Ӝутӥськон амалъёсты утчан

Ангелина Снигирева
By Ангелина Снигирева Ноябрь 28, 2019 10:25

Федерацияя Кенешын ортчизы Удмуртилэн нуналъёсыз. Со докладъёс, экспозициос но адӟытонъёс гинэ ӧй вал — проектъёс пумысен кенешон но, умой но пиртэш палъёс сярысь шара вераськон но.

Федерация Кенешлэн Тӧроез В. Матвиенко дорын — Удмуртиысь вылӥ кивалтӥсьёс
Туспуктэм: udmurt.ru

Гуртъёс

2014-тӥ-2018-тӥ аръёсы улосъёсты азинтонъя программая шаерамы федерал бюджетысь вуэмын ог 3,7 миллиард манет. Гуртысь улон-вылонэз эшшо но ӟечгес карон вылысь ялан кылдо выль проектъёс.

— Кызьы туннэ уло гуртъёс, марлы соос кулэясько шуыса, котыр ласянь чакланы выримы, — Федерация Кенешысь гурт удысъя комитетлэн заседанияз вераз Удмуртиысь гурт удысъя но сиён-юонъя министр Ольга Абрамова. — Гуртысь калыклэсь ужпумъёссэ сэрттэм-пертчем, социальной объектъёс пуктэм сяна, отысь экономикаез ӝутыны малпаськомы.

Уката но бадӟым юрттэт сётыны чакламын ялан паськытась гуртъёслы, кытын хозяйствоос но калык гуртсы понна сюлмасько. Кылсярысь, Глазов ёросысь Кечпигуртын Чайка микрорайон кылдӥз. Отын туннэ инфраструктураез рос-прос ӧвӧл на. Озьы ик Кизнер каргуртысь Северный микрорайонэ газ кысконо. Чагыр эстӥськон возьмало Каракулино ёросысь Черново черкогуртын но, Яр ёросысь Биграгуртын но. Ольга Абрамова пусъемъя, улосъёсты котыр ласянь азинтон программая Удмуртие вуыны кулэ 1 миллиард манетлэсь ятыр.

— Пичи гуртъёсты но вунэтыны уг яра, отын но адямиос уло. Со гуртъёсты возись фермеръёслы но оскон сётоно, соос куштэмын уз луэ шуыса. Гуртазы газ, ву кыскимы ке, сюрессэс тупатӥмы ке, ужзы но каньылгес мыноз, — шуэ министр.

Сюресъёс

Улосъёсты азинтон ужпумез Федерация Кенешын шаермылы сӥзем час дыръя сенаторъёс азьын ӝутӥз Удмуртилэн Тӧроез Александр Бречалов но. Ватытэк вераз: гуртысь сюресъёсын секыт югдур кылдэмын.

— 2017-тӥ арын Удмуртиын шараямын вал машинаен ортчыны луонтэм 62 участок. Со ог 20 сюрс адямиос дорозь нуись сюресъёс. Удмуртие ужаны лыктэме бере калыклы кыл сётӥ, 2020-тӥ арлы югдурез тупатомы шуыса. Курисько та ужпумъя милемлы дурбасьтыны, улосъёсты котыр ласянь азинтонъя кун программае ватсаса объектъёс пыртыны, соосты быдэстон вылысь 2020-тӥ-2022-тӥ аръёслы коньдон висъяны, — Федерация Кенешлэн Тӧроезлы Валентина Матвиенколы но сенаторъёслы вазиськиз Александр Бречалов.

Александр Бречалов экологияя юанъёсты но ӝутӥз. Кам шуре жоб вуос ӧжытгес мед усёзы шуыса, чылкытатӥсь сооружениос ӝутоно, троссэ тупатъяно. Оглом со ужез быдэстон понна кулэ 10 миллиард манет. Удмуртиез та ласянь федерал проектэ мед пыртозы шуыса куриськон гожтэмын ни. Россиысь Правительстволэсь решенизэ возьмало.

