500 артист, 400 дӥськут

Ангелина Снигирева
By Ангелина Снигирева Ноябрь 8, 2019 15:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Глазовын ортчем шоулы синмаськымтэ адямиос ӧй вал, дыр. Нош кӧня кужым понэмын, кӧня адями тыршемын, 2 час яркыт мед ортчоз шуыса. Кызьы дасяськизы сое ортчытыны, кыӵе мылкыдъёс кельтӥз ужрад?

Сценариез дасясь, валтӥсь режиссёр Павел Поздеев:

П. Поздеев

— Удмуртиын таӵе шоу нырысьсэ ортчиз. Нырысьсэ сомында техника кутэмын вал. Зэм, мар ушъяськонэз, таӵе туала техникаен котькудӥз чебер шоу лэсьтыны пӧрмытысал. Нош ужрадлэн пуштросэз ласянь ке, сценариез гожтыны выри, шаермылэсь историзэ лыдэ басьтыса. Учкисьёслы яраз бере, туж умой. Но мар бордын ужаны трос ай.

Ужрадэз одӥгез нуись Богдан Анфиногенов:

Б. Анфиногенов

— Ужрадлы кылбуръёс гожъяны курыса, мыным вазиськиз валтӥсь режиссёр Павел Поздеев. Ми соин далайгес ӵош ужаськом ни. Удмуртилэн историез мыным матын но тунсыко (Богдан Удмурт кун университетысь историяя факультетэз йылпумъямын — авт.). Соин кылбур чуръёс ӝог пӧрмизы. Но нырысь-валысь ӧй тоды, соосты ачим ик бадӟым ужрад дыръя лыдӟо шуыса. Трос калык азьын кылбур лыдӟыны, кырӟаны мыным секыт ӧй вал. Кылъёсы прозаен луысалзы ке, соку секытгес йӧтысал, дыр. Ужрад бере учкыса потӥ на шоулэсь трансляцизэ, палэнысен со эшшо но яркытгес, учкымонгес пӧрмиз кадь.

«Мынам Удмуртие» телекомпаниысь валтӥсь редактор Влада Одинцова:

В. Одинцова

— Суред чылкыт, чебер мед пӧрмоз шуыса, Глазове дасяськыны одӥг нуналлы вазьгес лыктӥмы. Нош куд-ог операторъёсмы татын 3 нунал потатэк улӥзы.

Телеканалысь операторъёсмы тазьы ужазы нырысьсэ. Огвакытэ аренаын 9 камера вал, соосты чакласа возиз 7 оператор, эшшо нимаз робот-камера вал на. Трансляция нуиськиз аренаысь экранъёсын, со сяна, меӵак эфир радъямын вал «Удмуртия» телеканалын но соцсетьёсын. Суред учкись доры ӝог мед вуоз шуыса сюлмаськимы. Пӧрмиз кадь. Зэм, ваньмыз вӧй вылтӥ кадь ӧз ортчы. Кылсярысь, огвакытэ одӥгезлэн камералэн суредэз ышиз — проводэз кытӥ ке чигиз. Но учкисьёс сое ӧз но шӧдылэ. Инженеръёсмы но операторъёсмы туж шаплы ужазы — чигем интыез ӝог тупатӥзы. Ужрад бере бер уйин гинэ Ижкаре вуимы, но ӵуказеяз ӵукна ваньмыз уж дурын вал ини. Иворъёс поттоно ук, шутэтскыны дыр ӧвӧл.

Ужрадэз радъясь, Удмурт кун филармониысь кун праздникъёсты дасянъя ёзэтэн кивал­тӥсь Елена Блакитная:

Е. Блакитная

— Шоу вӧй вылтӥ кадь мед ортчоз шуыса, арня ӵоже Глазовын ужам. Нош репетициосты толэзь талэсь азьвыл радъяны кутскимы ни. Ужрадэ пыриськизы 500 пала артистъёс. Соос пӧртэм эпизодъёсын, номеръёсын эктӥзы, кырӟазы. Котькуд номерлы нимаз костюм дасяно вал, озьы оглом 400 пала дӥсь вуремын. Озьы ик нимысьтыз ужрадлы шуыса 3 сюрс мында браслетъёс басьтӥмы. Сюлмаськон кылдӥз выжлы нимысьтыз вӧлдэт утчанэн, угось со вылэ тылъёсын суред умой пуксьыны кулэ вал. Тау Тулаысь эшъёсмылы — соос туж ӝог вӧлдэтэз дасязы.

Глазовысь «Молодёжный центр» огазе­яськонлэн ки­вал­тӥ­сезлэн вош­тӥсез Елена Белоусова:

Е. Белоусова

— Шоуэз усьтонэ пыриськизы городысь 70 пала волонтёръёс — ссузъёсын дышетскисьёс. Соос куноосты пумитазы, куд-ог номеръёсын эктӥзы. Пиналъёсмы та уж борды мыло-кыдо басьтӥськизы, соосты ведь нокин кужмысь ӧз куры, асьсэос лыктӥзы, юрттэт ӵектӥзы. Котькуд нунал ӵукнаысен бер ӝытозь репетициос вал. Со понна студентъёс юромо дышетсконлэсь но мозмытэмын вал. Дорамы со быдӟа ужрад ортчытыны быгатӥм шуыса, ваньмы шумпотэмын. Асьмедыз кытын ке Москваын кожамы, угось сыӵе яркыт но зол шоу пӧрмиз.

Ижысь учкись, Т. Борисов югды­тӥсьлэн ӵыжы-вы­жыез Раиса Корепанова:

Р. Корепанова

— Ужрад туж кельшиз: тылъёслэн шудэмзы, выж вылын суредъёслэн вошъяськемзы, ваньмыз али ке но син азям. Сценарийлэн пуштросэз но туж валаса, мур лэсьтэмын вал. Но ваньмызлэсь зол сюлэмме шунтӥз Богдан Анфиногенов, солэн ӟуч но удмурт кылын кылбуръёсыз туж золэсь йӧтӥзы. Та удмурт пияш вӧзам пукысал ке, данъяськыса ӟыгыртысал кадь потӥсько. Зэм, ужрад кутскон азьын дыр бушгес ортчиз: ӧз тырме мастер-классъёс, киужен адӟытонэз, вуз каронэз но паськытгес радъяны луысал. Учкыса потӥ Удмуртилэн кунлыкезлы сӥзем адӟытонэз. Отысь Трокай агайлэсь пинал вакытысьтыз туспуктэмзэ синйылтӥ, сое нокытысь адӟеме ӧй на вал. Санкт-Петербургысь архивын, пе, утиське. Отчы вуылӥ ке, одно ик архиве пырало.

Дасяз Ангелина Снигирёва

Ангелина Снигирева
By Ангелина Снигирева Ноябрь 8, 2019 15:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<