Камӝоысь хоббит

Ангелина Снигирева
By Ангелина Снигирева 6 декабря, 2019 15:16

Кез ёросысь пичи Камӝо (Камыжево) гуртын улэ аспӧртэм художник Валерий САВИН. Искусствоез яратӥсьёслы со Менять Валёр нимын тодмо луэ. Суредась «Ижкар» творческой огазеяськонэ пыриське. Туэ «Ижкарлы» 10 ар тырмиз, солэн ёзчиосыз Ижысь «Галерея» центрын «Удмурт — пӧртман» адӟытон радъязы. Менять Валёр выставкаез усьтонлы сӥзем ужрадын дауртон-вырон (перформанс) возьматӥз. «Ижкаре» пыриськыса но, суредась Ижкаре ӵем уг вуылы — гуртысь улонэз номырин но воштэмез уг поты.

В. Савин

— Кытысь сыӵе нимды — Менять Валёр — кылдӥз?

— Монэ 8-тӥ классысен Валёр шуыны ӧдъязы. Нош Менять — атаелэн вашкала ӵыжы-выжыезлэн нимыз. Озьы ик творческой нимы луиз.

— Художникъёс бадӟым городъёсы ӵемысь кыс­тӥсь­ко. Тӥледлы пичи гуртын мӧзмыт ӧвӧл-а?

— Мон кыӵе ке Сальвадор Дали, Казимир Малевич ӧвӧл. Пу пильылӥсько, корка котырын, бакчаын созэ но, тазэ но ужасько. Юн зол герӟаськемын мон инкуазен. Мынам сюлэмы Камӝо гуртам. Гуртэ, татысь Камӝо ошмесмы, нюлэсмы монэ творчествоен вырыны бурдъяло. Таяз арын ошмесмес утялтӥм, гуртамы этнофутуристъёслэн симпозиумзы ортчиз, ошмес дуре арт-объектъёс лэсьтӥм. Гуртысьтымы песянайёс но туж юртто. Ошмес дуре сяська мерттӥзы. Эшшо маке-маке лэсьтоно на: ӟусъёс пуктоно, пулэсь кыӵе ке зӧк кенӟали лэсьтэм потэ. Мон со кенӟалилэсь кузэ син азям пуктӥсько ини.

Гуртмы бадӟым ик ӧвӧл, 120 пала улӥсез. Эшъяськыса улӥськом. Но берло дыре тырттэм (буш) коркаос тросгес луизы. Песянайёсмы верало: Валера гинэ медаз кошкы вал, гуртэнымы олома луоз.

Мон англи писательлэсь Джон Р. Р. Толкинлэсь «Властелин колец», «Хоббит», «Сильмариллион» книгаоссэ лыдӟемын. Отын пичи мугоро, дорзэс юн яратӥсь геройёс — хоббитъёс — суредамын. Мон малпасько, мон ачим но хоббит. Мон улӥсько Ширысь Западной Выселкаын — со мынам Камӝое. Куд-ог дыръя ветлӥсько Брие — со Ижкар. Алигес Казане ветлӥ — малпай, мон Минас-Тиритэ вуылӥ шуыса. Мон сыӵе Бильбо Торбинс: яратӥсько аслэсьтым нюлэсме, кушъёсме, лудъёсме.

Мынам кузпалы но сыӵе. Солы но бадӟым городлэсь палэнын улыны яраське. Пиналъёс но луоно ке — мед соос бакчае потозы, чылкыт омырен шокалозы.

— Озьыен, кышноеныды кылды тупа. Кызьы ог-огдэс пумитады?

— Кузпалэным тодматскемелэсь азьло мон малпасько вал, капитализм дуннеын яратонлы инты ӧвӧл шуыса. 37 арес тырмиз но, яратон шедьтӥ. Али ваньмызлы вераме потэ: дуннеын яратон вань!

