӥзы, нискылазы… Валамон, Тол бабаен но Дед Морозэн ӵош туспуксьылӥзы, пельёсазы лушкем малпанъёссы сярысь сипыртӥзы, кузьым куризы.

— Берло дыре нылпиослэн мылкыдъёссы воштӥськизы, — вера Тол бабай. — Табере соос дуно кузьымъёс уг куро ни, анай-атайёссылы, апай-сузэръёссылы но вань ӵыжы-выжыоссылы тазалык сӥзё. Мон та понна туж шумпотӥсько.

Нош мар кароно, малпан мед быдэсмоз шуыса? Та пумысен Дед Морозлэн ӵектонэз:

— Туж-туж осконо, со одно быдэсмоз шуыса!

Собере Выль ар кыз котыре люкаськемъёслы дэмлаз:

— Ӟеч ужъёсты дэмен лэсьтыны каньылгес. Соин ик ойдолэ ваньмы ӵош сӥзёме: быдэс дуннеын тупаса улон мед луоз, ожмаськонъёс мед йылпумъяськозы, вань адямиос шудо мед луозы.

Бурятиысь «песятай» — Сагаан Убген — тодаз вайиз одӥг учырез:

— Кӧня ке ар талэсь азьло дорам лыктӥз егит нылкышно, туж-туж потэ, пе, пинал ваеме, но уг пӧрмы. Соку мон солы дэмлай: кутӥськы туше борды но сюлмысь потӥсь курондэ сипырты. Ар ортчыса, со нылкышнолэсь туж шуныт гожтэт басьтӥ. Лӧптэмын: пиез вордскем! Выжыкыл ӧвӧл шат со?

Выль ар кыз ӝуатскем бере шулдыръяськон бер ӝытозь кыстӥськиз на: Выль ар кыз музэн ик, яркыт тылъёсын кисьтаськиз фейерверк, люкаськемъёслэсь мылкыдзэс ӝутӥз «Эктоника».

— Берлоосыз куноосмы ог 23 час котырын кошкизы ай, — шуиз Тол бабайлэн юрттӥсез, культорганизатор Павел Митрофанов. — Милям, ужрадэз ортчытӥсьёслэн, мылкыдмы каньыл кылиз: мар малпам, ваньмыз пӧрмиз кадь! Куноосмылэн но мылкыдзы пачылаз, шӧдске. Тау каронъёсын книгамы ӝыт куспын шуныт кылъёсын быдэсак тырмиз, табере выльзэ кутоно луоз.

Бадӟым шулдыръяськон бере Тол бабай али кужым люка, пе, — гур вылын шутэтске. Но ӝоген со нылпиослэсь но, мӧйыослэсь но куронъёссэс быдэсъяны потоз. Резиденцияз шулдыръяськонъёс кутскозы ни 14-тӥ декабрьысен. Ар куспын Тол бабай дышетыны кутскем англи кылэз, табере со кулэ дыръя hello! (ӟечбуресь!) но, thank you! (тау!) но шуэ. Но кинлэн солэсь кузьым басьтэмез потоз, 10-озь ке но удмурт сямен лыдъяськыны быгатоно луоз!

Пусъём на: Шарканысь «Выжыкылысь геройёс — Тол бабайлэн вордскем палъёсаз» фестиваль сюриз ни Выль ар азьын ортчылӥсь Россиысь тужгес бадӟым но шулдыр ужрадъёс пӧлы. Нош кылем арын Тол бабай кунысьтымы тужгес трос куно пумитаны быгатӥсь 5 «песятайёс» пӧлы шедиз.

Выжыкылысь геройёс ӵуказеяз дэмен ветлӥзы на Ижысь цирке. Отын яркыт Выль ар шоу радъяськиз. Яркыт костюмъёс, тылъёсын кисьтаськись арена, волшебникъёслэсь пӧртэм сюрпризъёс — ваньмыз зэмос выжыкылын кадь пӧрмиз. Нош Тол бабай но эшъёсыз котькуд учкисез кузьымен шумпоттӥзы на.

Элина Кумачёва

Ангелина Снигирева
By Ангелина Снигирева 12 декабря, 2019 15:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<