Вормонъёс но шумпотонъёс люкаськемын

Ангелина Снигирева
By Ангелина Снигирева 3 декабря, 2019 14:14

21-тӥ шуркынмонэ Сарапул ёросысь Сигаево черкогуртын бадӟым ужрад ортчиз — удмурт культурая «Кам ӟардонъёс» огазеяськонлы 10 ар тырмиз. Соин мыло-кыдо но быгатыса кивалтэ Удмуртиысь дано дышетӥсь Нина Бехметова.

Н. Бехметова огазеяськонзы сярысь вера

Котыразы — нылпиос

Ужрадэ пыриськизы «Удмурт Кенеш» огазеяськонлэн тӧроез Татьяна Ишматова, Сарапул ёросысь Депутатъёслэн Кенешенызы кивалтӥсь Людмила Шеронова, Сарапул ёрос йырлэн социальной ужпумъёсъя воштӥсез Владимир Шумихин, Сигаево муниципал кылдытэтлэн йырыз Антон Язанов. Люкаськем куноос понна нырысь ик котырес ӝӧк ортчиз Сигаевоысь шор ёзо школаын.

Людмила Шеронова пусйиз:

— Толон гинэ кадь кылдӥз «Кам ӟардонъёс» огазеяськон. Нош ортчиз ини 10 ар. 2009-тӥ арын 23-тӥ шуркынмонэ вал со. Вамышен но кыкен, толэзен но аръёсын сомында вормонъёс но шумпотонъёс люкаськемын. Ёросамы 12 процент гинэ удмуртъёс уло, но соос адӟем карымон луо узыр культураенызы, сям-йылолъёсынызы, кылзэс утеменызы но кырӟаны-вераны быгатэменызы.

Удмурт кылэз дышетон, удмурт сям-йылолъёсты утён, сое нылпиослы пы­ӵатон но та школаын дышетскись пиналъёслэн вормонъёссы сярысь доклад лыдӟиз «Кам ӟардонъёс» огазеяськонлэн кивалтӥсез Нина Бехметова. Со пыр-поч мадиз огазеяськонлэн кылдэмез но азинскемез, бордазы нылпиосты кыскыны быгатэмзы но школаын ӟучомем нылпиосын анай кыл бордын ужамзы сярысь.

— Ми дунне вылын самой шудо адямиос, дыр, школаямы творческой коллективен ужаськомы, «Кам ӟардонъёс» огазеяськонмы солэн липет улаз интыяськемын, — ӝутскем мылкыдын вера Нина Бехметова. — Милемлы шуд усиз Людмила Петровна Шероноваен ӵош ужаны. Огазеяськонмы кылдыку, со милям школаенымы кивалтӥз. Со ик милемлы ужаны луонлык сётӥз, мылкыдмес бурдъяз но ӝутъяз — люкаськыны инты висъяз, нылпиосын удмурт кылъя кружок нуыны час сётӥз. Огазеяськонамы нырысь-валысь ӧжыт кузя гинэ ветлӥмы, собере тросгес но тросгес луимы, сьӧрамы нылпиосмес кыскыны быгатӥмы. Соосын пӧртэм мастер-классъёс, киужъёсынымы адӟытонъёс ортчытъяськом, удмурт сиён пӧраны дышетӥськом.

Тросэз нылпиос анай кылзэс уг ни тодо, ми доры лыктыса, выжыоссылэн вераськон кылынызы тунсыкъяськыны но вераськыны шӧтазы. Табере нылпиосмылэн вормонъёссы лачак ини, соос пӧртэм ӵошатсконъёсы пыриськыло. Ёросын но шаерамы сяна, калыккуспо вожвылъяськонъёсын но вормисе потыса бертыло. Ӵем гинэ вуылӥськомы Удмурт театре. Эшъёссы шоры вожъяськыса учко мукет выжы калыкъёслэн нылпиоссы, милям но удмурт кылэз дышетэммы потэ шуыса, нокин косытэк, асьсэос дорамы лыкто. Сыӵе нылпиосын удмурт кылэз дышетыны нимысьтыз кружок усьтӥмы. Жаляса верано, пиналъёс ас мылкыд каремзыя удмурт кылэз дышето но собере… вунэто. Озьы медаз луы шуыса, удмурт кылэз тодӥсь анай-атайёс но песянай-песятайёс доразы ас кылынызы мед вераськозы вылэм.

Вань «кам ӟардонъёслы» сюлмысьтым тау шуэме потэ. Пӧртэм интыосын тыршись нылкышноос одӥг семья кадь луимы, улонын пумиськылӥсь шуг-секытъёсмес огинын вормиськом, ог-огенымы тупаса но валаса улӥськом.