Лэсьтӥськонъя, ЖКХ-я но энергетикая министр Дмитрий Сурнин пусъемъя, очистной сооружениос пӧлысь 70 процентэз начар ни. Оглом тупатъяно 30 объектэз. Соосты лэсьтон бордысь потэ 350 сюрс адямиослэн тазалыксы. Тужгес секыт югдур Можга городын. Татын чылкытатӥсь сооружениоссы ик ӧй вал. Соосты лэсьтон борды кылем арын басьтӥськизы. Ужъёссэс йылаз-пумаз вуттон вылысь эшшо коньдон кулэ на.

Школаос но больницаос

Шаерамы нош ик ужаны кутскиз санавиация. Солы луыса 3 толэзь ӵоже 59 адями утемын вал. Туннэ тросэз больницаос вужмемын, соосты выльдыны кулэ. Туэ ар пумозь Можгалась нылпи поликлиникаез но Вотка ёрос больницаез тупатъянъя проектъёс лэсьтэмын луозы. Та объекъёсты выльдон понна оглом ог 1 миллиард манет кулэ. Соосты 2021-тӥ-2022-тӥ аръёслы чаклам инвестициосъя федерал программае пыртонъя сенаторъёслы дурбасьтыны курыса вазиськиз Александр Бречалов.

Капчи ӧвӧл югдур школаосын но. 2025-тӥ арлы вань пиналъёсты одӥг сменаен дышетскыны кулэ ни. Берло 3 ар ӵоже Удмуртиын пуктэмын 4 школа но 29 нылпи сад. Та ужпумъёсты быдэстыны луиз нацпроектъёслы луыса но, шуиз Алексанр Бречалов. Югдурез ӝог тупатыны секыт — уноез школаос 50 процентлы вужмемын, куд-огез тупатъяны но уг ярало ни. Ижын воксё но 1999-тӥ-2017-тӥ аръёсы одӥг школа но пуктэмын ӧй вал. «Россети» огазеяськонэн валче Удмуртиысь электросетьын воштонъёс ортчытыса, луонлык кылдӥз 3 миллиард манет поттыны. Вань со коньдон кутэмын соцобъектъёсты тупатонлы, шуиз Александр Владимирович. Оглом со ог 700 объект.

Адӟем карымон

Федерация Кенешын М. Калашниковлы сӥзем адӟытон ортчиз. Михаил Тимофеевич шуиз вал: ужалэ асьтэ кунды понна, отын улӥсь калык понна. Малпасько, со асьмелы ужаны наказ, пусйиз Федерацияя Кенешлэн Тӧроез Валентина Матвиенко. Солэн верамезъя, Удмуртия ӝог азинскись улосъёс пӧлы пыре.

— Ваньмыз со потэ калыклэн тыршемезлы но Александр Бречаловлэн но выль командалэн сюлмаськемзлы луыса. Югдурез эскериды, будон-ӝутӥськон интыосты утчады но табере соосты улонэ пыӵатӥськоды. Калык но возьма воштӥськонъёсты. Оскисько, тӥляд ваньмыз пӧрмоз, — шуиз Валентина Ивановна.

Удмуртилы чакламын 2 миллиард манет висъяны. Со ӟеч юрттэт. Но со огпол сётӥськись гинэ медам луы, матысь 3 арлы чакланы кулэ, пусйиз Валентина Матвиенко.

Умоен пусйиз со эмъян но дышетон удыслы саклык висъяммес. Синмаськиз школаыосын усьтэм агроклассъёслы но эмъян классъёслы. Озьы ик нимысьтыз пусйиз «Академия «Калашников» технопарклэсь нылпиосын выремзэ.

— Та проектъёсты мукет улосъёслы но адӟем карымон. Дышетонъя комитетлы вазиськи, тӥлесьтыд опыттэс санэ мед басьтозы, мукет улосъёсын пыӵатыны мед дэмлалозы, — вераз со.

Сенаторъёс Удмурт Элькунлы азинскыны юрттонъя постановление кутӥзы. Ар ортчыса, йылпумъян лэсьтыны луоз, мае быдэстыны луиз, мае ӧзгес.

Сергей Захаров

Ангелина Снигирева
By Ангелина Снигирева Ноябрь 28, 2019 10:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<