Котькин шудо луыны быгатэ

Ангелина Снигирева
By Ангелина Снигирева 11 декабря, 2019 16:45

Арлы быдэ 1-тӥ декабре, 1988-тӥ арысен кутскыса, быдэс дунне пусъе СПИД-эн нюръяськон нуналэз. Палэнэ уг кыльы Россия но. Таин валче шаерамы уно пӧртэм ужрадъёс ортчизы.

Кин луэмез уг юа

Кызьы утиськоно ВИЧ-лэсь? Та но мукетыз сярысь специалистъёс калыклы валэктон сётӥзы трос калык люкаськылон интыосын — вуз карон центръёсын, вузъёсын, школаосын… Котькуд мылкыд карись нимтулзэ шараятэк но дунтэк эскериськыны быгатӥз ВИЧ-лы. Сыӵе пумиськон ортчиз Ижысь зоопаркын но — «Врачен поръян» ужрад дыръя. СПИД-эн нюръяськонъя центрысь профилактикая ёзысь вал­тӥсь специалист Зоя Лебедева валэктӥз: ВИЧ уг юа адямилэсь арлыдзэ но, воргорон яке нылкышно луэмзэ но, кытын ужамзэ но.

— ВИЧ паласькемъёс пӧлын вань нылпиос — элькунамы та вакытлы соос 300 пала, — шуиз эмъясь. — Кемалась ӧвӧл инфекция шараяськиз 70 аресъем кузпалъёслэн но. Соин ик одӥг адями но вераны уг быгаты, та чер палэнэтӥ ортчоз шуыса. Сыӵе адямиос луыны быгатозы матысь адямиосмы, ӵош ужась эшъёсмы, бускельёсмы пӧлын. Соос одно калгись-юись, наркотикъёсын кушласькись луыны кулэ ӧвӧл. Бадӟым кивалтӥсьёс пӧлын но туннэ вань ВИЧ-ен черламъёс.

Шаерамы та вакытлы 12 сюрс 364 муртлы ВИЧ паласькемын. Со пӧлысь 909-эз черламез сярысь туэ тодӥз. Озьы шаерамы котькуд 100 сюрс адямилы быдэ 581,6-эз борды инфекция кырмиськемын — Россиен ӵошатыса, со 18 процентлы ичигес. Но сюлмаськытэ соиз: нырысь та инфекция наркоманъёс пӧлынгес вӧлмемын вал, нош берло дыре солэн четлыказ сюре котькин — воргоронъёслэн но нылкышноослэн матысь кусыпъёссы пыр. Озьы СПИД-центрысь учётэ туэ басьтэмъёс пӧлысь 57,8 процентэз наркотикъёсын уг кушласько. Данакез уло семьяосын.

— Соин ик котькуд адями одно эскериськыны кулэ: ӧвӧл-а солэн ВИЧ-ез, — пусйиз Зоя Лебедева. — Семьяен улӥсьёслы но чакласькон сярысь вунэтоно ӧвӧл, уката но соослы, кинъёс паръёссылы быдэсак уг оско. ВИЧ-лы эскериськон трос калык люкаськылон интыосын, 1-тӥ декабрьлы тупатыса гинэ, уг радъяськылы, со котькыӵе вакытэ ортчылэ. Со сяна, меӵак лыктыны луэ СПИД-эн нюръяськон центре но солэн филиалъёсаз. Диспансеризация дыръя таӵе анализ одно сётыны уг косо. Но дэмлало. Дэмлакузы соглаш кариськоно.

Лекомиз дауръёс вискын?

Кытысь, кызьы кылдӥз ВИЧ инфекция? Та юанлы тодосчиос туннэ но тыро-пыдо валэктон сётыны уг быгато. Кӧня ке пумо малпанъёс вань. Нырысь шуэмын вал: адямиос борды чер Африкаысь маймылъёслэсь выжиз. Америкаысь тодосчи Б. Корбетт малпамъя, со учыр луиз 1930-тӥ аръёсы. Черлам шимпанзе адямиез куртчыны шедьтӥз, луоз.

Но мукетъёсыз тодосчиос верало: вирус кылдытэмын вал адямиен лушкем лабораториосын яке адямиосты быдтон вылысь, биологической пыӵал тӥрлык музэн, яке лек пыктосэз вормыны быгатӥсь эмъюм кылдытыны вырыку.

Вань мукет сямен но малпасьёс. СПИД, пе, туж мӧйы ни — вирусэз ог 1 сюрс ар талэсь азьло но, оло, улӥз ни. Но дыр ортчемъя со вошъяськиз, лекомиз. Кыӵе муген 20-тӥ-21-тӥ дауръёс вискын сокем вожомиз, адямиосты лябӟытыны кутскиз — эскеронъёс нуисько.

Озьы-а, тазьы-а — табере калык дышетске улыны сыӵе интыын, кытын поръя ВИЧ но.

Инфекция мугорысь лулпырыосы каръяське, соослэсь висёнъёсын нюръяськон кужымзэс лябӟытэ. Мугоре шедемез бере со нырысь ик ассэ нокызьы уг возьматы — ватскыса улэ. Озьы арня, кӧня ке толэзь ортчыны быгатоз. Черламзэ адями шӧдытэк но кыле. Бен, куд-огезлэн мугорыз ӟырда, кызонэз пӧсьтэ, кӧтыз чутыръя — кынман висёнъёс дыръя кадь. Но, дыр ортчыса, со тодметъёс йӧнатӥськытэк ик ортчо.