Нина Николаевна вань лыктэм куноослы аслаз киосыныз лэсьтэм мунёоссэ кузьмаз. Ваньзэ-ӧвӧлзэ 90 мунё дасям, ачиз ик соослы дӥсь вурем. Нылкышнолэн чупырес сямыз адӟиське мукет ужъёсаз но. Кылсярысь, удмурт кылэз дышетон кабинетэз быдэсак тырмемын нылпи киужъёсын. Отын ик, пичи висъетаз, музейзы ужа. Маиз гинэ ӧвӧл отын! Удмурт дӥськут но вашкала арбериос, туала суредъёс но книга-газетъёс.

Нина Николаевналэн бы­гатонлыкезлы котыр ла­сянь паймоно. Со, ӟуч кыллы но литературалы дышетӥсь, Балезино ёросын вордскем нылкышно, ӟуч гуртэ дышетыны вуыса, удмурт кылмес улӟытӥз, сям-йылолъёсмес будӥсь нылпиослы пыӵатыны тырше. Солэн ужам емышез табере син азьын.

Синмес усьтӥз, огазеяз

— Ми, Сарапул ёросэ улыны лыктыку, воксё удмурт кылын вераськись ӧй вал на, — верало Девятово гуртын улӥсь нылкышноос Екатерина Широбокова но Вера Юферева. — Нош Нина Николаевна удмурт адямилэсь сабырлы, ужась, кырӟаны-вераны быгатон сямзэ кыре поттыны быгатӥз. Табере ваньмы ӵош, одӥг радын ветлӥськом, нокин но ыммес ворсась ӧвӧл ни. Ми шоры мукет выжы калыкъёс вожъяськыса но синмаськыса учко, кыӵе тупаса но огинын улыны быгатӥськоды, шуо. Угось ми кыӵе гинэ но ужрадъёс, огазе люкаськылыса, ум ортчытъяське.

«Кам ӟардонъёс»

— Ёросын одӥг ужрад но митэк уг ортчы, дыр, — Девятово гуртысь нылкышноос борды итӥсько Шевыряловоын улӥсь Надежда Юшкова но Любовь Калмыкова. — Нина Николаевналы бадӟым тау шуэммы потэ, ёросысьтымы удмуртъёслэсь синзэс усьтӥз шуыса. Со котьку шуэ: асьмеос, удмуртъёс, йырмес ӝутыны ум быгатӥське, валанмес но быгатэммес ялан ватыны тыршиськом, керпотонмес нокызьы но вормыны ум быгатӥське.

— Мукет ёросъёсы потаса, удмурт кылэз дышетыны луонлыкъёсмы ӧвӧл шуыса ӝожтӥсько, нош тӥ, ӟучъёс пӧлын улыса, ӧжыт ке но тӥляд лыдды, нокинлэсь юрттэт курытэк, кыӵе мыло-кыдо ужаськоды, — «кам ӟардонъёсты» ушъяса, вераз Татьяна Ишматова. — Ужам уждэс адӟыса, сюлэм шумпотэ, азьланяз но тазьы ик быгатыса мед ужалоды, бадӟымесь вормонъёс тӥледлы!

Котырес ӝӧк ортчем бере куноосты культурая но киужъёсъя «Высокий берег» юртэ пыртазы. Собере вань калык кыстӥськиз «Спектр» культурая двореце. Отын бадӟым концерт возьматӥз «Кам ӟардонъёс» огазеяськонлэн бурд улаз кылдытэм «Тюрагай» ансамбль. Нациосын ужан политикая министерствоысь, «Удмурт Кенеш» огазеяськонысь, ёросысь дышетонъя, культурая но туризмъя управлениосысь адямиос таукаронъёс но синпель ку­зьымъёс сётъязы. «Кам ӟардонъёсты» ӟечкыланы ёросысь 7 удмурт коллективъёс лыктӥллям. Соосын артэ ӝытбыт чузъяськизы нылпиослэн кылбур лыдӟемъёссы. Тужгес но сюлэмез вырӟытӥз Ваня Кабановлэн «Кыӵе умой, мон тодӥсько удмурт кылэз» лад-лад кылбур лыдӟемез. Анай кыллы сӥзем чуръёсын пияш борды итӥськизы музон нылпиос но. Угось ӵапак та толэзе тупало Анайлэн но Анай кыллэн нуналъёссы.

Любовь Тихонова

Ангелина Снигирева
By Ангелина Снигирева 3 декабря, 2019 14:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<