Бадӟым семьяен кадь улӥськомы

Ангелина Снигирева
By Ангелина Снигирева 12 декабря, 2019 10:00

Сьӧлта ёросысь Узи черкогуртамы улэ лякыт сямо, калыклэсь улонзэ капчиятон, ӟечомытон понна сюлмаськись воргорон Сергей Иванович Батуев. Со 7 ар ӵоже поселенимылэн кивалтӥсез вал, трос лэсьтӥз гурт улонэз котыр ласянь азинтон понна. Сое дэмламмы потэ «Гурт адями» вожвылъяськонлэн «Ӟеч сюлэм» номинацияз.

С. Батуев

Сергей Иванович вордӥськиз Сьӧлта ёросысь Квашур гуртын. Школазэ йылпумъямез бере дышетскиз Ижысь гурт удысъя академиын, отысь инженер луыса потӥз. Ужаны берытскиз вордскем ёросаз. Егит специалистэз шумпотыса кутӥзы Узиысь «Звезда» хозяйствое. Ужан сюрессэ со мытӥз валтӥсь инженер бордысен. 2005-тӥ арысен 8 ар ӵоже ас удыссэ валаса нуиз. Хозяйствоысь ужасьёс сое гажаллязы, сюлмо, юрттыны дась луэмысьтыз, яратӥз сое поселениысь калыкмы но.

Озьы сое гурт калык бырйиз поселенилы кивалтӥсе. 2012-тӥ арысен та ныпъетэз но оскымон нуиз. Туэ сӥзьыл сое куризы Колесурысь «Гигант» хозяйствоен кивалтӥсь луыны.

Солэн кивалтэмез улсын трос лэсьтэмын вал муниципал кылдытэтмес азинтон понна. Сергей Иванович сюлмаськиз ульчаосты югдытон, сюресъёсты тупатон пумысен. Одӥгез шумпотымон воштӥськон вал — черкогуртамы кема витем чагыр эстӥськон вуиз. Нош 2017-тӥ арын поселенимы выль машина утӥз. Озьы ёросын муниципал кылдытэтъёс куспын ялэм конкурсын ми котькинэ азьпалтӥмы. Возьматӥмы, мар лэсьтӥмы ар ӵоже: кызьы сюресъёсмес тупатъямы, кӧня калыкмы спортэн эшъяське, кӧня ёрос бюджетэ налогъёс вуттӥмы, кызьы утялтӥмы синпелетъёсмес но трос мукетсэ. Валамон, азьпалан луон понна вань калык огкылысь тыршиз, но кивалтӥсьмы бурдъятэк, ваньмыз со ӧй пӧрмысал, дыр.

Сергей Иванович бадӟым саклык висъялляз гуртоос пӧлын спортэз азинтонлы. Ачиз но со ӵем гинэ куас вылэ султылэ, пыдын бызьылэ, ёросамы ортчылӥсь ужрадъёсы ялан пыриськылэ. Солэн кичӧлтэмез улсын поселениямы спортэн вырыны яратӥсьёслэсь команда бичамын вал, табере соос ёросын ортчылӥсь ужрадъёсы пыриськыло, валче мугорзэс кыдато, ӵошатсконъёслы дасясько.

Сюлмо кивалтӥсьмылы луыса Узиын куасэн бызьылон сюрес югдытэмын вал, табере гуртоос ӝытпал но куасъёсын мугорзэс кыдатыны быгато. Лымы усе гинэ, пичиез но бадӟымез куасэн ширъяны пото ни. Нялтас вераса, ёросын таӵе трасса нырысьсэ ми дорын кылдӥз.

Озьы ик вератэк кельтыны уг яра мукетсэ но: Узиын нылпиос но спортэн гажасьёс понна кема витем площадка кылдӥз. Табере гуртоосмы уг ёрмо ни, кытын нылпиосын юмшано, кызьы ваньмон дырез ортчытоно. Вань калык тау каре Сергей Ивановичлы туала шутэтскон инты понна. Со сяна, Сергей Иванович сюлмаськемъя гуртамы ужась егитъёслэн огазеяськонзы кылдытэмын вал. Озьы поселениысь пинал калык ачиз аслэсьтыз улонзэ шулдыргес карон понна пӧртэм ужрадъёс малпа но радъя.

Сергей Иванович ачиз егит ке но, со доры визь-кенешлы, юрттэтлы лыктылӥзы ваньмыз — егитэз но, арлыдоез но. Со котькинэ огкадь кылзылӥз, быгатэмезъя юрттылӥз.

Озьы пӧртэм пичи ужъёс пыр но котькуд адями адӟе, кызьы солэн улонэз сярысь поселенилэн кивалтӥсез сюлмаське. Шуыны луоз, Узи поселениысьтымы ваньмыз калык одӥг бадӟым семьяын сямен улыны кутскимы.

Сюлмысьтымы тау кариськом Серей Ивановичлы ӟеч лэсьтэм ужъёсыз понна, оскиськом, азьланяз но троссэ валче берыктыны пӧрмытомы на.

Анна Снигирёва

Ангелина Снигирева
By Ангелина Снигирева 12 декабря, 2019 10:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<