Дордэ чеберты ачид!

Ангелина Снигирева
By Ангелина Снигирева 6 декабря, 2019 14:40

Ижысь Эшъяськон юртын туэ 2-тӥ ползэ ортчиз Россиысь аскивалтон ёзъёслэн «Мир в диалоге» форумзы. Кенешизы пӧртэм калыкъёслэсь культуразэс, кылзэс утён, калык кусыпъёсты юнматон сярысь.

Пичи Пурга ёросысь Баграш-Бигра поселениысь А. Матвеев но С. Баграшова
Туспуктӥз: Э. Кумачёва

Кыкетӥзэ

Форуме люкаськылӥзы пӧртэм улосъёсысь муниципал кылдытэтъёслэн кивалтӥсьёссы, специалистъёс. Нимысьтыз ӧтем куноос пӧлын вал Москваысь, Санкт-Петербургысь, Пермь, Киров но мукет городъёсысь, улосъёсысь экспертъёс, кылсярысь, Кун Думаысь Национальной ужпумъёсъя комитетлэн кивалтӥсез Ильдар Гильмутдинов, Россиысь Калыкъёслэн ассамблеяенызы кивалтӥсь Светлана Смирнова, пӧртэм выжыысь калыкъёс сярысь гожъясь журналистъёслэн гильдиенызы кивалтӥсь Маргарита Лянге.

— Таӵе бадӟым ужрадэз Удмуртиын ортчытэм понна тау кареме потэ сое радъясьёслы, Нациослэн ужъёссыя федерал агентстволы, — гожтыса келям Удмуртилэн Тӧроез Александр Бречалов. — Удмуртиысь Нациосын ужан политикая министерство кичӧлтэмен, 1-тӥез таӵе форум радъяськиз вал Ижын ик. Соку валаськиз: калыкъёслэсь кусыпъёссэс юнматон вылысь синмысь синме кенешонъёс туж кулэ, ог-огмылэсь вань мае адӟем карыны.

Малы эшъяськыса улон сярысь нырысь ик кенешоно гуртъёсысь, районъёсысь, городъёсысь кивалтӥсьёсын — туж умой тодэ нациосын ужан политикая министр Лариса Буранова.

— Аскивалтон ёзъёс уката матын луо калыклы, — шуиз со. — Соос умой адӟо вань кусыпъёсты. Улон возьматэ: калыкъёс ог-огенызы тупаса уло отын, кытын огъя ужрадъёс ортчыло. Пӧртэм муниципалитетъёслэн та ласянь пӧртэм опытсы вань. Соин ик маке выльзэ малпаны но кулэ ӧвӧл — ог-огмылэсь проектъёсмес асэстыны луэ.

Форум радъяськиз 7 пӧртэм площадкаосын. Вераськизы кылъёсты азинтон, сям-йылолъёсты утён, мигрантъёсты нуналмысь улонэ пыртон но трос мукетыз сярысь. Огаз но ӧз чузъяське бадӟым, мӧзмыт докладъёс. Одӥгъёсыз мыло-кыдо мадизы проектъёссы сярысь, мукетъёсыз туж сак кылзӥзы-дышетскизы.

Асьсэлэн кадь каро

Глазов ёрос администрацилэн йырызлэн воштӥсез Елена Попова но Куреггурт администрацилэн кивалтӥсез Валентина Никитина форуме кылзӥсьёс чот лыктӥллям. Тодэммы, пе, потэ, мар лэсьтыны луэ на пӧртэм калыкъёсты огазеян вылысь.

— Милям ёросамы удмурт, бигер, ӟуч, бесерман но мукет выжыосысь калыкъёс уло, — пусйиз Елена Попова. — Соос куспын копаськон (керетон) учыръёс уг луыло — тае ми юн чакласа возиськом. Уно ужрадъёс ортчытъяськом, отчы ваньмы уртче мыло-кыдо пыриськиськом. Нош мигрантъёс ми пала туж шер вуыло.

Но одӥг-ог вуо ке но, куреггуртъёс, кылсярысь, соосты соку ик асьсэлэн кадь каро, пе. Валентина Никитина тодаз вайиз, кызьы гуртазы Украинаысь семья вуылӥз: песянай, песятай но нунокъёссы. Гурт хозяйствозы соослы соку ик улон инты висъяз. Семья куреггуртъёс пӧлын 5 ар улӥз, но бӧрысь дор палъёсаз ик берытсконо кариськиз.

— Гуртамы Ростов улосысь воргорон но кӧня ке улӥз, — азинтӥз веранзэ Валентина Михайловна. — Лэсьтӥськисьёсын ӵош вуиз вал, суд улэ кыскамын вылэм. Но гуртоос сое но асьсэ пӧлы басьтӥзы. Нокыӵе документъёсыз ӧй вал — лэсьтыны юрттӥм. Собере Ростов улосысь сузэрзэ шедьтӥм — бӧрысь воргорон со доры кошкиз.

Куреггурт поселениын озьы ик пӧртэм выжыысь калыкъёс уло, пе. Одӥгез гурт быдэсак староверъёслэн. Отын музейзы но вань — котькинэ мыло-кыдо пумитало. Ӟеч сяме пыӵаз ни пӧртэм калыкъёслэсь сям-йылолъёссэс возьматонъя смотр-конкурсъёс ортчытъян — радъясько соос нылпиос пӧлын но, мӧйыос куспын но. Куреггурт школаын ужа удмурт кылъя но литературая туж кужмо дышетӥсь — Маргарита Чибышева. Солэн урокъёсаз вань пиналъёс мыло-кыдо ветло.