Кышное Дэбес ёросысь Бадӟым Кизьна гуртысь. Телефон номерзэ мыным Дэбесысь киужъёсъя центрысь тодмоосы сётӥзы. Мон солы смс-ка гожтӥ. Кызьы ке арня но ӝыны ог-огмылы смс-каос ысъямы. Мон ачим уйпал удмурт бере, дӥсьтӥсьтэм сямы вань. Но огпол гожтӥ: ойдолэ пумиськомы. Озьы ӝытазе эшеным Дэбесэ машинаен потӥмы. Мынытозямы 3 пол йыромылӥмы, Пермь улосэ но кожамы. Алёналэн гуртаз вуимы но — корказэ табере ум шедьтӥське. Костя эшелы верасько, ойдо, пӧй, бертом ини. Соку кин ке пеймытысь милемлы фонарикен пишкытӥз. Машинаысь потӥ, ныл шоры учки но валай — дунне вылын яратон вылэм! Синъёсаз кизилиос пишто кадь. Кылын вераны но уг быгатӥськы. Собере 2-3 пол дораз ветлӥ. Таяз арын 12-тӥ пӧсьтолэзе сюанмы вал. 2 нунал ӵоже каримы, нырысь — туала сямъёсын, ӵуказе нуналаз — удмурт сямъёсын. Камӝо ошмесмы дорын шулдыръяськимы, вуэн пазяськимы, пол ӵужимы. Калык трос вал, быдэс деревня люкаськиз.

Анаеныз. Пичи дыр.

Мон малпасько, вань ке суред, со быгатыса, сюлмысь лэсьтэмын луыны кулэ. Нянь ке — со буй-буй, пӧсь, сюлмын пыжем нянь мед луоз. Чылкыт яратон но сюлэмысь потэ. Мон яратон пӧлы выемын. Малпасько, яратонме шедьтӥ бере, озьыен, мон дунне вылын, Инмар азьын маке шонерзэ лэсьтӥ.

— Ку суредаськыны мылкыдды вордскиз?

— Чеберлык шоры учконэ прак пичи дырысен вал. Мон ӵем огнам кыльылӥ пичи дыръям. Агай-вынъёсы, апай-сузэръёсы ӧй вал, анае-атае уже кошкылӥзы, мон весяк пол вылын суредаськыса, малпаськыса улэмын. Косяк шоры учкисько — со бӧрдэ кадь. Мон мукет дуннеос, кыдёкысь музъемъёс сярысь малпаськисько. Собере кыӵе ке кужым, тулкымен лыктыса, пылатэ кадь. Со творчество пушкы выем адямиослэн озьы луылэ, дыр.

1991-тӥ арын, 3-тӥ классын дышетскыкум, дышетӥсьмы Маргарита Алексеевна вайиз чех художниклэн Зденек Бурианлэн суредъёсыныз открыткаос. Отын вашкала пӧйшуръёс — динозавръёс, мамонтъёс — суредамын. Юн чебер. Мон со суредъёсты нырысьсэ адӟи но маке луи, пуми кадь. Синмаськи. Али но магазинъёсысь со выллем суредъёсын альбомъёсты басьтӥсько. Аслам но палеоарт ӧрын суредъёсы вань. Доисторической пӧйшуръёсты, будосъёсты ӵем дыръя суредасько.

1993-тӥ ар но тодам лыктэ. Соку фломастеръёс туж ик уг шедьыло вал. Школаын адӟылӥ: ӵошен дышетскись эшъёсы песенникъёссэс усьто, фломастерен кыӵе ке Микки Маусъёсты, Дональд Дакъёсты суредало. Мон малпасько вал: мед мынам но фломастере луысал, коть 2 ке но буёл, коть лызэз но гордэз кулэ вал. Сыӵе малпанэн школае ветлылӥ. Тётяе Пермьын улэ вал, со огпол фломастер вайиз. Шумпотонме кызьы вераны ик уг валаськы. Книгаос ачим лэсьяса, отчы фломастерен суредаськи.

Бадӟым классъёсын одноклассникъёсы клубе ветло ини вал. Валёр, шуо, ойдо сӥзьыл балэ мыном, клубын дискотека. А мар со сӥзьыл бал? Мынам йырам дуннелэн зоологической картаез, палеонтология сярысь книгаос.

