Калык йылолъёсты яратыны дышетэ

Ангелина Снигирева
By Ангелина Снигирева 12 декабря, 2019 16:23
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Глазов ёросысь Куреггуртын трос аръёс ӵоже ужа ни бадӟым тодон-валанэн дышетӥсь Маргарита Григорьевна Чибышева. Ужезлы, нылпиослы вань сюлэмзэ сётыса тырше. Сое дэмламе потэ «Гурт адями» конкурслэн «Выжыоссэ утись» номинацияз.

М. Чибышева
Туспуктэм: Л. Гурьянова

Маргарита Григорьевна вордскиз но будӥз Балезино ёросысь Коротай гуртын огшоры удмурт семьяын. Анаез скал кыскись луыса тыршиз, атаез но ферма котырын ужаз. Пичи дырысеныз ик Маргарита Григорьевна ассэ дышетӥсен адӟылӥз. Куреггуртысь школаын дышетскыкуз, синмаськыса учкылӥз удмурт кылъя но литературая дышетӥсьсы Фаина Михайловна Егорина шоры. Нылпиос паймылӥзы но вожъяськылӥзы солэн чебер вераськыны быгатэмезлы, трос тодэмезлы.

8-тӥ классэ йылпумъямез бере Маргарита Ярысь педучилищее шонтӥз. Татын покчи классъёсты визьноданы дышетскиз. Ужан сюрессэ кутскиз Балезино каргуртын. Но сюлмыз дышетскем палъёсаз кыскиз. Куреггуртын нырысь воспитатель вал, бӧрысь покчи классъёсты дышетӥз, директорлэн воштӥсез вал. Нялтас, заочно амалэн, дышетскиз Удмурт кун университетын удмурт филология факультетын.

Али Маргарита Григорьевна Глазов ёросын одӥгез синмаськымонэз дышетӥсь. Нылпиослы со ас уженыз, улэм-вылеменыз вордӥськем музъемзэ яратон но гажан мылкыд пыӵатыны тырше, удмурт кылэз, культураез утён но калык пӧлы вӧлмытон понна сюлмаське.

Со бадӟым саклык висъя эскерон ужлы. Нылпиосын валче шаертодонлы сӥзем ужъёс дасяло, пӧртэм конкурсъёсы, научно-практической конференциосы пырисько. Маргарита Чибышева 2015-тӥ арысен Куреггурт школаын удмурт калык сям-йылолъёслы сӥзем «Зарни шыкыс» фестиваль ортчытъя. Отын нылпиос калык культураен тодматско, эскерон ужез нуыны, калык азьын вераськыны, сцена вылын асьсэды возьыны дышетско.

Визь погъёс гуртсылэсь палэнэ потало. Арлы быдэ Глазовысь В. Короленко нимо библиотекаын ортчылӥсь пумиськонъёсын ужъёсынызы тодмато, вуыло ёросазы ортчылӥсь «Истоки памяти» фестивале, Дарья Касаткиналэн Бӧня гуртлы сӥзем ужез нырысетӥ инты утӥз, Надежда Биянова чача куран йылолэныз но устоосыз пӧлын вал. Удмурт кун университетэн радъям «Наукае нырысетӥ вамышъёс» вожвылъяськонын вормисьёс луыло. Тани Станислав Третьяков но Диана Иванова дышетскисьёсыз Казане ветлӥзы, отын ортчиз Россиысь калыкъёслы сӥзем конференция.

Нылпиосын вашкала арбериосты утён сярысь но сюлмасько. Тӥрлыксы трос люкаськемын ни. Соосты нимысьтыз музей сэрег интыяно вал, сюлмаське дышетӥсь. Но рос-прос адӟытон радъяны инты уг шедьы.

Маргарита Григорьевна кусып возе ёрос но элькун газет-журналъёсын, «Мынам Удмуртие» телерадиокомпаниен. Аслаз но нылпиосызлэн ужъёсыз ӵемысь потало «Иднакар», «Ӟечбур!» газетъёсын, «Кизили» журналын.

Таиз ар Маргарита Григорьевна понна туж узыр вал вормонъёсын: вылӥ категориен дышетӥсь луэмзэ юнматӥз, Удмурт Элькунысь дано дышетӥсь луиз.

Маргарита Григорьевнаез дунъяло гуртоос но. Куреггуртысь библиотекаын ужась Любовь Петухова шуэ:

— Та кышномурт батарейка кадь, солэн пушказ трос кужымез, шораз учкыса, ачид но ӟеч мылкыд басьтӥськод кадь. Солэн трос малпанъёсыз, соосты улонэ пыӵатон борды басьтӥське ке, пумозяз вуттэ.

Нош тани мар шуэ со сярысь Глазов ёросысь Пусошур школаысь дышетӥсь Валентина Васильева:

— Маргарита Григорьевна арлы быдэ удмурт калык сям-йылолъёслы сӥзем конкурс радъя. Кыӵе со бадӟым уж! Дышетӥсь но адями сямен, милемлы, егит дышетӥсьёслы, со котыр ласянь адӟем карымон.

Та синмаськымон кышномурт вутске котырысьтыз адямиослы шуныт кыл вераны, кулэ дыръяз буйгатыны, курыны но косыны. Вазенгес ай гуртысь клубе но потаны вуттӥськылӥз, ансамбльын кырӟаз, арганэн шудӥз.

Анна Наговицына

Ангелина Снигирева
By Ангелина Снигирева 12 декабря, 2019 16:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<