Ӟечесь, Афанасьевна!

Ангелина Снигирева
By Ангелина Снигирева 22 ноября, 2019 15:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шаркан ёросысь кӧня ке сюрс нуныослы югыт дуннеез адӟыны, нылъёслы анай луон шумпотонэз шӧдыны юрттӥз акушер-гинеколог Алевтина Никитина. Алевтина Афанасьевна эмъян удысын 40 арлэсь кема тыршиз, со Удмуртиысь дано врач, Россиысь дано донор, Шаркан ёрослэн дано адямиез.

А. Никитина
ТУСПУКТӤЗ: А. ИОНИНА

Котькуд ымныр — ортчем учыр

Алевтина Афанасьевна Шарканысь ульчае потэ ке, соин котькуд кышномурт ӟечъяське.

Ог кык ар талэсь азьло Советской ульчаетӥ вамышъясь мӧйы врачлы ульча вамен кышномурт кеськиз. Ушъяськиз:

— Афанасьевна, ӟечесь! Нош мынам нылы бызиз!

— Ӟечкыласько! — пумитаз пальпотӥз эмъясь.

Кыштыр вамышъян сяменыз тодаз вайиз та нылкышноез. Бен-бен, вирез «резус-отрицательной» вал. Роддоме ӧз лыкты, нош ваён дырыз — туннэ-ӵуказе. Сое утчаны Алевтина Афанасьевна больницаысь машина куриз, гуртэ потӥз. Нош нуны витись кенак кудӟемын, фляга тыр брагаез чырса. Районысь врачъёслы пумитъяськыны моӵез ӧз тырмы. Роддоме вуыса ик, пияны кутскиз. Кышномуртлы капельница пуктӥзы, вордэм нунызэ но озьы ик капельница улэ интыязы. Озьы гинэ юылыны яратӥсь кышномуртлэсь пиналзэ утьыны быгатӥзы. Табере нылаш будэм, бызьыны вуэм, шумпотэ нылкышно эмъясь.

Шарканысь роддоме Алевтина Афанасьевна ужаны вуиз 1966-тӥ арын. Вордскем Шаркан палъёсысьтыз со палэнэ кошкылӥз тодон-валан люканы гинэ. Таклёпочинкаын вордскем Аля 8-тӥ класс бере Ижысь медучилищеын дышетскиз. Собере 3 арзэ ужаса вуттӥз. Огполаз егит фельдшерез тодмаз медучилищеысь дышетӥсез — Пётр Яковлевич Файнштейн. Алялэсь ужамзэ, калыкен вераськемзэ чаклаз, тӥледлы одно ик мединститутэ пыроно шуыса нодъяз. Пинал фельдшерлэн аслаз но сыӵе мылкыдыз вал, но… Аля вордскемын 1940-тӥ арын. Семьяын со 7-тӥез пинал вал. Бубыен улонэз ӧз тоды — атаез Быдӟым ожысь лябӟыса вуиз, кулӥз.

Озьы ке но, вань дӥсьтонзэ люкаса, Аля Ижысь мединститутэ кошкиз. Пыриз. Дышетскиз но улӥз стипендия чотын. Ярам, Камчатка пала ужаны кошкем апаез юрттӥськиз на — коньдон ысъяз. Институтын ик Алевтина пумитаз вуоно кузпалзэ — Дмитрий Ивановичез. Медучилищеез пырпотыса, армие 3 арлы ветлыса, со 2 курслы бергес дышетскиз. Татын ик студентъёслэн семьязы кылдӥз. Врачлэсь дипломзэ басьтыса, Алевтина Афанасьевна Шарканэ берытскиз.

Егит эмъясьёс соку ваньзы ик огъя профилья врач луыса потылӥзы. Шарканын Алевтина Никитиналы нырысетӥ нуналъёсаз ик ужан интызэ возьматӥзы: тани тыныд роддом, пациентъёсыд — быдэс районысь нылкышноос. Азьвылэныз акушер-гинекологен Алевтина Афанасьевна 1 нунал гинэ ужаса вуттӥз. Егит специалистлы нокыӵе визь-нод пыӵатӥсь но, документъёсты радъяны валэктӥсь но ӧй вал. Нош нуны вайисьёс со дыре трос тупаллязы — арлы быдэ 600-700 пинал югыт дуннее потылӥз.

