Быдэс арлы мылкыд басьтӥзы!

Ангелина Снигирева
By Ангелина Снигирева 6 декабря, 2019 14:28
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

3-тӥ декабре быдэс дуннеын пусъё Инвалидъёслэсь нуналзэс. Удмуртиын 110 сюрс инвалидъёс уло, пӧлысьтызы 6 сюрсэз — нылпиос. Туэ Удмуртиын, сӧсыръёслы сӥзьыса, ортчиз бадӟым ужрад — Творчествоя шудонъёс.

Шудон — ӵошатскон

2003-тӥ арысен кутскыса, Удмуртиысь сӧсыръёсты люкалляло Ижысь цирке. Татын соос понна мастер-классъёс, визь-кенеш сётон ужрадъёс ортчо. Бадӟым ужрад туэ но радъяськиз. Отчы вуэм калыклы удалтӥз адӟыны Москваысь циркез — Багдасаровъёслэсь номеръёссэс.

Ужрадэз усьтон
Туспуктӥз: udmurt.ru

— Инвалидъёслы представление возьматоно шуизы но, ми соку ик соглаш луим. Шумпотымон, Удмуртия тазьы быгатэ шуыса. Цирке вуылэм адямиосты тодэ ваёнъёссы шунтозы быдэс ар ӵоже. Цирк — со шумпоттӥсь искусство. Учкись 2,5 час ӵоже вунэтэ аслэсьтыз куректонзэ, сюлмаськонзэ, залысь потэ праздник мылкыдын, — шуиз Россиысь дано артистка Карина Багдасарова.

Нош 1-тӥ декабрьысен 3-тӥ декабрёзь шаерамы ортчизы Сӧсыръёс пӧлын творчествоя 1-тӥ шудонъёс. Отын кужымзэ мертаз 389 адями.

Вераны кулэ: миым шаерамы радъяськизы калыккуспо Парадельфийской шудонъёс. Соосты азинтыса, Удмуртиын творчествоя ӵошатсконъёс ортчытъяны чакламын вал. Малпан быдэсмиз.

— Россиысь мукет улосъёсын таӵеез ӧвӧл. Нош асьмелэн Тӧромы Александр Бречалов шуиз: мытэм ужез азинтоно. Татчы ёросъёс асьсэлэсь командаоссэс келязы. Шудонъёсы пыриськисьёсты интыян, сюдон — ваньмыз дунтэк, — ивортӥз Правительстволэн Тӧроезлэн воштӥсез Анастасия Муталенко.

Сӧсыръёслы юрттыны люкамын 250 волонтёръёс. Мылкыд карисьёс, пе, эшшо тросгес вал. Волонтёръёс юрттӥзы улон интыосын но, транспортэ тубон-васьконын но, сцена котырын но. Озьы ик вожвылъяськон ортчон интыосын дежурство нуизы эмъясьёс.

Кырӟасьёс пӧлын вормиз Эгралась К. Корепанова
Туспуктӥз: А. Валеева

Оглом сӧсыръёс вожвылъяськизы 8 номинациын: кырӟан, крезьгуро инструментъёсын шудон, театр, эктон, чебер вераськон, жестъёсын кырӟан, суредаськон но аудиовизуальной искусство.

Эктон дуннеын уло

Эктыны мылкыд карисьёслы ӧсъёссэ усьтӥз Ижысь Калык творчествоя корка. Сцена вылын кужымзэс мертазы пиналъёс но, бадӟымъёс но. Эктӥзы пӧртэм сямен: хип-хоп но, вальс но, калык эктон но. Учкисьёсты паймытӥзы Глазовысь, Сарапулысь, Якшур-Бӧдьяысь, Ижысь коллективъёс. Адӟиське: кытын вань сӧсыр муртъёсын ужась хореографъёс — отын валаса пуктэмын номеръёс но, быръемын костюмъёс но.

Удмуртиысь тодмо дышетӥсь, «Чебеляй» нылпи коллективлэн кивалтӥсез Наталья Чиркова эктӥсьёсты дунъясь вал:

— Таӵе ужрадын нырысьсэ жюри луи. Мыным капчи ӧй вал дунъяны: татын жалям но потэ, синкыли но ваське. Сӧсыр муртъёслэн улонзы — со мынам семьяелэн но оглюкетэз. Соин тодӥсько, кыӵе шуг-секытъёс пыр ортчоно луэ инвалидлы. Мон данъяськисько но йыбырттӥсько ваньмызлы, кин сцена вылэ эктыны потӥз. Жюриын пукись сямен синмаськи Ижысь «Бродвей-инклюзив» коллективлы, Глазовысь «Калейдоскоп» ансамбльлы. Тани Глазовысь нылъёс но пиос «В краю магнолий» эктоназы сыӵе мылкыдзэс возьмато — быдэс улонзэс, вань быгатонлыксэс отчы пыртӥллям кадь.

Искусство но улон

Театр пӧртэм искусствоосты огазея, соин та номинацие пыриськемъёс асьсэлэсь пӧртэм быгатонлыкъёссэс возьматыны быгатӥзы. Удмурт театрын ортчем ужрадэз усьтыса, калыкез улон-вылонын утён политикая но ужъя министр Татьяна Чуракова пусйиз: таиз номинация огез тунсыкоез луэ, угось со трос калыкез огазея, дэмен ужамзылэсь емышсэс возьматэ.