Кызьы выже но кызьы уг?

Малы адями одно тодыны кулэ ВИЧ-статусэз сярысь? Малы ке шуоно макем вазьгес со шараяськоз, макем вазьгес адями йӧнатӥськыны кутскоз — сокем кемагес но таза улоз.

— ВИЧ-ен адями 6-10 ар (куддыр 20 арозь) чиданы быгатэ, пӧртэм висёнъёсын нюръяськон кужымез сомындалы тырме, — пусйиз СПИД-эн нюръяськонъя центрысь специалист Зоя Лебедева. — Но уг йӧнатӥськы ке, ВИЧ куке но выже СПИД-э. Мугор жумме. Со борды пӧртэм паласькись висёнъёс кырмисько, адямиез утьыны уг луы ни. Но туала вакытэ ВИЧ-ез кортнаны быгатӥсь амалъёс вань ни.

Бен, ВИЧ-ен черламъёс, вань улытозязы, эмъюмъёс вылын уло — капчи ӧвӧл со. Но эмъясьёслэсь вань куронъёссэс быдэсъязы ке, семья кылдытыны, нылпи будэтыны, нунокъёссэс адӟыны быгатозы. Угось эмъюмъёс мугор пушкысь вирусъёслэсь лыдзэс шӧдскымон кулэсто, соос кышкыт уг луо ни.

ВИЧ одӥг адями бордысь мукетызлы выжыны быгатэ 3 амалэн гинэ: матысь кусыпъёс пыр, вир пыр но анайлэсь нунылы. Вир пыр паласькеменыз сэрен та чер вӧлмемын наркоманъёс пӧлын — соос ӵемысь одӥг венен бышкисько. Нош анайлэсь нунылы ВИЧ выжыны быгатэ, нылкышно нимысьтыз терапиез ортчыны пумит кариськыку. Вань куронъёсты быдэсъя ке, 98-99 процент учыръёсы нуны таза вордске. Озьы элькунамы ӧжыт ӧвӧл семьяос, кудъёсаз ВИЧ-ен улӥсь анай-атайёс 2 но, 3 но таза нылпи будэто.

ВИЧ уг паласькы мунчоын, уг выжы ӵушкон, тусьты-пуньы пыр, кышкыт уг луы чупаськыку, сое уг вӧлмыто чибиньёс но мукет нымы-кибыос, пӧйшуръёс. Соин ик ВИЧ-ен улӥсьёс озьы ик ваньмынымы ӵош дышетско, ужало, уло. Соос уж сётӥсьёслы черзы сярысь вератэк но быгато. Соослэн, ваньмызлэн кадь ик, шудо луыны правозы вань.

ТОДӤСЬКОДЫ-А?

1970-тӥ аръёсы ВИЧ-ен нырысетӥ черламъёс тодмо луизы США-ын, Швециын. Но со­ку эмъясьёс уг валало на вал, малы соос сокем ляб­ӟемын, малы мугорзылэн висёнъёсын нюръяськыны кужымез уг тырмы. Та­ӵе муртъёслэн сэръёсазы лек пыктосъёс кылдылэмын, шокан ёзвиоссы ляб­ӟемын вал.

1982-тӥ арын кыл­дӥз СПИД (синдром приобретённого иммунодефицита) кыл.

1983-тӥ арын шараямын ВИЧ-ез пуромытӥсь ретровирус.

 1985-тӥ арын тодмо луиз, кызьы палаське инфекция. ВИЧ-ез шараяны быгатӥсь нырысетӥ тестъёс кылдӥзы.

1987-тӥ арын Рос­сиын тодмо луиз ны­рысетӥез ВИЧ-ен улӥсь. Со арын ик куд-ог странаосын эскерыны кутскизы инфекцилы пумит нырысетӥ эмъюмъёсты.

1988-тӥ арын Дуннеысь тазалыкез утёнъя организация (ВОЗ) 1-тӥ декабрез СПИД-эн нюръяськонъя нуналэн ялӥз. Сое туннэ тросаз кунъёсын пусъё.

1996-тӥ арын вирус шедиз наркоманъёс пӧлы. Черламъёслэн лыдзы ар ӵоже 7 поллы тросгес луиз.

 1997-тӥ арын Удмуртиын нырысетӥез ВИЧ-ен черлам адями шараяськиз.

 2000-тӥ арын Удмуртиын улонысь кошкиз ны­рысетӥез СПИД-эн висись, со вал 55 аресъем воргорон.

 2001-тӥ арын Россиын ВИЧ вӧлмемъя эпидемия ся­рысь ялӥзы. Со вакытэ странаямы 150 сюрс чер­ламъёс шараямын вал ни.

 2016-тӥ арын Россиын ВИЧ-ен улӥсьёс 1 миллионлэсь трос луизы.

2019-тӥ арын Россиын черламъёслэн лыдзы 1,3 миллионлэсь ортчиз. Удмуртиын — 8 сюрслэсь ятыр.

Ангелина Снигирева
By Ангелина Снигирева 11 декабря, 2019 16:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<