— Нош суредаськыны кытын дышетскиды?

— Школа бере Дэбес педучилищее мынӥ. Мон малпасько, суредась сямен мон педучилищеын вордӥськи. Искусстволэн историеныз но татын тодматски, юн тунсыко потӥз.

«Состояние» видеоартысь туспуктэм

Сыӵе учыр вал 1999-тӥ арын, нырысетӥ арзэ Дэбесын дышетскыкум. Мон басьтӥ пакет, пушказ ДВП понӥ, ватман но мукет листъёс медаз куасалляське шуыса. Мон соин толэзь-а, мар-а ветлӥ. Пакетэ чисто сӥс кадь луэмын ини, краскаосы-кисточкаосы но усьы­­ло. Однако малы мон соин вет­лӥсько — ӧйтӧд. Кин ке вераз ини: Валера, тынад ваньмыз усьылэ, басьты выль пакет. Мынам соку гинэ йырам лыктӥз, пакетэз воштоно шуыса.

Дэбес педучилищеез быдтӥ но, йырам юан кылдӥз: нош табере мар? Гуртын улӥсько бере, гурт удысын шат ужано? Но мон тракторист но, агроном но ӧвӧл. Гуртын суредась — мар кадь со? Собере 2003-тӥ арын клубын ужаны ӧдъяй. Бӧрысь УдГУ-ысь Искусствоосъя но дизайнъя институтын заочно дышетски. Юн интересно вал.

— Тӥляд суредъёсты но вань, перформансъёс но возьматъяськоды. Асьтэлы мар матынгес луэ?

— Натюрмортъёсын, пейзажъёсын гинэ мынам кӧты уг тыры. Ӵем дыръя авангардэ, постмодернизме выжисько. Перформансъёс, видеоарт юн ярало. Мыным рамка пушкын, суред пушкын гинэ шуг ини улыны. Потэ суред лэсьтэме кырӟаса но, эктыса но, вераськыса но, шудыса но.

Мон куд-ог дыръя ачим выль кылъёс малпасько — мыным соос искусствоын юртто. Быдэс словаре вань. Со кылъёс кыӵе ке образэз возьмато. Кылсярысь, «товлори» — со маке быгылес, питырась. «Кинеситскоу» — маке чурыт, юн венё. Пичи дырысеным соосты малпасько.

Но озьы ке но суредаськись адями реализмлэсь кыдёке пегӟыны уг быгаты. Реализм ке ӧз лу, адямилэн радыз, пуштросэз уз лу. Инкуазь адямиез чеберлыклы дышетэ. Соин пейзажъёс но суредасько. Со сяна, мон Удмуртиысь пичи гуртын улӥсько — татын реализмез дунъяло.

Мынэсьтым кӧтме «Ижкар» огазеяськон тырытэ. Туж шумпотӥсько, 2010-тӥ арын монэ отчы пыртӥзы шуыса. Кучыран Юри суредасен (Юрий Лобановен) 2007-тӥ арын тодматски. Со дырысен ветлӥсько этнофутуристъёслэн симпозиумъёсазы. Соос суредасез юн будэто. Шумпотӥсько, «Ижкарысь» суредаськисьёсын эшъяськисько шуыса. Мыным со зол юрттэ. Эшъёсы верало: «Валёр, тон огнад сыӵе удмурт. Тон сӥль уд сииськы, картошка сииськод». Кызьы ке но мынам сыӵе творческой легендае кылдӥз — картошка пунем сиись. Ӧйтӧд, маин со герӟаськемын. Но маиз ке но отын вань.

Гуртаз таӵе валъёс лэсьтӥз

— Тӥ сӥль воксё уд сииське?

— Мон малпасько, адями сӥльтэк но улыны быгатоз, кызьы быгатоз улыны винатэк но тамактэк. Кызьы сӥлез ӝӧк вылэ пуктод кадь? Со сӥль куке но малпаськиз, выриз, синмад учкиз, со луло вал ук. Скалэз, сием интые, мон суредало, искусство пушкы пырто.

