Юртазы кезьыт ке но, шуныт

Ангелина Снигирева
By Ангелина Снигирева Ноябрь 13, 2019 09:51

«Удмурт дунне» газетын ужасьёсты куное ӧтчазы Шаркан ёросысь Кипун гуртысь мӧйыос. Соослэн задор мылкыдзылы паймыса бырим: асьсэлэсь клубзэс кылдытӥллям, ваньмон дырзэс кырӟаса-вераса, киужен вырыса ортчыто.

Кипунысь лыдӟисьёс котьмалы мыло-кыдоесь
Туспуктӥз Е. Никитина

Кипунысь мӧйыослэн клубзы интыяськемын вужмем пу коркан. Одӥг палаз трос нылпиё семья улэ-вылэ, мукет палаз люкаськыло мӧйыос. Юртазы таослэн ульчаын кадь кезьыт. Соин кипун кенакъёс висъетазы обогревательёс пуктылӥллям. Юртын салкым ке но, отчы пырыса, вордскем коркаяд кадь шуныт мылкыд кылдэ. Выж вылазы валемын чильпам-керттэм выж лёгетъёс, борддоръёсазы ошылэмын пужыятэм ӵушконъёс, ковёръёс, внукъёссылэн суредъёссы, укно дуръёссэс шулдырто пуштыр-пуштыр сяськаос. Нош мукет сэрегаз зэмос музей радъямын: кӧкы, дэра дэремъёс, горд сюйлэсь посуда но трос мукетыз. Отын ик ошылэмын клубзылэсь улонзэ возьматӥсь бордгазетъёс — мӧйыос сое асьсэос лэсьтӥллям. Одӥгез вера скандинавской амалэн ветлэмзы, мукетыз — Порозгуртысь но Дырдашурысь мӧйыос доры куное вуылэмзы сярысь. Табере, пе, дасялом «Удмурт дунне» газетын ужасьёсын пумиськонлы сӥземзэ.

— Гуртамы клубмы но, школамы но ӧвӧл ни. Егитъёс бен палэнэ уг кошко, пуктӥсько, выль посёлок но кылдэмын ни — гуртмы тани-тани Шаркан райцентрозь вуоз, — вера Кипун гуртысь мӧйыослэсь клубзэс кылдытӥсь Алевтина Бусыгина. — Ог 2 ар талэсь азьло клубмес кылдытоно кариськимы. Первой ик вазиськимы ёросысьтымы ветеранъёслэн кивалтӥсьсылы Галина Уткиналы. Туж умой малпан, шуиз, мылкыдмес бурдъяса лэзиз. Со сюлмаськемъя ик та пу юртын милемлы сэрег висъязы. Сое найм амалэн кутӥськомы. Инты бен шедиз, но со воксё но уг шунтӥськы, электричество но вӧзысьтымы квартира пыр кыскемын. Обогревательёсын шунсконо-мар луэ ке, тыл понна тыриськонмы ичи уг люкаськы. Кин кӧняен быгатэ, сомындаен ик коньдон сётэ ни.

Куке-соку гуртазы клубзы вал ик, но «Идеал» колхоззы банкрот луэм бере клублэсь юртсэ нимаз кузёлы сётӥзы, со интыын усьтӥськизы сиськон инты, бар, медпункт. Отчы но, инты юаса, вазиськимы вал, аренда понна толэзяз 8 сюрс манет куризы. Ми сомындаез тырыны ум ворме, шуэ Алевтина Геннадьевна.

— Ярам, Илья Собин ужбергатӥсьмы 10 сюрс манетсэ висъяз, соин обогревательёс басьтыны быгатӥмы. Ма, ми номыр но мултэссэ ум куриське. Пичи ке но гур пуктысалзы ке, туж шудо луысалмы ни! Та пумысь вазиським вал одӥг ужбергатӥсьлы, 25 сюрс манет куриз. Кызьы пырим дораз, озьы ик потӥм. Тани укноосысьтымы пасьёссэ джутэн туйылӥ вал, сое но тылобурдоос кыскаса поттазы ни. Тӥни ук табере сюлтыр-калтыр тӧлъя ветло, — полиэтилен плёнкаен возъям-шуккылэм укноос шоры возьматэ Алевтина Геннадьевна.

Мӧйыос оско: клубазы куке-соку одно ик шуныт луоз. Куронэнызы вазиськыло кивалтӥсьёслы, ужбергатӥсьёслы. Дыр вуоз ай: милемлы юрттыны мылкыд карись адями шедёз, огымысь шуо кипун кенакъёс. Ӝож мылкыдлы соос уг сётско. Пӧртэм ужрадъёс ортчытъяло — асьсэос ик учкисьёс но, артистъёс но. Дырын-дырын куное вуыло бускель гуртъёсысь мӧйыос доры. Огазе кариськыса, удмурт кырӟанъёсты кырӟало, ог-огзылы сям-йылолъёссэс возьмато. Луонлык шедьто ке, Иже удмурт концертэ мыно. Туала вакытэ калык нимаз кариськысагес улэ ни: ас понназ, ассэ тодыса, калыке мултэссэ потатэк. Мӧзмыт ук озьы. Ми дышемын вашкалаосмы сямен улыны: ужын но, шулдыръяськонын но ваньмы дэмен, шуо Кипунысь мӧйыос.

Азьвыл аръёсы Кипунын тыро-пыдо почтальонзы ӧй вал, соин но, лэся, «Удмурт дунне» газетлы гожтӥськисьёслэн лыдзы кулэсмиз — быдэс гуртысь одӥг семья гинэ газетмес басьтылӥз.

— Ярам, туэ почтальонэ рос-прос ужась нылкышноез кутӥзы. Иське, газетъёсты, гожтэтъёсты табере милемлы дыраз вуттылозы, уз ышылэ, — огымысь шуо кипун кенакъёс. — Лыдӟиськыны ми яратском, тужгес но удмурт сямен. Пенсия басьтӥм ке тани, одно ик «Удмурт дуннелы» гожтӥськом. Эшшо одӥг муг луоз клубамы люкаськыны: кырӟам-верам но киуж ужам сяна, газеттэс но дэмен, шара лыдӟомы.

Елена Никитина

Ангелина Снигирева
By Ангелина Снигирева Ноябрь 13, 2019 09:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<