Яратон мед тырмоз ваньмызлы

Ангелина Снигирева
By Ангелина Снигирева Ноябрь 22, 2019 13:11

Анайлэн нуналыныз валче Можга ёросысь Трактор гуртысь Любовь Никитиналы Татьяна нылыз «Удмурт дунне» газетлы подписка кузьмаз.

Л. Никитина
Туспуктӥз М. Егоров

— Лыдӟиськытэк улыны уг быгатӥськы мон, — вера Любовь Ивановна. — Вань книгаос лыдӟемын ни, нош газетысь ялан маке выльзэ шедьтоно, мылкыдэз буйгатоно. «Удмурт дуннеез» киям кутӥсько ке, картэ тодам лыктэ. Ми соин йыртӥянъёсты гинэ но ӵошен вожмаськыса лэсьтӥськомы вал. Куд-ог материалъёс понна даллашыса но вуттылӥмы: солы огез кельше, мыным мукетыз. Кӧня ке ар талэсь азьвыл шуак кулӥз. Рак вылэм. Висемзэ милесьтым кема ватыса улӥз. Мылкыддэ быдтэме ӧз поты, шуиз. Ми соин угось уж бере сцена вылысь егит дырысен ӧм васькаллялэ. Гуртысь эшъёсмес бордамы ӧтиськомы вал. Озьы Василий Садовниковлэсь «Сюан», Игнатий Гавриловлэсь «Аннок», Анатолий Григорьевлэсь «Атас Гири» но мукет спектакльёссэс пуктӥмы. Кӧня гуртъёсы потамы. Быдэс зал тыр калык люкаськылӥз. Али ке но гуртын маке пуктоно ке, сценка малпаськомы но, монэ сцена вылэ потто. Кырӟаны но туж яратӥсько. «Зарни сӥзьыл» ансамбленымы арняяз 2 пол репетицие люкаськиськомы. Оген улӥсь адямилы со туж умой амал. Ачим ик кырӟасько, ачим ик бӧрдӥсько, ачим ик серекъятӥсько. Улэм потон мылкыдме озьы ӝутӥсько.

Куд-огезлэн верамез вань: кыл но, куара но вань — кыӵе талант! Озьы шуэмзы мыным, гуртысь фермаын 23 ар парсь сюдӥсьын ужам адямилы, тужгес дуно. Кыедысь ӧй поталля — парсьпиосмес котыр ёросъёсысь басьтыны лыкто вал. Мон кивалтӥсьёслы кылме вералляй, пудо понна сюлмаськыса, умойгес сиён, ӟечгес выж пул курыса. Медаз кылзӥське ай, пызйытӥсько вал. Огпол ваземзы но вань: тон озьы кылдэ верад ке, адямие ноку уд поты. Медаль понна ӧй ужа мон. Но калык гажамысь ӧз дугды. Райсоветэ депутатэ но бырйылӥзы. Соку гуртамы сюрес но дэмен лэсьтыны быгатӥмы, фермаез но выльдӥмы. Али ке но колхоз («Трактор» хозяйство) предмылы Василий Зоринлы куддыр мылкыдъёсме верасько. Ачиз но шуэ: валэктыны кулэ. Туж кельше ужамез. Арлыдоосты сӥлы каре. Котькуд пенсие потӥсьлы скандинав амалэн ветлон боды кузьма. Модае пыриз ук. Табере арлыдоосын нуналлы быдэ нуназе бере бодыосмес кутӥськомы но нюлэскы дыртӥськомы.

Оген кыльыны нылъёсы туж ик уг сёто. Милям соос 3 кузя. Котькудӥзлэн аслаз юртэз, аслаз семьяез. 4 внуке ни. Аслам нылъёсылы дыры ӧз тырмы бере, соослы ке но вань яратонэ мед тырмоз. Ваньзылы юрттэм потэ. Анай сюлэм ук со — пиналъёс понна улоно. Асьсэос но мыным ялан юрттӥсько. 

Елена Сараматова

Ангелина Снигирева
By Ангелина Снигирева Ноябрь 22, 2019 13:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<