Арганэз шудэ, качыез сюдэ

Ангелина Снигирева
By Ангелина Снигирева 28 декабря, 2019 12:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмуртиысь тужгес чебер пальпотӥсь арганчи Александр Ашихмин ӧтчаське бадӟым концертаз. 1-тӥ феврале «Аксион» культурая юртын арганчиез 25 арес тырмонэныз ӟечкылалозы шаерысьтымы мукет тодмо артистъёс.

А. Ашихмин

Гур бичаз… мунчоын но гаражын

Сюлмы мынам — арган, шуэ Александр Ашихмин. Крезьгуро инструментсэ со киысьтыз 18 ар уг куя ни. Саша пичи дырысеныз крезьгурез кылыса будӥз. Уго анаез Ирина Владимировна — кырӟась, Шаркан ёросысь Пашур-Вишур гуртысь культурая юртэн кивалтӥз. Крезьгурез яратон мылкыдыз выжиз Саша пиезлы но. Уката 5 аресаз киросагаез солы арган кузьмаз.

— 6 аресам ветлыны кутски школаысь арганэн шудонъя кружоке. 2 арня ортчыса, дышетӥсе шуиз: тон ас поннад шуд, кырӟанлы гур пуктыны быгатӥськод ни, мукет пиналъёс сьӧрад уг вутско, — пичи дырзэ тодаз вае арганчи.

Озьы Саша кыӵе ке кырӟанэз кылэ но, чиньыосыз гур бичаны кутско. Огпорма арган куаралэсь жадем семьяосыз пизэс мунчоын шудылыны косӥзы. Но гуртысь клубын ужась аккомпаниатор Николай Майоров Сашалэсь мылкыдзэ бурдъяз — пияш со доры гаражаз арганэн ветлэ вал. Нош шуныт куазен пичи арганчи ульчаысь ӟус вылэ интыяськылӥз. Котыраз пересь кенакъёс пуксьылӥзы, ушъяллязы, тыбыраз вешаллязы. Мӧйыослэсь кырӟамзэс кылыса, Саша арганэн гур пуктыны пӧрмытъяз.

Соку Ирина Владимировна валаз: пиезлы азинскыны луонлыкъёс кылдытоно. Озьы 4-тӥ классысен Сашаез дышетскыны пыриз Иже — усточи нылпиослэн элькун школа-интернатазы. Татын ӵапак баянъя класс люказы. Саша Ашихминлы удалтӥз дышетӥсен — крезьгурез эшшо ӟечгес шӧдыны юрттӥз Удмуртиысь культура удысысь дано ужась Владимир Зубков. Баянэн сяна, Саша шудӥз фортепианоен, трубаен, арганэн. Нош собере усточи нылпиос доры вуиз выль дышетӥсь — «Айкайысь» артист (али театрлэн чеберлыкъя кивалтӥсез) Олег Бимаков. Ӵапак солэн инструментэн шудон манерезлы синмаськиз егит арганчи.

Республикаысьтымы усточи нылпиос пӧлын дышетскытозяз, Саша вуиз «Ингур» капеллаын кырӟаны, эшъёсыныз ӵош кунгож сьӧры потаны, Европаысь фестивальёсы вуылыны. Но 8-тӥ класс бере дышетсконаз вис луиз: сюрлызэ вӧсь каременыз валче усточиослэн школаысьтызы кошкиз, Шарканэ берытскиз.

Нырысь-валысь Сашалы нокыӵе секыт арбери ӝутканы ӧз лэзе. Озьы арган сылӥз корка сэргын. Но кема отын ӧз тузонӟы — Саша сое нокин адӟымтэ дыръя кутылӥз. Собере Шарканысь крезьгуръя школае куриськиз — та удысын тодон-валан люканзэ йылпумъямез потӥз.

Ар ортчыса, Саша Ижысь школае 10-тӥ классэ вамыштӥз. Нош арганчиез шоркарын синйылтыса вуиллям ни вылэм. Нырысь ик эшеныз Владислав Николаевен ӵош Эшъяськон юртын шудӥзы. Собере дуэтэз огаз концертэ ӧтиз удмурт ужбергатӥсь Роман Дементьев. Ӵектӥз пиослы «АРГАНавты» нимын сцена вылэ потаны. Но 2012-тӥ арын пиослэн дуэтсы куашказ. Сцена вылын асме огнам эркынгес шӧдӥсько, шуэ Саша.

