Зангари пальпотон

Ангелина Снигирева
By Ангелина Снигирева 19 декабря, 2019 10:23

Аспӧртэм чылкытан. Тазьы шуыны луоз, дыр, Ирина Самигуловалэн творчествоезлы сӥзем ӝыт сярысь. Ньыль час кыстӥськиз ке но, одӥг шокчемен кадь ортчиз: кылбур-кырӟан бурдъёс вылын лопыръян, усён но ӝутскон, зэмос дунлыкъёсты валаны тыршон…

Татарстан Выль Татышлы гуртысь кылбурчи И. Самигулова
Туспуктэм басьтэмын И. Самигуловалэн «ВКонтакте» бамысьтыз

Мар бордын та кылбурчилэн кужымез? Ирина Самигулова гожъяське ваньмызлы валамон, огшоры удмурт кылын, вера сое, мае адӟе, шӧдэ, мар пумысен бӧрдэ. Солэн чуръёсыз, огласянь, сокем огшорыесь, гуртысь котькуд удмурт нылкышно озьы вераны быгатэ, дыр, но ӵапак соин, лэся, соос сюлме пыро, ӵапак соин сое ярато крезьгурчиос. Озьы чебер но сюлме пырымон кырӟанъёс вордӥсько!

Ирина Самигуловалэсь творчествозэ улонэзлэсь люкыны уг луы. Угось солэн быдэс улонэз — вӧзысь адямиосызлы тау карон.

Кам сьӧрысь удмуртъёс пӧлын Ириналэн нимыз тодмо. Со Татышлы ёросысь Эшъяськон юртысь удмуртъёслэн историяя но культурая центрысьтызы валтӥсь специалист, удмурт нылкышноослэн «Эшъяськон тугоко» клубенызы кивалтӥсь, кылбурчи, 4 пиналъёслэн анайзы.

Улон сое ӧз эркия, одӥг толэзь дыръяз анаез больницае куштыса кельтӥз. 5 толэзь дыръяз сое вуоно анай-атаез басьтӥллям. Зэм, эмъясьёс талы туж пумит, пе, вал, пиналды уз улы, укыр, пе, ляб. Но атаез чурыт луэмзэ возьматэм: «Таиз мынам нылы! Со мон шоры пальпотыса учкиз, Инмар сыӵе валан сётӥз…»

Нылзэ пыд йылаз султытон понна анаез 3 ар ӵоже больницаостӥ кыстаськоно луиз, уно синвузэ кисьтӥз. Оло, соин ик улонысь но вазь кошкиз. Нош Ирина яратонэн шунтэм сяська кадь пушйиз. Школаын дышетскыкуз ик, литература борды кыстӥськиз, кылбураны кутскиз.

1990-тӥ аръёсы «Италмас» ансамбльысь артист Михаил Чернов «Удмурт дунне» газетысь Ирина Самигуловалэсь кылбурзэ лыдӟиз, солы крезьгур гожтӥз. Озьы Ириналэн нырысетӥ кырӟанэз вордӥськиз, сое Валентина Пудова быдэстӥз. Егит кылбурчи эшшо бурдъяськиз.

— Творчествоелы сӥзем ӝыт ортчытэмме туж возьмаз атае, — шуэ ачиз Ирина, — солэн ӝуткамезъя ик мон калыкез люканы, таӵе ужрад ортчытыны малпай. Туж кышкасько вал, уг вутты шуыса. Угось берло дыре атае секыт висёнъёсын нюръяське.

Иринаезлэн ӝытаз атаез туж шудо вал, синвуосыз шапыр вияло, номыр верамез уг луы… Малпаз-а со, больницаысь басьтэм кулоно кадь пинал, ог 45 ар ортчыса, ас котыраз сомында калыкез, тодмо кырӟасьёсты но азьветлӥсьёсты люканы, сюлэм пӧсьсэ, лулкужымзэ сётыны быгатоз шуыса!

Ирина понна туэ ар — зарни. Потӥз нырысетӥ кылбур бичетэз. Ӝытэ лыктэмъёс сое басьтыны быгатӥзы. Но аслаз Ириналэн верамезъя, та книга ноку ӧй потысал, эшъёсыз ке ӧй юрттысалзы. «Зангари пальпотон» книгаез поттыны юрттӥзы камсьӧр удмуртъёслэсь культуразэс эскерись тодосчиос — Франциысь Ева Тулуз но Удмуртиысь Николай Анисимов. Потэмез бере ик книга пусъемын вал Ӵыжы-выжы калыкъёслэн литературая премиенызы (Эстония). Ӝыт дыръя та премиез Ириналы сӥё-дано сётӥзы. Кылбурчи тау кариз но сюлмаз возем мылкыдзэ шараяз: конкурсэ пыриськыкум ик, пе, Инмарлы вазиськи вал, вормыны кылдӥз ке, премиме шуге-леке сюрем пияшлэн анаезлы сёто… Озьы премизэ кылбурчи эшезлы кузьмаз.

Ирина Самигуловаез ӟеч­кыласьёс туж трос вал — «Удмурт Кенеш» огазеяськонлэн кивалтӥсез Татьяна Ишматова, литературовед Виктор Шибанов, тодмо гожъясьёс Татьяна Чернова, Любовь Тихонова, Елена Миннигараева, Люза Бадретдинова, Дарали Лели но трос мукетъёс. Ириналэн чуръёсызъя гожтэм кырӟанъёсты быдэстӥзы Марина Галичанина, Алёна Тимерханова, Николай Анисимов… Мылкыдэз тужгес бугыртӥз Удмурт театрысь актрисалэн Наталья Турлэн кылбур лыдӟемез.

— Ми Иринаен ог-огмес тазьы нырысьсэ адӟиськом, — шуиз со, — тодматским Интернет пыр. Со вазиськиз, «Вӧсь» кылбурзэ лыдӟыны курыса. Кылбур капчи ӧвӧл, но сое лыдӟыкум, мон аслэсьтым улонысьтым но пӧртэм вӧсь вакытъёссэ верасько кадь…

Быдэс ӝыт аспӧртэм крезьгуро спектакль выллем ортчиз: пичи дырысь ненег зангари сяськаос — анаезлэн яратоно сяськаосыз, зангари синъёс, инбам, оскон, «Зангари пальпотон» книга… Иринаез ӟечкыланы лыктэмъёс уноез кузьмаллязы зангари сяськаен кузьымъёс яке шудонъёс.

— Та шудонъёсты мон нылпи юртэ нуо, — ӝыт йылпумъяськыку, шуиз кылбурчи. — Куке-соку мон но куштэмын вал, нокинлы кулэ ӧй вал. Та шудонъёс, оло, пиналъёсты пичи ке но шудо карозы. Нош мон сётэм шуныттэс калыклы берыктыны мед быгатом…

Культура юртысь потыку ни, атай нылзэ ӟыгыртӥз:

— Табере сопал дуннее но капчи мылкыдын кошко ни, анаедлы верало: ваньмыз умой ортчиз… 

Елена Миннигарава

Ангелина Снигирева
By Ангелина Снигирева 19 декабря, 2019 10:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<