Мынам кузпалы но вера: сӥль, пе, кулэ но ӧвӧл. Гуртамы пудо вордӥськом, парсьпи но вузаса улӥськом, но животэз асьмеос ум вандӥське. Кузпалы шуэ огпол: ойдо, пе, Валера, птицеед чонари басьтом. Алёна, пӧй, гуртамы собыдӟа чонари улӥз ке, мон корка уг ни пыра. Серекъясько, конешно. Но чонариосты уг яратӥськы, мыным кенӟалиос ярасько. Ульчатӥ но егит ныл мынэ ке — выросъёсыз кенӟалилэн кадь, кыӵе ке рептилилэн кадь пото мыным.

— Гурт калыктэс перформансъёсын, арт-объектъ­ёсын уд ни паймыты, дыр?

— Одӥг учыр вал. Жон-Жон Сандыр (Александр Пушин) но Кучыран Юри суредасьёс 2011-тӥ арын гуртамы вуылӥзы. Со­ос дауртон-вырон возьматӥзы. Одӥг песянайлэсь, ӝыны арня орт­чыса, юазы: кинъёс, пе, гуртады ветлӥзы? А кинъёс ке, пе, черкысь попъёс-а, мар-а… Мукетыз, перформансъёсты учкыса, ми кыӵе ке сектаысь шуыса малпа. Суредасьёс шоры кадь уг учко. Но гуртамы тросэз бабушъёс перформансъёслы дышемын ини, соосты уд паймыты, бен.

Мынэсьтым куддыр юалляло: а мар тон, Валёр, шаман-а, мар-а? Пеймыт-а, югыт-а кужымъёсын герӟаськемын? Мон, пӧй, шаман ӧвӧл, мон искусствоен вырисько. Но куддыр ачим но кыӵе ке кужымез шӧдӥсько. Учыр вал. Гужем симпозиум дыръя ошмес дуре люкаським, калыкъёс, самодеятельной коллективъёс лыкто, адӟытонмы кутске ини. Нош куазь зоре. Мон бубенэн шудыны ӧдъяй но пилемъёс кошкизы.

Вавожысь Ӟозлудын ортчем симпозиумын

Кыӵе ке но кужым вань ик, дыр. Мон оскисько, вань маке сыӵе, мае валэктыны уг луы. Котькуд малпан бере точка уд пукты, дуннеын тросгес запятойёс. Соос малпаськыто асьмемыз: малы, кытысь потэмын, кин янгыш? Искусствоын но озьы ик. Мон малпасько, ӟеч суред юан кылдытыны кулэ. Учкись ваньзэ валаз ке, юанъёсыз ӧз кылдылэ ке, озьыен, искусство сюлмаз ӧз пыры. Кылсярысь, мынэсьтым юало: Валера, малы суредад сомында горд буёлэз? Малы рамаед кырыжгес? Туж ӟеч, озьыен, суред мылкыдэз бугыртӥз, малпаськытӥз. Туала искусство ӵем дыръя валантэм луэ, но соин ик тунсыко. Дуннемы но валантэм ук. Чеберлык пыр суредась возьматэ адямилэсь улонзэ. Дуннемы юн ӝог воштӥське, искусствоысь пӧртэм амалъёс тае возьмато.

— Котьку тунсыко вал — кызьы суредась вала, суред дась шуыса? Ку точка пуктоно?

— Суред йылпумъямын ке, со ӝож. Мыным потэ, точка пуктоно ӧвӧл. Суредась натюрморт суредалоз, бӧрысь ужзэ озьы но тазьы учкоз, берыктоз — суред йылпумъямын кадь. Арня ортчыса, учкоз но валалоз: нош пичияк тупатоно ке? Одӥг интые кисточказэ йӧттоз, мукетаз. Собере быдэс улонзэ озьы. Суред художниклэн дораз кыле ке, со пыр сое тупатъялоз. Мыным потэ, тросэз суредасьёс озьы ужало, ачим но сыӵе.

