Ӵошен ке, улон капчи

Ангелина Снигирева
By Ангелина Снигирева Ноябрь 14, 2019 16:27

Пичи Пурга ёросысь Кечол каргуртысь клубысь, библиотекаысь калык уг бырылы — та учреждениос одӥг липет улын интыяськемын. Пӧртэм ужрадъёс уртче радъялляло — нылпиослы но, мӧйыослы но мӧзмыны маза уг сёто. Одӥгаз пумиськонэ вуылӥм ми но, «Удмурт дунне» газетын ужасьёс.

Пичи Пурга ёросысь Кечол каргуртысь «Капчи мылкыд» ансамбль.
Туспуктӥз М. Егоров

Ужрадэ та рад но лык­тӥллям школьникъёс но, мӧйыос но, дышетӥсьёс но, почтаын ужасьёс но… Кечолъёслэн капчи мылкыдзы, клубысь ӧсэтӥ пырыку ик, шӧдӥськиз. Кунооссэс соос перепечен, кырӟанъёсын пумитало.

Клубын ужасьёслэн, библиотекарьлэн матысь юрт­тӥсьсы — «Капчи мылкыд» коллектив. Дасо ар талэсь азьло со кылдытэмын ни. Кырӟасьёсты пумен вошто выльёсыз. Но мылкыдзы ялан капчи. Культурая юртэ арнялы быдэ репетициосы люкаськыло.

— Вазен коллективенымы кивалтэ вал клубын ужась Надежда Абрамова, — шуэ кырӟасьёс пӧлысь одӥгез, Кечолысь ветеранъёслэн огазеяськонэнызы кивалтӥсь Мария Семенихина. — Со милемын ялан выль кырӟанъёс дышетылӥз. Но малы ке яратон сярысьёссэ уг ӵекты вал. Я гурт сярысь, я эшшо мукет маке сярысь кырӟаллям. Жаляса верано, клубысь со кошкиз. Нош табере милемын ужа Ираида Баранова. Таиз но мыло-кыдо.

«Капчи мылкыд» коллективе пенсионеръёс люкаськемын. 3-4 ар талэсь азьло шуыны луэ вал: ваньзы нылкышноос. Нош табере кылдӥз воргоронзы но — Василий Фёдоров.

— Удалтӥз милемлы эмеспиен! — шуо «капчи мылкыдъёс». — Пӧламы со Улын Юри палась вуиз. Отын но кырӟа вылэм. Песенникез мар ке зӧкта. Табере со песенникысьтыз кырӟанъёссэ ми репертуарамы кутӥськом. Василий радиоысь чебер кырӟанэз кылэ ке, гожтыса кельтэ. Юри диктофон но басьтӥз ни! Собере со кырӟанэз ми дышетӥськом.

Нош ачиз Василий Фёдоров тау каре «Удмурт дуннелы». Угось Раиса парзэ со газетысь «Тодматскон сэрег» пыр шедьтэм! Газетэз, пе, али но мыло-кыдо лыдӟисько.

— Гуртоосмы милям газет-книга туж лыдӟо, — вера библиотекарь Валентина Баушева. — Библиотекаын калык котьку ик луэ. Нылпиос понна «Юлтошъёс» театральной, «Библиотекалэн егит эшъёсыз» кружокъёс радъямы. Мӧйыос понна но толэзьлы быдэ ик ужрадъёсмы луыло. Отчы но калык лыктэ ке, нялтас лыдӟиськыны кутско ни.

Та рад библиотекаын «Удмурт дунне» газетлы сӥзем быдэс адӟытон радъяллям. Отчы поттӥллям газет бамъёсты, редакциын ужась журналистъёслэсь, писательёслэсь — Елена Миннигараевалэсь, Анастасия Шумиловалэсь но мукетъёсызлэсь — книгаоссэс. Адӟытонэ гинэ поттӥллямтэ — лыдӟиллям но. Доразы асьсэос авторъёс вуизы бере — шуныт кылъёссэс ӧз жалялэ.

— Гуртамы котьмалы мыло-кыдо калык улэ, — вера Кечолысь ветеран огазеяськонэн кивалтӥсь Мария Семенихина. — Пенсионеръёсмы, кырӟам-верам сяна, турслётъёсы но пыриськыло. Улын кечолъёс туэ Арлыдоослэн нуналазы быдэс автобусэн Ижысь зоопарке ветлӥзы. Капчи калык озьы ик артысь Кечейылын но. Кемалась ӧвӧл отчы пуктӥзы Быдӟым тыложе пыриськемъёслы син­пелет. Нош гуртоос, огазе кариськыса, со котыре туэ писпуос мерттӥзы ни.

Асьмеос ке ӧм, кин милесьтым улон-вылонмес шулдыргес карыны кулэ, шуо гуртоос. Таӵе мылкыдын соос пӧртэм ужъёс борды басьтӥсько. Ӟеч мылкыдын ик гожтӥсько «Удмурт дунне» газетлы но. Отысь, пе, тодӥськом, кызьы уло мукет гуртъёсын, ёросъёсын — ог-огед сярысь тодытэк, улон палдурес. Тыро луэ, ӵошен возиськыку гинэ. 

Элина Кумачёва

Ангелина Снигирева
By Ангелина Снигирева Ноябрь 14, 2019 16:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<