Шарканысь роддом соку пичи гинэ юртэ интыяськиз, местаос уг тырмо. Егит акушер 10 раскладушка басьтыны куриз. Инты окмымтэ дыръя корт койкаос вискы со раскладушкаосты пуктылӥзы. Санитаркаос карнанэн ву нуллӥзы, роддомысь гурез пуэн эстылӥзы. Нош егит акушерлы, роддомын ужам сяна, дежурство но сётъяло, гинекологияя отделение но вутсконо на.

Алевтина Афанасьевналы ӧжыт капчигес луиз кузпалыз вӧзаз ужаны кариськем бере. Дмитрий Иванович озьы ик Шарканысь больницае бертӥз, нырысь хирург луыса ужаз. Нуналмысь адӟиз: кузпалыз огназ, юрттӥсез ӧвӧл. Собере, специализациез ортчыса, со но акушер-гинеколог луиз.

Пыдъёсыз жадёнэз ӧз тодэ

Уж пӧлы выйыса, Лена но Марина нылъёсызлэсь будэмзэс Алевтина Афанасьевна валаса ик ӧз вуы:

— Кызьы пиналъёсы быдэ вуизы — ӧй адӟылы. Соосты утялтыны шуыса мужикелэн мумиз вуиз. Со пересь вал ке но ини, туж юрттӥз милемлы. Вызовъёс туж ӵем тупаллязы. Ужысь бертыса, мон пырон пала кылиськисько, дӥсьме пукон вылэ сыӵе порядокен тырисько: мар бӧрсьы мар дӥсяно луоз. Вызов дыръя, тылэз ӝуатъятэк, пеймытын ик дӥсяськисько, бызьыса потӥсько. Асме серекъясько вал: телефон жингыртыку, йырылэсь азьло валесысь пыдъёсы ӝутско.

Совето аръёсы районысь больница ӧз быгаты ушъяськыны ӟеч ужан тӥрлыкен. Алевтина Афанасьевна но ӵемгес оскиз аслаз киосызлы, бадӟым кӧтъёсты кылзӥз, трубка кутыса. Бӧрысь вуттӥзы кольпоскоп, тазомер, стетоскоп но мукет тӥрлык.

Огез учыр Алевтина Афанасьевналэн йырысьтыз уг кошкы. Гуртысь егит фельдшер роддоме вуиз. Нуныез — 1-тӥез. Вордыны нокызьы уг пӧрмыты. Нунылэн сюлмыз но жугиськемысь дугдӥз ни. Соку акушер-гинеколог кӧт вылтӥз поттыны (кесарево сечение) кариськиз ни. Операция бере гинэ валазы, ма муген нуны ӧз поты: пиналлэн мугорыз 1, нош йырыз 2 вылэм. «Уродство» диагноз пуктӥзы соку. Патологоанатом эскерем бере шараяськиз: нунылэн мусэз но, сюлэмыз но 1 гинэ. Акушер ӵектӥз та нуныез Иже лэзьыны — вуоно медикъёслы дышетсконазы туж пайдаё луысал. Но нунылэн песянайёсыз пумит луизы. Ярам, нылкышно ӧз юскиськы, берло эшшо пинал вайиз на, соиз таза вордскиз.

Ёросын УЗИ ӧвӧлэн нылкышноосты Ижевске но лэзьяно луылӥз.

— Огполаз егит кышномурт вуиз. Кӧтсэ маялляса, 2 пиналзэ шедьтӥсько. Йырыз но кык, сюлэмыз но кык жугиське. Ижевске ыстӥ. Отын УЗИ кабинетын учкиллям, 1 нуныез шуиллям. Мон озьы но со эскеронлы ӧй оскы, 2 пиналэз шедьтӥсько но тӥни! Нош кышномуртэ роддоме вуиз но — кыкто пи вайиз, — тодаз вае эмъясь.