Удмурт эстрадае вуыса, Саша валаз: электрон аранжировка улсын арганэн шудон туж туала но яркыт кылӥське. Зэм, со амалэз Саша ачиз ӧз малпа. Тазьы шудэмзэ со нырысь адӟиз Иван Котельниковлэсь. Собере кӧня ке композиция гожтыны юрттӥз Шарканысь электрон крезьгурен вырись Павел Эль.

Удмурт учкись синмаськиз Саша Ашихминлы: задор шудэ, сцена вылын капчи возиське, вань сюлмысьтыз пальпотэ. Соку удмурт дискотекаосты радъясь Электроники Djs егит арганчилы выль композициос кылдытъяны басьтӥськиз. Озьы кылдӥзы «Чибориё», «Отӥ но лыктэ туганэ но» ужъёссы. Со дырысен А. Ашихминэз туж яратыса пумитало «Эктоникалэн» дискотекаосаз.

Ӝытазе артист, нуназе стилист

Культура удысын тыршись адямиос ӵемысь пумит луо, та сюрес кузя асьсэлэн нылпиоссы вамышто ке. Соин, дыр, Сашалэн но семьяосыз сюлмаськизы, пизы рос-прос профессия мед басьтоз шуыса. Озьы арганчи нош ик Удмурт кун университетэ вамыштӥз — юристэ дышетскыны пыриз. 2 ар чидаз но валаз: законъёсты бугыръяны солы мӧзмыт. Вис карыны малпаз, оло, университетэ берытскемез потоз на. Со куспын концерт радъян ужен выриз, ачиз но сцена вылэ потаз, конкурсъёсы пыриськылӥз.

— Мыным кельше асме эскерыны мукетъёс пӧлын. Али арганэн шудӥсьёс тросгес но тросгес луо. Пӧлазы вань туж вожъяськымон усточиос. Соин соосын ӵошатскем, маке выльзэ адӟем потэ, — шуэ Александр.

2011-тӥ арысен А. Ашихминэз туж яратыса возьмало Башкириын. Татын 2 арлы огпол ортче арганчиослэн фестивальзы. Отчы Саша 5 пол вуылӥз ни. Ӵапак та фестивальын тодматскиз Россиысь арганчиослэн зарни списоказы пыртэм Азат Атангуловен. Азат — зэмос виртуоз. Арганэн но, курай гумыен но огдыре шудыны пӧрмытэ. Табере та артистэз А. Ашихминлэн концертаз, Ижын, адӟыны луоз.

Александр пӧртэм конкурсъёсысь лауреат луыса бертэ. Арганчиосты дунъясьёс пусъё: А. Ашихмин бордаз кыске арганэн задор шудэменыз но, сцена вылын ассэ эркын воземеныз но, шунды кадь пальпотэменыз но. Соин 2016-тӥ арын Удмуртиын ортчись «Бабушкина дача» фестивальын со устоез арганчи луиз но ужрадысь кузьымен — выль арганэн — кошкиз.

Озьы ке но арган — со хобби, шуэ Саша. Нош ужаны со мукет удыс бырйиз — йырси ӵышкисе дышетскиз. Семьяосыз талы чик ӧз пайме. Уго 7-тӥ классысен кутскыса, Саша анаен сузэрзэ но, атаен агайзэ но ӵышке. Киыз татын но мынэ. Тодон-валан люкаса, 3-тӥ разрядэн парикмахер луиз. Табере 2 ар ӵоже калыкез ӵышке, укладка лэсьтэ, йырси буя.

— Сарафан радио туж усто ужа вылэм. Клиентъёсы нуналысь нуналэ тросгес луо. Мыным кельше адямиез чебер карыны. Со понна киез но волятоно, тодон-валанэз но будэтоно. Ӵемысь ветлӥсько дышетскыны. Алигес вуылӥ Екатеринбурге мастер-классэ, сое ортчытӥз тодмо стилист Максим Никиточкин, — вера Александр Ашихмин.

Куддыръя Саша доры выль тусбуй утчаны вуо удмурт концертъёсы ветлӥсьёс но. Соин А. Ашихмин понна арган но, качы но номырин воштонтэм луизы. 

Алёна Ионина

Ангелина Снигирева
By Ангелина Снигирева 28 декабря, 2019 12:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<