Осконлэн кужымез

Балезино ёросысь культураез но калык творчествоез азинтон центрысь валтӥсь методист Людмила Баженова форуме бадӟым «шыкысэн» вуиз. Муниципал кылдытэтъёслэн, черкъёслэн, мечетьёслэн уртче ужан амалъёссылы сӥзем площадкаын со одӥгез валтӥсь спикер луиз.

Балезиноысь Л. Баженова «Сила духа» проект кылдытӥз
Туспуктӥз: Э. Кумачёва

— 2015-тӥ арын ай гожтӥ «Сила духа» проект, — шуиз со. — Нырысь ик сое улонэ пыӵатыны юрттӥз Нациосын ужан политикая министерство, нош кылем арын Президентлэн грантъёсъя фондысьтыз коньдон утӥм. Туж сюлэмшуген, жаляса учкылӥ секыт югдуре шедем семьяосысь пиналъёс шоры. Соослы юрттон вылысь ик проектэ но кылдӥз. Оглом отчы 100 пала адямиез кыскыны быгатӥм — нылпиосты сяна, анай-атайёссэс, песянай-песятайёссэс, опекунъёссэс. 6 группалы люкиськыса, ёросысьтымы культурая вань центръёстӥ ортчим — тодматским удмуртъёслэн, бигеръёслэн, бесерманъёслэн, ӟучъёслэн сям-йылолъёсынызы, пумиськылӥм ёрос черкысь батюшкаен, мечетьысь имамен. Вуылӥм Ижысь но храме. Вань кылэм-адӟеммылы йылпумъянъёс лэсьтӥськом ни палаточной лагерьын — радъяськом сое ёросысьтымы черклэн азбараз. 2 нунал ӵоже отын улӥськом, сюлмысь вераськиськом, мастер-классъёсы пыриськиськом.

Людмила Эдуардовна верамъя, проектэ пыриськем семьяосын югдур шӧдскымон умой луэ, адямиос валаны кутско, кыӵе кусыпъёс луыны кулэ матысь адямиос куспын, кызьы эшъяськыса улоно. Проектсы йылпумъяськиз ке но, отчы пыриськемъёслэн выльысь но выльысь пумиськемзы потэ, бадӟымесь планъёсын уло.

Уж огазея

Эшлыко кусыпъёсты юнматыны быгато нимаз адямиос гинэ но. Та уката валаськиз калык кичӧлтонъёслы сӥзем площадкаын.

Кез ёросысь «Живица» этнокомплекслэн нырысетӥ вамышъёсыз но туала вормонъёсыз сярысь пыр-поч вераз солэн кивалтӥсез Екатерина Лекомцева. Ижысь Михаил Смагин, ачиз но валатэк, кутскон сётӥз гын сапеген хоккеен шудонлы, шоркарын экскурсиос ортчытъянлы. Нош Балезино ёросысь Касимовъёслэн выжыоссы кӧня ке арзэ ни бадӟым фестивальёс радъяло. Табере соос огазеяны быгатӥзы быдэс элькунысьтымы Касимовъёсты гинэ ӧвӧл, троссэс бигеръёсты. Проектсы калык кусыпъёсты юнматон амалъёслы сӥзем Россиысь 2-тӥ вожвылъяськонын финалэ но потӥз. Фестиваль табере, Балезино ёросысь сяна, мукет районъёсысь но бигер гуртъёсын радъяське, вуоно арын, кылсярысь, Глазов палъёс возьмало.

— Кытын та фестиваль ортче, отын улӥсьёс ваньзэ асьсэос радъяло, — шуиз проектэз кылдытӥсь Фарида Касимова. — Кылсярысь, туэ со радъяськиз Бектышын. Отын толалтэзэ 9 кузя гинэ улӥсез, гужемзэ дачникъёсын ог 30 люкасько. Соос асьсэос ик спонсоръёс но шедьтӥзы, сцена но лэсьтӥзы. Куноосты пумитан азьын урамзэс утялтӥзы, кенеръёссэс, капкаоссэс выльдӥзы, коркаоссэс буязы — гурт улӟиз!

Ужзэс мукетъёсызлы возьматыны табере быгато ни Пичи Пурга ёросысь баграш-биграос но! Ас кужыменызы ӝутыны кутскем музейзы тани-тани усьтӥськоз. 2015-тӥ арын соос лесничестволэсь буш улӥсь бугрозэ гуртазы вайизы но. Быдэс гуртэн бадӟым лэсьтӥськон мытӥзы.

— Музеймылэн дуныз 6 миллион манет пала луиз ни, — вераз гуртлэн старостаез Анатолий Матвеев. — Татчы пыртэмын уж но — оглом 2 сюрс 768 нунал гуртоос дунтэк ужазы. Со сяна, 311 сюрс манет ас кисыосысьтызы поттӥзы. Коньдон тырмымтэен, корка котыръёсамы, урамын чылкытатӥським — юнме костаськись кортэз, пиалаез но мукет жуг-жагез сдавать карим, нош кӧня ке но уксё луиз…

Озьы Баграш-Бигралась мӧйыос но, егитъёс но гуртсэс, культуразэс, сям-йылолъёссэс огъя мылкыдын утё, мукетъёсызлы адӟем карымон луо.

Элина Кумачёва

Ангелина Снигирева
By Ангелина Снигирева 6 декабря, 2019 14:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<