Алевтина Афанасьевна уг ни тоды, ку нырысетӥ операция лэсьтӥз. Со аръёсы уго кӧт вылтӥ поттэм понна ӧз ушъяллялэ — объяснительной гожъяны косылӥзы. Али тани ӧжыт ке но кышкытлык кылдэ ке — нылкышноез вандыло. Собере операциос лэсьтыны показаниос но паськытатэмын ни.

Тани огпол нырысетӥ нунызэ вайись кышномуртэ вандылӥз — нуныез бадӟым вал. Кӧня ке ар ортчыса, кышномурт нош секытэн луиз. Алевтина Афанасьевна сое нуны вайыны городэ ыстӥз: эмъясьёс чакламъя, 2-тӥ пинал эшшо бадӟымгес луэ. Нош отын операция бере нуны кулӥз. 3-тӥ нунызэ вайыны лыктыкуз, та кышномурт пурт кадь ваменскиз: коть вие, коть вандэ, но городэ роддоме уг мыны. Таяз учыре нылыз вордскиз. Эмъясь тодэ: нылаш туж чебер но визьмо будӥз, бызьыны но вуиз ни.

Туала песянай

Бӧрысь ёросын бадӟым­гес роддом пуктӥзы. Ужан условиос но ӟечгес луизы: ву но, шуныт но вуиз. Районысь акушер-гинеколог ассэ жаляны ӧз валалля. Уж нырысетӥ интыын вал. Кузпалыныз одӥг интыын тыршизы бере, ужысь сюлмаськонъёссэс, югдурзэс семья куспазы но вераллязы.

— Лена нылы пичи дыръяз горшокын пуке но шудон телефонэн вераське: «Алло, алло, ӧте акушеркаез. Татын нылкышнолэн вирыз кошке…», — нылызлэсь пичи дырзэ тодаз вае Алевтина Афанасьевна.

Озьы Лена но, Марина но кыкназы акушер-гинекологлэсь ужзэ бырйизы. Бӧрысь удыссэс воштӥзы ни — Елена Дмитриевна Ижысь огаз больницаын УЗИ аппаратэн ужа, Марина Дмитриевна Грузие бызиз, гинекология удыссэ фармацевтикалы воштӥз.

Алевтина Афанасьевна ёрос больницаын 65 аресозяз ужаз. Жади ни, секыт шуыса, 3 пол заявление гожъяз. Бӧрысь сое УЗИ аппаратэн ужаны выжтӥзы. Ёрос больницае егит ужасьёс вуэмен гинэ, арлыдо эмъясь шутэтскыны кошкиз.

Валля арын Алевтина Афанасьевна огназ кылиз — Дмитрий Иванович кузпалыз улонысь кошкиз. Ярам, Лена нылыз ӵемысь бертылэ. Нош 4 внукъёсыз ваньзы Удмуртилэсь палэнын уло. Огез Голландие стажировкае мынӥз, мукетыз Словакиын дышетске, куинетӥез — Грузиын, пичиез внукез — Англиын. Пиос песянайзэс уг вунэто — Алевтина Афанасьевна соосын скайп пыр вераське, кызьы улэмзэс, мар сием-юэмзэс тодэ.

Ужан аръёсыныз ӵошатыса, табере мӧйы эмъясьлэн сомында ваньмон дырыз. Сое кышномурт туж валаса радъя. Котыраз эшъёссэ люка но, тулысысен сӥзьылозь скандинав амалэн вамышъяло. Гужемзэ бакчаын «разминка» окме, пе. Нош собере лымы усемез возьма ни — куас вылэ султыса, нуналлы быдэ эшъёсыныз сике потэ. Шаркан омыр улыны кужым сётэ.

Елена Скворцова

Ангелина Снигирева
By Ангелина Снигирева 22 ноября, 2019 15:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<