— Суредаськонэн сяна, маин али выриськоды?

— Мон гуртысьтымы клублэн менеджерез (али озьы шуыны кутскизы) луисько. Оломарин но выриськом. Егитъёсмы КВН-эн шудо. Пиналъёслы кружокъёс нуисько. Нылпиосын ужаны кельше. Пиналъёс но ярато кадь. Аслам но дунне шоры учконэ кыӵе ке покчи пиналлэн кадь. Мыным огпол пинал шуэ: Валерий Геннадьевич, тӥ суредме изъянтӥды! Ойдо учком-эскером, шуисько. Ӧжыт тупатӥмы но, пинал вера: Валерий Геннадьевич, тӥ волшебник-а, мар-а? Али гуртын ичигес пиналъёс, но быгатӥсьёсыз, конешно, шедьыло. Пиналлэн талантэз вань ке, со соку ик адӟиське. Со малпаськыса суредаськыны ӧдъя, тупен-тупен ужа. Мон верасько пиналъёслы: ноку но дыртыса эн суредаське, со физкультура ӧвӧл.

Кырӟаны яратӥсько, сцена вылын но кырӟаллясько. Сцена вылэ потӥсько ке — сюлмысь кырӟасько. Мар ке лэсьтӥськод-кариськод ке, сое, быдэс сюлэмдэ возьматыса, кароно. Кырӟан — искусстволэн вылӥ формаез. Кылбурчилэн но, суредасьлэн но, культура удысысь котькуд адямилэн, маке ужакуз, чеберлык кылдытыкуз, йыр пушказ кыӵе ке но крезь чузъяське. Со крезь пыр со Инмарен герӟаське.

— Та юанэз ӵемгес нылпиос сёто, озьы ке но тодэм потэ — яратоно буёлды кыӵе?

— Мыным азьло кельшо вал лыз буёлъёс. Толалтэ уй инбамлэн буёлъёсыз: коньысир (сиреневый), пеймыт-лыз, камали (бирюзовый), ультрамарин… Нош али мон ӵуж-ӵуж борддор шоры учкыса пукысал. Шунды кадь ӵуж буёл яраське мыным.

Мон малпасько, суредэз сьӧд буёлтэк суредано. Дунне вылын со окмымон ини. Суред сьӧд буёлтэк ке суредамын — со шоры юн капчи учкиське, шоканы но капчи. Сьӧд буёлэз, гордэз вожен, ӵужез бусӥрен (фиолетовый) сураса, воштыны луэ ук.

«Ижкар» огазеяськонысь эшъёсыныз

Сьӧд — со сьӧсь. Сьӧсь кужымъёс сярысь ӵем малпаськисько. Лекъяськон, вожпотон котьку вужере ватско югытлэсь. Адямилэн сюлмыз куке-куке пеймыт, сьӧсь кужымъёс пала кыстӥське. Угось сьӧсь кужымъёс пӧясько. «Властелин колец» книгаын но гожтэмын: «Адямилэсь сюлэмзэ капчи гочатыны». Нош ӟечезлы пӧяськон кулэ ӧвӧл. Соин ик искусство адямиез ноку уг пӧя. Юн шумпотӥсько, чеберлык вань шуыса. Сотэк мон улыны ӧй быгатысал. Дунне вылын юн окмымон пумит тӧлъёс. Чеберлык юрттэ мыным со тӧлъёслы пумит мыныны. Со дыре ик сьӧд кужымъёс дунне вылын ӧвӧл ке луоно, югыт кужымъёс но уз адске.

Мон туж шумпотӥсько, мынам Камӝо гуртэ вань шуыса. Мон малпасько, отын бӧрысь но суредасьёс люкаськылозы. Ваньмыз умой луоз — дуннеын яратон вань ук!

Анастасия Шумилова

Ангелина Снигирева
By Ангелина Снигирева 6 декабря, 2019 15:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<