Постановкаоссэс возьма-тӥзы Ижысь, Глазовысь, Уваысь коллективъёс. Жанръёссы пӧртэмесь: пантомима, мунё театр, литературно-хореографической постановка, мим клоунада. Сыӵе пӧртэм ужъёсты жюрилы дунъяны капчи ӧй вал. Огез дунъясь, Удмуртиысь калык артист Александр Мустаев, вераз:

— Театральной фестивале мыныкум, куддыр малпасько: туннэ номыр уз ни паймыты, уз бугырты ини, вылды. Но тӥляд пӧрмиз лул пушкам тылгизьы ӝуатыны, сюлэмме бурдъяны.

18 арескозь номинациын 2-тӥ но 3-тӥ степенё лауреат луиз Ижысь «Надежда» инклюзивной театр. Со 2 спектакль возьматӥз. «Надежда» Удмуртиын но Россиын ортчись фестивальёсы ӵем пыриськылэ, татчы ветлӥсь пиналъёсын ужаны вуылӥзы Москваысь специалистъёс но. Художественной кивалтӥсьсы Константин Мехряков вера: ми котьку тыршиськом учкисьлы зэмос искусствоез возьматыны. Учкись мед вунэтоз, сцена вылын инвалид нылпиос шудо шуыса.

19 арескысен группаын вормисе потӥз Ижысь сукыръёслэн «Мечтатели» театрзы. Кылем арын ортчем Парадельфийской шудонъёсын соослэн «Новая жизнь» пантомимазы озьы ик 1-тӥ интые потӥз. Постановкаязы чеберлык пыр зэмос улон возьматэмын: спектакльзы сӥземын сукыр муртъёслэн пуш дуннезылы.

Можга ёросысь Н. Соловьёв крезьгуро инструментъёсын шудонын лауреат луиз
Туспуктӥз: К. Рыбакова

Постановкаос бере театрын ортчиз актёръёслэн искусствозылы сӥзем мастер-класс. Пиналъёс дышетскизы пӧртэм мылкыдъёсты мугор выросъёсын, ымнырын возьматыны.

Ог-огмес гажано

Творчествоя шудонъёс йылпумъяськизы Ижысь «Аксион» культурая дворецын бадӟым гала-концертэн. Татчы люкаськиз ог 400 мурт. Устоосыз ӵошатскисьёс номеръёссэс сцена вылын возьматӥзы. Со сяна, фойеын радъямын вал ӵошатсконъёсы пыриськем кибашлыослэн киужъёсынызы, суредъёсынызы адӟытон.

Шудонъёсты радъян пумысен мылкыдзэ вераз Россиысь Парадельфийской комитетлэн кивалтӥсез Наталья Крель:

— Шумпотӥськом, Удмуртиын Парадельфийской шудонъёс ортчем бере сӧсыръёс ӧз вунэ шуыса. Россиысь вань улосъёс пӧлын Удмуртиын гинэ Правительство радъя сӧсыръёс понна творческой шудонъёс. Али ужпуммы — малпаськыны, мар умой пӧрмиз, мае эшшо ӟечгес радъяно на. Туж шумпоттэ, пӧртэм ёросъёсысь инвалидъёс Иже лыктӥзы шуыса. Со сяна, котькуд номинациын ӵошатскисьёсты профессиональной жюри дунъяз. Соос ӧз учке, азязы сӧсыр адямиос шуыса, 
быгатонлыкъёссэс дунъязы. Угось та фестиваль гинэ ӧвӧл, та нырысь ик ӵошатскон, соин вормисьёслы куронъёс бадӟымесь вал. Матысь дыре валтӥсез сюлмаськонмы — тросгес специалистъёсты инвалидъёсты дышетон удысэ кыскон.

Правительстволэн Тӧро-езлэн воштӥсез Анастасия Муталенко оскытӥз: вуоно арын ӵошатскон эшшо но ӟечгес радъямын луоз.

— Таяз арын ӝож-тӥськисьёс вал: куд-ог коллективъёс ӧз вуттэ заявка ыстыны. Соин вуоно арын талы тросгес дыр висъялом, со сяна, куриськон дасяны дышетом. Ми вань мылкыдъёстэс одно ик чакласьком, малы ке шуоно та праздник тӥ понна ортче. Ужрадэз ар ӵоже дасям, та трос калыклэн валче ужез луэ. Пӧртэм площадкаосы вуылыса, мон валай: ужмы юнме ӧй вал. Сомында кужым, задор мылкыд тӥ бордысь потэ! — вазиськиз А. Муталенко.

Татьяна Чуракова министр нимысьтыз пусйиз: та шудонъёс сӧсыр адямиос понна гинэ уг радъясько. Соос чакламын вань адямиослэсь кусыпъёссэс ӟечгес карыны. Сӧсыр-а тон, таза-а — та шоры учкытэк, ог-огмес гажаса улыны дышетсконо.

Гала-концертын вань номинациосысь яркыт номеръёсты возьматӥзы. Лауреатъёс крезьгуро инструментъёсын шудӥзы, кырӟазы, эктӥзы, кылбур лыдӟизы. Ужрадэз вунонтэм каризы дворец азьын ортчем шулдыр дискотека но салют.

Елена Скворцова, Анастасия Шумилова

Ангелина Снигирева
By Ангелина Снигирева 6 декабря, 2019 14:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<